११औँ स्थानमा खुम्चिँदा पनि नेपाली पब्जी टोलीले कसरी जित्यो २ करोड २० लाख ?

A+ A A-

नेपाली पब्जी टोली डीआरएस गेमिङले साउदी अरबको रियादमा भएको पब्जी मोबाइल वर्ल्ड इन्भिटेसनल (पीएमडब्लूआई) मा १ लाख ६७ हजार अमेरिकी डलर अर्थात् करिब २ करोड २० लाख रूपैयाँ पुरस्कार जितेको छ । साउदी अरबको रियादमा भएको प्रतियोगितामा ११औँ स्थानमा मात्रै रहँदा पनि डीआरएसले यो रकम प्राप्त गरेको हो ।

मुख्य प्रतिस्पर्धाको छनोट चरणका रूपमा खेलाइएको अलस्टार्स स्टेजमा ९० हजार जितेको टिमले मुख्य प्रतिस्पर्धामा थप ७७ हजार जितेको हो ।

गएको माघमा इन्डोनेसियामा भएको पब्जी मोबाइल ग्लोबल कम्पिटिसन (पीएमजीसी) मा उपविजेता भएपछि डीआरएसले समर्थकको संख्या मात्रै बढाएको थिएन, अपेक्षा पनि उत्तिकै बढेको थियो । तर त्यसपछि भएका प्रतियोगिताहरू पब्जी मोबाइल प्रो लिग (दक्षिण एसिया) र पब्जी मोबाइल प्रो लिग च्याम्पियनसिप (दक्षिण एसिया) दुवैमा औसत प्रदर्शन गर्दै पीएडब्लूआईमा सिधा प्रवेश पाउनबाट वञ्चित भएको थियो । तर, समर्थकहरूले दिएको मायाले भोटिङमार्फत रियाद जाने टिकट नेपाली टोलीले पाएको थियो ।

यसबीचमा दक्षिण एसिया र दक्षिणपूर्व एसियाका टिमहरूबीच भएको रिजनल क्लासमा पनि डीआरएसको उत्कृष्ट प्रदर्शन देख्न पाइको थिएन । लगातार अन्तर्राष्ट्रिय प्रतियोगिता खेलिरहेको डीआरएसले घरेलु प्रतियोगिता पब्जी मोबाइल नेपाल सिरिजमा समेत आफूलाई आठौँ नम्बरमा खुम्च्याएको थियो । तैपनि ग्लोबल लबीमा डीआरएसको गनपावर देखिने समर्थकहरूको अपेक्षा थियो ।

पब्जी मोबाइल खेल्नेहरूबीच लोकप्रियताका आधारमा भोटिङबाट छानिएका र आयोजकले निमन्त्रणा गरेका १८ टोलीबीच अलस्टार स्टेजमा प्रतिस्पर्धा गरेका थिए । यसबाट उत्कृष्ट ६ टोली मुख्य प्रतियोगिताका लागि छनोट भएका थिए ।

असार २६ मा सुरु भएको अलस्टार्स स्टेजको पहिलो दिन सुरुवातका केही खेल राम्रो खेले पनि डीआरएसले चिकेन डिनर भने हात पार्न सकेको थिएन । यो दिन पीएमडब्लूआईको डिफेन्डिङ च्याम्पियनसमेत रेहको थाइ टोली भेम्पायरले सुरूका दुईसहित तीन चिकेन डिनर निकालेर अंक तालिकाको पहिलो स्थान कब्जा गरेको थियो भने इन्डोनेसियन टोली बीटीआरले दुई चिकेन डिनर लगेको थियो । पाँचवटा खेल दक्षिणपूर्वी एसियाका टिमले कब्जा गर्दा बचेको एउटा चिकेन डिनर भने ट्युनिसियाबाट आएको फाल्कनले सुरक्षित गरेको थियो ।

पहिलो दिन ६ खेलमा ३४ अंक बटुल्दै नेपाली टोली सातौँ स्थानमा थियो । पहिलो स्थानको भेम्पायरले ७८ अंक जोडेको थियो । दोस्रो स्थानमा रहेको जीजीको ५७ र तेस्रो स्थानको बीटीआरको ५० अंक पुगिसकेको थियो ।

