सदनको अवरोध हटाउने सिंहदरबारमा सहमति, बानेश्वर नपुग्दै भंग

A+ A A-

सदनको अवरोध हटाउने विषयमा एमाले, माओवादी केन्द्र र कांग्रेस शीर्ष नेतृत्वबीच आइतबार सिंहदरबारमा भएको सहमति संसद भवन बानेश्वर नपुग्दै भंग भएको छ ।

संसद बैठक बस्नुअघि सदनको अवरोध हटाउने विषयमा सिंहदरबारमा प्रधानमन्त्री पुष्पकमल दाहाल प्रचण्ड, कांग्रेस सभापति शेरबहादुर देउवा र प्रमुख प्रतिपक्षी दल एमालेका अध्यक्ष केपी ओलीबीच सहमति भएको थियो ।

तर, सहमति भएको एक घण्टा पनि नपुग्दै भंग भएको छ । ‘शीर्ष नेता बसेर अवरोध हटाउने सहमति भयो । प्रधानमन्त्रीले स्पष्ट पार्ने भनेपछि हामी संसद भवन पुग्यौँ । तर, प्रमुख प्रतिपक्षी दलका नेता (केपी ओली) ले नमिल्ने खबर गर्नुभयो । उहाँ किन मिल्नुभयो, किन ब्याक हुनुभयो थाहा छैन,’ माओवादीका प्रमुख सचेतक हितराज पाण्डेले शिलापत्रसँग भने ।

बैठकका लागि सांसदहरू संसद भवन पुगेका थिए तर सूचना टाँसियो– बैठक सोमबार ३ बजे बस्ने भनेर । त्यसपछि सांसदहरू नै अलमलमा परे । संसद भवनमा सभामुखको कार्यकक्षमा रहेका एक सांसदले भने, ‘शीर्ष नेताहरूबीच कुरा मिलेकै रहेनछ । प्रधानमन्त्रीले बोलिसकेपछि के गर्ने भन्नेमा एमाले अलमलमा रहेछ ।’

प्रमुख प्रतिपक्षी दल एमालेका प्रमुख सचेतक पदम गिरी प्रधानमन्त्री पुष्पकमल दाहाल प्रचण्डको आग्रहमा बैठक सारिएको बताउँछन् । ‘प्रधानमन्त्रीले कमीकमजोरीको आत्मलोचना गर्ने र दलहरूलाई विश्वास दिलाउने सहमति भएको थियो । उहाँ (प्रधानमन्त्री)ले सार्न भनेपछि भोलिसम्मका लागि सारिएको हो,’ उनले भने ।

तर, माओवादी प्रमुख सचेतक पाण्डे प्रधानमन्त्रीको आग्रहमा स्थगित नगरिएको बताउँछन् । ‘प्रधानमन्त्रीको आग्रहमा स्थगित गरिएको होइन । उहाँहरूले राजीनामा माग्नुभएको थियो । सत्तापक्षबाट प्रधानमन्त्रीको राजीनामा होइन, स्पष्ट पार्ने भनेको हो । प्रधामन्त्री पनि तयार हुनुहुन्थ्यो । प्रतिपक्षी दलको नेता मान्नु भएन,’ पाण्डेले भने ।

स्रोतका अनुसार प्रधानमन्त्री प्रचण्डले रोस्ट्रमबाट माफी माग्नुपर्ने सर्त एमालेले राखेपछि प्रधानमन्त्री प्रचण्ड तयार भएनन् । प्रधानन्त्रीले आफूले बोलेको बारेमा स्पष्ट पार्ने तर माफी नमाग्ने भनेपछि एमाले ब्याक भएको हो ।

संसद भवन स्रोतका अनुसार प्रधानमन्त्रीले बोल्ने विषयमा सबै दलको सहमति हुने गरी आउनुपर्ने भएकाले प्रधानमन्त्रीले तयारी गर्न समय मागेपछि बैठक सारिएको हो । ‘शीर्ष नेताबीच मौखिम सहमति भयो । तर, प्रधानमन्त्रीले बोल्ने ‘कन्टेन्ट’मा मिल्न सकेन । प्रधानमन्त्रीले तयारी गर्न समय माग्नुभएको हो,’ स्रोतले भन्यो ।

एमालेले फेरि प्रधानमन्त्री प्रचण्डको सचिवालयले जारी गरेको विज्ञप्ति पनि फिर्ता लिनुपर्ने माग राखेको छ । गत असार २१ मा प्रधानमन्त्रीका प्रेस सल्लाहकार गोविन्द आचार्यले जारी गरेको विज्ञप्ति फिर्ता गर्नुपर्ने माग एमालेको छ । ‘प्रधानमन्त्रीको सचिवालयले २१ गते निकालेको विज्ञप्ति फिर्ता लिनुपर्ने एमालेले अर्को सर्त राखेको छ,’ एक सांसदले भने ।

राष्ट्रिय स्वतन्त्र पार्टीले भने प्रधामनन्त्रीलाई आफ्नो अभिव्यक्तिबारे स्पट पार्न दिनुपर्ने र सदन सञ्चालन गर्नुपर्ने बताउँदै आएको छ । ‘प्रधानमन्त्रीको अभिव्यक्ति आपत्तिजनक छ । स्पष्ट पार्न दिनुपर्छ । उहाँको जवाफ आएपछि सदन सञ्चालन गर्नुपर्छ,’ रास्वपाका प्रमुख सचेतक सन्तोष परियारले भने । प्रधानमन्त्रीको राजीनामा माग गर्दै आएको राप्रपा पनि लचक भएको छ ।

‘प्रधानमन्त्रीलाई स्पष्ट पार्न दिनुपर्छ । उहाँले आफ्नो कुरा राखेपछि के गर्ने भनेर निर्णय गर्ने हो,’ राप्रपाका प्रमुख सचेतक ज्ञानेन्द्र शाहीले भने । गत १८ असारमा भारतीय नागरिक प्रितम सिहंले आफूलाई प्रधानमन्त्री बनाउन भारत गएको, यहाँका पार्टी र नेतासँग पनि छलफल गरेको भनी प्रधानमन्त्री प्रचण्डले दिएको अभिव्यक्तिलाई लिएर प्रमुख प्रतिपक्षी दल एमालेले सदन अवरुद्ध गर्दै आएको छ ।

प्रकाशित मिति: आइतबार, असार २४, २०८० १६:४७