कांग्रेस केन्द्रीय समिति बैठकमा मन्त्रीहरूको 'पर्फर्मेन्स' खाेजिने

A+ A A-

कांग्रेसबाट सरकारमा गएका दुई जना मन्त्रीहरू पछिल्लो समय विवादमा तानिए । त्यसमध्ये एक हो राष्ट्रियसभामा आफूले पेस गरेको विधेयकका बारेमा उद्योगमन्त्री रमेश रिजाललाई थाहै नहुनु । असार २८ गते राष्ट्रियसभामा विद्युतीय व्यापारका सम्बन्धमा व्यवस्था गर्न बनेको विधेयकमाथि विचार गरियोस् भन्ने प्रस्तावमाथि छलफल हुँदा मन्त्री रिजाल मात्र नभई सांसदहरूले पनि विधेयककाे व्यवस्था नबुझी अर्कै विषयमा धारणा राखे ।

जबकि उद्योगमन्त्री रिजालले नै असार १२ मा संसद सचिवालयमा विद्युतीय व्यापारसम्बन्धी विधेयक दर्ता गरेका थिए । छलफलमा सांसदले उठाएका प्रश्नको जवाफ दिने क्रममा मन्त्री रिजालले विद्युत् बिक्रीसम्बन्धी व्याख्या गरे । कुन विधेयक ल्याइएको भन्ने जानकारीसमेत मन्त्रीले राखेका थिएनन् । सदस्यहरूले बिजुली व्यापारको विषयमा बहस गरे । यसले सांसद र मन्त्रीहरू विधेयक पढ्दै नपढी र कुरै नबुझी बोल्छन् भन्ने देखाउँछ ।

अर्को हो, स्वास्थ्यमन्त्री मोहन बस्नेतको अभिव्यक्ति । असार अन्तिम साता स्वास्थ्य तथा जनसंख्यामन्त्री बस्नेत आफ्नो अभिव्यक्तिलाई लिएर विवादमा तानिए । मन्त्रालयमा आयोजित पत्रकार सम्मेलनमा उनले मन्त्रालयले खटाएको कार्यक्षेत्रमा नजाने कर्मचारीको सरुवा फिर्ता नहुने बताउँदै बरु आत्महत्याका लागि डोरी दिन सकिने तर सरुवा फिर्ता गर्न नसकिने भनेपछि उनी विवादित बनेका हुन् ।

सरुवा फिर्ताका लागि एक कर्मचारीले मन्त्रालयका सचिवसँग आएर दंग्याएको, घुर्क्याएको बताउँदै उनले भनेका थिए, ‘उहाँले केही गर्न पर्‍याे, आत्महत्या गर्छु भन्नुभयो (सचिवको भनाइ) । उसोभए डोरी लग्दिनुस् भनेँ मैले । डोरी लग्दिनुस्, सचिवज्यूहरूकोमा झुण्डिन अप्ठ्यारो लाग्यो भने मन्त्रीज्यूको गेटमा गएर झुण्डिनुस् भन्दिनू भनेँ मैले । उहाँले (सचिवले) त्यो भनेपछि खुरुक्क उठेर हिँड्नुभयो ।’

मन्त्रीजस्तो जिम्मेवार पदमा रहेको व्यक्तिले नै आत्महत्यालाई प्रोत्साहन गर्ने अभिव्यक्ति दिएको उनीमाथि आरोप लागेको छ ।

०००

मन्त्रीहरू विवादमा तानिरहँदा सत्तारुढ दल नेपाली कांग्रेसभित्र मन्त्रीहरूको खोजी भएको छ । सरकारमा कांग्रेसका तर्फबाट ९ जना मन्त्री भए पनि सरकारमा भएको अनुभूति माओवादीका मन्त्रीहरूले मात्र गरेको भन्दै कांग्रेसकाे संस्थापनइतर समूहले साउन २ गते हुने केन्द्रीय समिति बैठकमा मन्त्रीहरूले गरेका कामको खोजी गर्ने भएकाे हाे । संघीय सरकारका मन्त्रीहरू मात्र नभै प्रदेश सरकार र त्यहाँका मन्त्रीहरूको कार्य मूल्याकंन र हिसाब पनि खाेजिनेछ ।

सरकारमा कांग्रेसले ९ मन्त्रालय पाएको छ । पूर्णबहादुर खड्का उपप्रधानमन्त्रीसहित रक्षा, धनराज गुरुङ कानुन, प्रकाशशरण महत अर्थ, एनपी साउद परराष्ट्र, मोहन बस्नेत स्वास्थ्य, रमेश रिजाल उद्योग, सीता गुरुङ शहरी विकास, डिगबहादुर लिम्बू युवा तथा खेलकुद र सुरेन्द्रराज आचार्य महिला तथा बालकालिका मन्त्री छन् ।

संस्थापन पक्षबाट महामन्त्री गगन थापा सहितका पदाधिकारीको काम प्रति असन्तुष्टि प्रस्तुत हुनेछ भने इतर समूहले नेतृत्व र सरकारका मन्त्रीहरूको कामको हिसाब खोज्ने कांग्रेस नेताहरू बताउँछन् ।