मुख्य प्रतियोगितामा पुग्न उत्कृष्ट ६ मा पर्नुपर्ने दबाब थियो । त्यसैले डीआरएसले केही दबाबमा दोस्रो दिनको खेल सुरुवात गरेको थियो । यो दिन सानहोक म्यापमा भएको पहिलो खेल टिमका लागि सोचेको भन्दा राम्रो भयो । १६ इलिमिनेसनसहित प्रतियोगिताको पहिलो चिकेन डिनर निकाल्दा एउटै खेलबाट २६ अंक थपियो । जम्मा अंक ६० मात्रै भएन सातौँ स्थानमा रहेको टिम सिधै तेस्रो स्थानमा उक्लियो । डीआरएसभन्दा माथि जीजी र भेम्पायर थिए ।

दोस्रो दिनको दोस्रो खेलमा २ इलिमिनेसन मात्रै बटुलेर नेपाली टिम लबीबाट बाहिरियो । तेस्रो खेलमा ८ इलिमिनेसन र ५ सर्भाइबल प्वाइन्ट जोड्दा टिमको खातामा ७५ अंक भएको थियो । इरेन्गलको म्यापमा भएको चौथो खेलमा ८ इलिमिनेसनसहित चिकेन डिनर निकालेपछि डीआरएसले मुख्य टुर्नामेन्टको प्रवेश लगभग सुनिश्चित गरेको थियो । एकै दिन दुई चिकेन डिनर निकालेको नेपाली टिम दोस्रो दिनको खेल सकिँदा जम्मा ११०अंकसहित दोस्रो स्थानमा पुगेको थियो । पहिलो स्थानको भेम्पायरसँग १४३ अंक थियो ।

तेस्रो दिन नेपाली खेलाडीहरू ३३ अंक अगाडि रहेको भेम्पायरलाई उछिन्दै अलस्टार्सको ट्रफी काठमाडौं ल्याउने सपनासहित लबीमा छिरेका थिए । राम्रो खेल्दाखेल्दै पनि नतिजा उनीहरूको पक्षमा भएन । यो दिन चिकेन डिनर निकाल्न नसक्दा टोलीले ६ खेलबाट ४३ अंक थप्यो । तीन दिनमा १८ खेलबाट दुई चिकन डिनर निकालेको डीआरएसको खातामा जम्मा १५३ अंक भयो, जुन अंकले डीआरएसलाई तेस्रो बनायो । सानदार भिडन्त दिएको भेम्पायर विजेता बन्यो भने कोरियन टिम डुप्लस कियाले दोस्रो स्थान डीआरएसको हातबाट खोस्यो ।

अलस्टार्स स्टेजमा पहिलो हुने भेम्पायरले १ लाख ४० हजार डलर, डुप्लस कियाले ११५ हजार डलर र डीआरएसले ९० हजार डलरको पुरस्कार प्राप्त गरे ।

व्यक्तिगत प्रदर्शनतर्फ खेलभरि नेपाली खेलाडी किलर वाइटी (साहस भण्डारी)को धमाका चल्यो । प्रतियोगिताको सबैभन्दा मूल्यवान् खेलाडी घोषित भएका किलरले सबैभन्दा धेरै ३५ इलिमिनेसन निकालेका थिए ।

अलस्टार्समा तेस्रो भएपछि मुख्य प्रतियोगितामा डीआरएसको सिटमात्रै सुरक्षित भएको थिएन, खेलाडीको आत्मविश्वास र समर्थकको अपेक्षा दुवै ह्वात्तै बढेको थियो । तर, यो प्रतियोगितामा ‘हिमालयन घोस्ट’को उपनाम रोजेको नेपाली टिमको जादु चल्न सकेन ।

अधिकांश खेलमा किलर वाईटी बेलैमा इलिमिनेसन हुँदा डीआरएसले खराब नतिजा व्यहोर्‍यो । सुरूका दुवै दिन टिमको प्रदशर्न खराब रह्यो । तेस्रो दिन खेलाडीहरू फर्ममा फर्किएका थिए । उनीहरूले एउटा चिकेन डिनर पनि निकाले तर १८ खेलमा बटुलेको ९३ अंकले उनीहरूलाई १६ टिममध्ये ११औँ बनायो ।

