देउवाले किन ल्याए कांग्रेस बैठक लाइभ गर्ने प्रस्ताव ?

A+ A A-

नेपाली कांग्रेस केन्द्रीय समितिको बैठक एक वर्षपछि सुरु हुँदै छ । बैठकका १० एजेन्डाहरू तय भएका छन् । समसामयिक राजनीति, संसदीय निर्वाचन प्रतिवेदन, अनुशासन समितिको प्रतिवेदन, नीति अधिवेशन, विभागहरूको विस्तार, सांगठनिक कार्ययोजना लगायतका विषय कांग्रेसकाे केन्द्रीय समिति बैठकको एजेन्डाका रूपमा रहेका छन् ।

आवश्यकताअनुसार लम्बिने बैठकको एजेन्डाभन्दा चासो बैठकको प्रत्यक्ष प्रसारणमा छ । सभापति शेरबहादुर देउवाले बैठक प्रत्यक्ष प्रसारण गर्न प्रस्ताव गरेका छन् । सोमबार साँझ बसेको कांग्रेसका पदाधिकारी एवं पूर्व पदाधिकारीहरूको बैठकमा यसबारे सहमति जुट्न नसके पनि सभापति देउवा प्रत्यक्ष प्रसारण हुनुपर्ने पक्षमा छन् ।

पहिलो दिनको प्रत्यक्ष प्रसारणको प्रतिक्रियापछि अन्य दिनमा के गर्ने भन्ने निर्णय हुने पूर्वमहामन्त्री डा शशांक कोइराला बताउँछन् । विधान नमानेका सभापति देउवा बैठकमा जे हुन्छ, त्यही सार्वजनिक रूपमा देखाएर ‘ओपन सेक्रेट’ रूपमा आलोचना लुकाउन चाहन्छन् ।

भित्र एउटा कुरा बोल्ने बाहिर अर्को कुरा बोल्ने नेताहरूको प्रवृत्तिमा लगाम लगाउन सभापति देउवाले प्रत्यक्ष प्रसारणको जुक्ति निकालेका हुन् । देउवाको प्रस्तावमा महामन्त्री विश्वप्रकश शर्मा र सहमहामन्त्री भीष्मराज आङदेम्बे सकारात्मक छन् । महामन्त्री गगन थापा, नेताहरू कृष्णप्रसाद सिटौला, प्रकाशमान सिंह, रमेश लेखक, जीवन परियार र बद्री पाण्डे भने प्रत्यक्ष प्रसारण हुन नहुने पक्षमा छन् ।

महामन्त्री विश्वप्रकाश शर्माले बैठक लाइभ गर्ने विषय सभापतिद्वारा प्रस्ताव गरिएको तर ठोस निर्णय भइनसकेको बताए । बैठकअघि निर्णयमा पुग्ने भनिए पनि सभापतिको चाहना भएपछि त्यसको बर्खिलापमा कांग्रेसमा निर्णय हुन गाह्रो छ । सभापति देउवाको इच्छाबमोजिम कांग्रेस केन्द्रीय कार्यालयले फेसबुक पेजबाट लाइभ गर्ने प्राविधिक तयारी गरिसकेको छ ।

आलोचनाको ‘ओपन सेक्रेट’

कांग्रेस केन्द्रीय समितिमा सभापति देउवा पक्षका केन्द्रीय सदस्यहरू ८० प्रतिशतभन्दा बढी छन् । यसअघिको अभ्यास हेर्ने हो भने संस्थापनको जति नै बचाउ गरे पनि नेतृत्वको आलोचनाकै विषय हेडलाइन बन्ने गरेको छ । केही दिनअघि केन्द्रीय समिति बैठकबारे आफूनिकट नेताहरूसँग देउवाले सल्लाह गरेका थिए । नेतृत्वको कडा आलोचना हुने बुझाइ नेताहरूमा थियो । आलोचना मिडियाको प्राथमिकतामा पर्दा नेतृत्वलाई समस्या हुने सुझाव नेताहरूले दिए ।

देउवा आफूलाई भएको समर्थन सार्वजनिक गर्न चाहन्छन् । वैधानिक प्रक्रियाबाट आएको नेतृत्व र अंकगणित भए पनि चर्को आलोचना भएपछि बैठक प्रत्यक्ष प्रसारण गरेर आलोचकको मनोबल कमजोर पार्न चाहन्छन् देउवा । अनौपचारिक रूपमा संसदीय दलको नेताबाट हटाउने र राजीनामासमेत माग गरिएको बेलामा बैठककाे प्रत्यक्ष प्रसारण गरेर काउन्टर अट्याक गर्ने देउवाकाे रणनीति छ ।

संस्थापन पक्षका केन्द्रीय सदस्यहरूले विभिन्न चरणमा छलफल गरेर बैठकको तयारी गरेका छन् । ‘पब्लिक स्पेस’ पाउने गरेका महामन्त्रीद्वय शर्मा र थापा आक्रामक रूपमा प्रस्तुत हुने तयारीमा छन् । थापाले संसदीय दलको नेताबाट देउवालाई हटाउनुपर्ने बताउँदै आएका छन् । सर्वाजनिक खपतका लागि भाषण गर्ने गरेको आरोप लागेका थापा बैठकमा रणनीतिक हिसाबले प्रस्तुत हुनेछन् । त्यसकाे काउन्टर गर्न महामन्त्रीहरूको कमजोरी केलाउने संस्थापन पक्षका नेताहरूकाे तयारी छ ।

‘यसपटकको बैठकको माहाैल अघिल्लो बैठकभन्दा धेरै भिन्न हुने छ । नेतृत्वविरुद्ध अस्वाभाविक खेदो खन्ने प्रवृत्ति हामी सहन्नौँ । प्रश्न सभापतिलाई मात्रै होइन महामन्त्रीहरूलाई नि गर्न पाइन्छ होला नि,’ संस्थापन तर्फका एक केन्द्रीय सदस्यले भने ।

रणनीतिक रूपमा बैठकको प्रत्यक्ष प्रसारण गर्न खोजिएको बुझेका संस्थापनइतर पक्षका नेताहरू भने त्यसले पारदर्शीता बढाउने बताउँछन् । ‘लाइभ हुँदा क–कसले पार्टी र जनताको बर्खिलापमा धारणा राख्छन् थाहा हुन्छ,’ संस्थापनइतर समूहका एक नेताले भने ।

कांग्रेसभित्र संस्थापनइतर पक्षले भ्रष्टाचारमा संलग्न नेतालाई कारबाही गर्नुपर्ने, विधानको अक्षरशः पालना हुनुपर्ने, भ्रातृ संस्था र विभागहरूलाई पूर्णता दिएर क्रियाशील बनाउनुपर्ने, सरकारका मन्त्रीहरूको काम गराई पार्टी र जनताको हितमा हुनुपर्नेलगायतका एजेन्डा उठाउने तयारी गरेकाे छ । संघ र प्रदेशमा पार्टी सरकारमा रहँदा पनि काम प्रभावकारी नभएको विषय पनि बैठकमा उठ्नेछ ।

प्रकाशित मिति: मंगलबार, साउन २, २०८० ०७:४०