‘सरकारमा धेरै मन्त्रालय कांग्रेसले लिएको छ । तर मन्त्रीहरूको काम हेर्दा माओवादीका मन्त्रीहरू मात्र सरकारमा छन् भन्ने देखिन्छ । कांग्रेसका मन्त्री कहाँ छन् ?,’ इतर समूहका एक नेताले शिलापत्रसँग भने ।

माओवादीबाट गृहमन्त्री नारायणकाजी श्रेष्ठ र संस्कृतिमन्त्री सुदन किराँतीको काम मात्र मन्त्रीजस्तो देखिएको ती नेताले बताए । दुई मन्त्रीबाहेक अन्य मन्त्रीको काम नदेखिएको प्रसंग माओवादीभित्र पनि उठ्ने गरेको छ ।

केन्द्रीय समिति बैठकमा एजेन्डाभन्दा बाहिर रहेर भए पनि मन्त्रीहरूको कामको खोजी हुनेछ । ‘पार्टीबाट मन्त्री भएर गएका व्यक्तिहरूको काम कारबाही भूमिका सम्बन्धमा साथीहरू केही केही प्रश्न उठाउनुभएको छ । प्रस्तावको रूपमा त नआऊला । अनौपचारिक प्रस्तावको रूपमा छलफल हुन्छ,’ कांग्रेस प्रचार विभाग प्रमुख मीन विश्वकर्माले शिलापत्रसँग भने, ‘यसबारेमा कसरी अघि बढ्छ भन्ने कुरा छलफल गरेपछि मात्र थाहा हुने हो ।’

अर्थमन्त्री महत, परराष्ट्रमन्त्री साउद र स्वास्थ्यमन्त्री बस्नेत अहिले देश बाहिर छन् ।

मन्त्री बस्नेतले एक प्रसंगमा भनिएको कुरा अर्को रूपमा व्याख्या भएको उनीनिकट नेताहरू बताउँछन् । 'कर्मचारीले भनेजस्तो ठाउँमा पदस्थापन भएन भने काम गर्दैनौँ भनेर कहाँ पाइन्छ ? भन्ने प्रसंगअुनसार कुरा भएको हो । मन्त्रालयको प्रेस मिट त प्रत्यक्ष प्रसारण भएको छ । हेरे हुन्छ । जागिर खाएर कसैले घुर्की लगाएर हुँदैन नि ! कि काम गर्नुपर्‍यो कि जागिर छोड्नुपर्‍यो । प्रसंग बुझ्नुपर्‍यो,’ उनीनिकट एक नेताले शिलापत्रसँग भने ।

स्वास्थ्य मन्त्रालयमा योजनाअनुसार काम भैरहेको दाबी छ । ३ हजार ५ सय बेड नि:शुल्क उपलब्ध गराउनु, वीर अस्पतालमा ओपीडी सेवा ८ बजेबाट सुरु हुनु, नीति गत सुधारका कामहरू अघि बढ्नुलगायतका कामहरू अघि बढेका छन् । ‘निजी लगानीमा डाक्टरहरूको स्वास्थ्य संस्था होला । पहिला १० बजे मात्र ओपीडी खोल्दा उहाँहरू बिहान र बेलुका बाहिर व्यस्त हुनुहुन्थो । अब बेलुका मात्र व्यस्त हुनुहुन्छ । यसले अस्पतालमा गुणस्तर बढाएको छ,’ ती नेताले भने । मन्त्री बस्नेतले अनुगमनका कामहरू पनि बढाएका छन् ।

‘हाम्रो पार्टीभित्र पनि फलानोले राम्रो काम गरेर मभन्दा पपुलर हुन्छ भन्ने होला । कांग्रेसबाट देखिने गरी काम गरेको त स्वास्थ्यले नै हो नि,’ ती नेताले भने ।

मन्त्रालयमा आएर शतप्रतिशत काम भैरहेको महिला तथा बालबालिकामन्त्री आचार्य बताउँछन् । ‘बजेटको हिसाबले ठूलो मन्त्रालय होइन यो । म अन्य मन्त्रीको तुलनामा पछि आएँ । मन्त्रालयले गर्नुपर्ने काम अघि बढाएको छ । नयाँ परिवर्तन होला भन्ने आशा छ । मेरो कार्यकालमा केही न केही परिवर्तन भएको महसुस गराउनेछु,’ मन्त्री आचार्यले शिलापत्रसँग भने ।

कानुनमन्त्री गुरुङले न्यायाधीश नियुक्तिमा समेत उल्झन निकालेको आरोप छ । त्यसमा उनले आफ्नो भूमिका नरहेको र परिस्थितिले त्यस्तो देखिएको बताउँदै आएका छन् ।

उपत्यकाको फोहोर व्यवस्थापनमा अग्रसरता लिएकी शहरी विकास मन्त्रीलाई सोमबारबाट धादिङको धुनिबेशी नगरपालिका र नुवाकोटको ककनी गाउँपालिकाको सिमानामा पर्ने बञ्चरेडाँडाको ल्यान्डफिल साइटमा स्थानीयले फोहोर पाल्न अवरोध गरेका छन् ।

अर्थमन्त्री महतलाई सीमित जिल्लामा मात्र बजेट छुट्याएको र समानुपातिक वितरण नगरेकाे आरोप छ ।

प्रकाशित मिति: सोमबार, साउन १, २०८० १३:२६