अलस्टार्सको उपाधि जितेको भेम्पायरले लगातार दोस्रोपटक ट्रफी सुरक्षित गर्दै मुख्य प्रतिस्पर्धामा ४ लाख ३२ हजार डलर पुरस्कार प्राप्त गर्‍यो । यसबाहेक रेकर्ड ब्रेकिङबापत ४० हजार र उत्कृष्ट टिमको अवार्डमा १० हजार गरी थप ५० हजार डलर पनि जित्यो । यसबाहेक दुई खेलाडीले व्यक्तिगत रूपमा १०–१० हजार डलरको अवार्ड प्राप्त गरे ।

डीआएरएसले मुख्य प्रतिस्पर्धामा जितेको मध्ये ११औँ स्थानको पुरस्कार ४५ हजार, सहभागी भएबापत प्राप्त हुने ३० हजार र रेकर्ड ब्रेकिङका लागि छुट्याइएको तर कसैले नजितेको रकम दामासाहीमा बाँड्दा प्राप्त भएको २ हजार डलर गरी ७७ हजार हात पारेको हो ।

डीआरएसको टिममा रहेका रूल्ज (सुबिन प्रजापति), डेल्टा (दिपेश गुरूङ), ग्यान्टे (समीर गुरूङ) र किलर वाईटी (साहस भण्डारी) ले विश्वस्तरीय प्रतियोगितामा नेपालको प्रतिनिधित्व गरेका थिए ।

पब्जीमा अंक गणना कसरी हुन्छ ?

पीएमडब्लूआईमा सहभागी टिमले प्राप्त गर्ने स्कोर सर्भाभाइल प्वाइन्ट र इलिमिनेसन काउन्टका आधारमा हुन्छ । पब्जी ई–स्पोर्ट्सले २०२३ का लागि अंक गणनाको नयाँ तरिका ल्याएको छ, यो प्रतियोगितामा पनि यही तरिका लागू गरिएको छ ।

यसमा विपक्षी टिमको हरेक सहभागीलाई इलिमिनेट गरेबापत टिमले एक–एक अंक प्राप्त गर्नेछ । सर्भाइभल प्वाइन्ट लामो समयसम्म लबीमा जीवित रहेबापत टिमले प्राप्त गर्ने अंक हो । यसमा सबैभन्दा धेरै समय लबीमा रहने टिम चिकेन डिनर निकाल्ने टिम नै हुन्छ । यो टिमले १० सर्भाइभल प्वाइन्ट प्राप्त गर्नेछ । दोस्रो, तेस्रो र चौथो हुने टिमले क्रमशः ६, ५ र ४ अंक बटुल्नेछ । पाँचौँ र छैटौँ हुनेले ३ र २ प्राप्त गर्दा सातौँ र आठौँ हुने टिमले १–१ सर्भाइभल प्वाइन्ट प्राप्त गर्नेछन् । सुरुमा लबीबाट निस्किने ८ टोलीले भने कुनै पनि सर्भाइभल प्वाइन्ट पाउने छैनन् । सर्भाइभल र इलिमिनेसन दुवैतर्फबाट टिमले प्राप्त गरेको अंक जोडेर उक्त टिमको स्कोर निकालिन्छ ।

पीएमडब्लूआईमा हरेक दिन ६ खेल राखिएको थियो । अलस्टार्स स्टेजमा तीन दिन १८ खेल खेलाइएको थियो भने मुख्य प्रतियोगितामा पनि तीन दिनमा १८ खेल नै खेलाइएको थियो । दुवै स्टेजमा १८ खेलमा सबैभन्दा धेरै प्राप्त अंक बटुल्ने टोलीले अंक तालिकाको शीर्ष स्थानमा रहँदै विजेताको पुरस्कार प्राप्त गरेको थियो भने अंक तालिकामा यसपछि रहने टोलीहरूले क्रमशः आफ्नो स्थानअनुसारको पुरस्कार जितेका थिए ।

प्रतियोगिताको आयोजना पब्जी मोबाइल एप सञ्चालन गर्ने कम्पनीहरू क्राफ्तों र लेभल इन्फाइनाइट तथा साउदी अरेबियन गेमिङ कम्पनी गेमर्स एटले संयुक्त रूपमा गरेका हुन् । युट्युब, फेसबुक र टिकटकमा लाइभ गरिएको प्रतियोगितामा नेपाली कमेन्ट्री पनि राखिएको थियो ।

प्रकाशित मिति: मंगलबार, साउन २, २०८० ०९:२४