महिला विश्वकपः स्पेनको प्रभावशाली जित

A+ A A-

महिला विश्वकप फुटबल २०२३ मा स्पेनले प्रभावशाली जित निकालेको छ । आज (शुक्रबार) भएको खेलमा स्पेनले कोस्टारिकालाई ३–० गोलले पराजित गर्दै बिहीबार सुरु महिला विश्वकपमा विजयी सुरुवात गरेको हो ।

न्युजिल्यान्डको विलिङटन रंगशालामा भएको खेलमा कोस्टारिकाविरुद्ध स्पेनले सहज जित निकालेको हो । स्पेनले तीनै गोलको अग्रता पहिलो हाफमा लिएको थियो ।

पहिलो गोल नै उपहार स्वरुप पाएको स्पेनका लागि एटना बोनमाटी र इस्थर गोन्जालेजले गोल गरेका थिए । खेलको २१औँ मिनेटमा कोस्टारिकाकी भ्यालेरिया डेल क्याम्पोले आत्मघाति गोल गरेपछि स्पेनले १–० गोलको अग्रता बनायो ।

त्यसको दुई मिनेटपछि अर्थात् खेलको २३औँ मिनेटमा बोनमाटीले गोल गरेपछि स्पेनले २–० गोलको अग्रता बनाएको थियो । खेलको २७औँ मिनेटमा गोलन्जालेजले गोल गरेपछि स्पेनले ३–० गोलको अग्रता बनायो । पहिलो हाफमा तीन गोलको अग्रता बनाएको स्पेनविरुद्ध कोस्टारिकाले दोस्रो हाफमा सुधारिएको खेल खेल्यो ।

तर गोल गर्न नसक्दा आफ्नो पहिलो खेलमा नै स्पेनसँग कोस्टारिका ३–० गोलले हारेको हो । यो जितसँगै समूह ‘सी’ मा रहेको स्पेनले तीन अंक बटुलेको छ । यो समूहमा स्पेनसँगै, कोस्टारिका, जापान र जाम्बिया रहेका छन् ।

त्यस्तै, आजै भएको अर्को खेलमा स्वीट्जरल्यान्डले फिलिपिन्सलाई २–० गोलले पराजित गरेको छ । स्वीट्जरल्यान्डको जितमा रामोना बाचमन र सेरेना सेभेरिनले गोल गरे । खेलको ४५औँ मिनेटमा पेनाल्टीबाट गोल गर्दै रामोनाले स्वीट्जरल्यान्डलाई १–० गोलको अग्रता दिलाइन् ।

खेलको ६४औँ मिनेटमा सेरेनाले गोल गरेपछि स्वीट्जरल्यान्डले फिलिपिन्सलाई २–० गोलको जित निकाल्न सफल भयो । समूह ‘ए’ मा आयोजक राष्ट्र न्युजिल्यान्डसँगै, स्वीट्जरल्यान्ड, फिलिपिन्स र नर्वे रहेका छन् ।

जितसँगै स्वीट्जरल्यान्डले तीन अंक बनाएको छ । यसअघि न्युजिल्यान्डले आफ्नो पहिलो खेलमा नर्वेलाई बिहीबार १–० गोलले पराजित गरेको थियो । न्युुजिल्यान्डको पनि तीन अंक नै छ । आजै भएको समूह ‘बी’ को खेलमा नाइजेरिया र क्यानाडाले गोलरहित बराबरी खेल्दै अंक बाँडेका छन् ।

प्रकाशित मिति: शुक्रबार, साउन ५, २०८० १५:२२