रेड ट्रेड कम्पनीको अझै ३ सय ५१ किलो सामान विमानस्थलमै, सुन नै भएको आशंका

A+ A A-

रेड ट्रेड कम्पनीको नाममा आएको थप सामान अझै त्रिभुवन विमानस्थलको भन्सार कार्यालयमै रहेको खुलेको छ । बुधबार हङकङबाट क्याथे चाइना एयरको विमानमा कार्गो गरेर अटोपार्ट्समा सुन भित्र्याएको खुलेपछि थप सामान भन्सार कार्यालयमै रोकिएको हो । बुधबार साे कम्पनीकाे नाममा आएकाे सामानबाट ठूलाे परिमाणमा सुन बरामद भएकाे थियाे ।

१८ जुलाई २०२३ मा रेड ट्रेड कम्पनीको नाममा कुल ९ सय ९६ किलोबराबरको ३६ पिसको अटो पार्ट्स आएको थियो । जसमध्ये अझै १३ पिस खोल्न बाँकी छ । त्यो भनेको ३ सय ५१ किलो हो ।

उक्त सामग्रीसमेत अटोपार्ट्स नै भएका कारण त्योभित्रसमेत सुन हुन सक्ने अनुमान विभागको छ । राजस्व अनुसन्धान विभागले रेड ट्रेड कम्पनीले अटोपार्ट्समार्फत लुकाएर भित्र्याउन खोजेको सुन बुधबार बरामद गरेको थियो ।

बरामद भएको सुन करिब १ क्वीन्टल रहेको विभागका महानिर्देशक नवराज ढुंगानाले बताए । विभागले तस्करी भएर नेपाल भित्रिन लागेको उक्त सुन हालसम्मकै अधिक रहेको दाबी गरेको छ । अहिले राष्ट्र बैंककाे टक्सार विभागमा जाेख्ने काम भइरहेकाे छ ।

भन्सार पास गरी बाहिर निस्किसकेको अवस्थामा सो सुन विभागको विशेष सूचनाका आधारमा बरामद गरिएको हो ।

याे कम्पनीले तीन महिनादेखि थालेको थियो सामान भित्र्याउने काम

रेड ट्रेड कम्पनीले तीन महिना अघिदेखि मात्रै विभिन्न सामान काग्रोमार्फत नेपाल भित्र्याउने गरेको खुलेकाे छ । त्रिभुवन भन्सार विभाग स्रोतका अनुसार उक्त कम्पनी भोजपुर अरुण गाउँपालिका– ४ का ४९ वर्षीय हर्क राईको नाममा दर्ता रहेको खुलेको छ ।

विभागले उनीसहित दोलखा मेलुङ गाउँपालिका–३ का राजकुमार भुजेल र सोही स्थानका २१ वर्षीय दिलीप भुजेल र भारत पुरानो दिल्ली घर भई हाल पानीपोखरी बस्ने ५३ वर्षीय थाप्तेन छिरिङलाई विभागको टोलीले नियन्त्रणमा लिएको छ ।

भन्सार कार्यालयबाट प्राप्त कागजातअनुसार रेड ट्रेड कम्पनीले पहिलोपटक हङकङबाट २४ अप्रिल २०२२ मा २४ किलो अटोपार्ट्स ल्याएकाे थियाे ।

त्यसको दुई दिनपछि नै रेड ट्रेडले फेरि त्यही सामान १४ किलो भित्र्याएको थियो । रेड ट्रेडले अन्तिमपटक १८ जुलाई २०२३ मा हङकङबाट दुईपटकमा १ सय ८४ किलो सोही सामान ल्याएकाे थियाे ।

भन्सार विभागको तथ्याङ्कअनुसार रेड ट्रेडले हालसम्म ३४ पटक सोही प्रकृतिको अटोपार्ट्स भित्र्याएको देखिन्छ । जसमध्ये ३३ पटक हङकङ र एकपटक दुबईबाट भित्र्याएको देखिएको छ ।

राजस्व अनुसन्धान विभाग स्रोतका अनुसार उक्त सुन चिनियाँ व्यापारीले नेपाल पठाउने गरेको आशंका गरिएको छ । सुन तस्करीबारे अनुसन्धान अझै जारी छ ।

प्रकाशित मिति: बिहीबार, साउन ४, २०८० १४:५४