सत्तापक्ष र प्रतिपक्षको लडाइँले संसद बन्धक, किन प्रधानमन्त्रीको राजीनामा मागिरहेको छ एमाले ?

सत्तापक्ष र प्रतिपक्षको लडाइँले संसद बन्धक, किन प्रधानमन्त्रीको राजीनामा मागिरहेको छ एमाले ?

A+ A A-

‘उहाँले एक पटक मलाई प्रधानमन्त्री बनाउन धेरै मिहिनेत गर्नुभयो । धेरै पटक दिल्ली जानुभयो । काठमाडौंमा पार्टी नेताहरूसँग पनि लगातार छलफल गर्नुभयो,’ प्रधानन्त्री पुष्पकामल दाहाल प्रचण्डले १८ असारमा एक पुस्तक विमोचनमा दिएको यो विवादास्पद अभिव्यक्तिले तीन दिनयता संसद अवरुद्ध छ ।

कार्यक्रममा प्रधानमन्त्री प्रचण्डले भारतीय नागरिक प्रितम सिंहले प्रधानमन्त्री बनाउन खेलेको भूमिकाको प्रशंसा गरेका थिए । प्रधानमन्त्री प्रचण्डको उक्त अभिव्यक्ति असंवैधानिक रहेको निष्कर्ष निकाल्दै प्रमुख प्रतिपक्षी एमालेले राजीनामालाई बटमलाइन बनाएको छ ।

‘राजीनामा नदिएसम्म संसदको अन्य प्रक्रिया अगाडि बढ्न सक्दैन,’ एमाले सचेतक महेश बर्तौलाले भने, ‘देशको राष्ट्रिय स्वाभिमानमा खतरामा पर्ने भएपछि प्रधानमन्त्रीलाई किमार्थ स्वीकार गर्न सक्दैनौँ ।’ संसद त बन्धक भयो नि भन्ने प्रश्नमा उनी यसको जिम्मेवार सरकार भएको तर्क गर्छन् ।

‘राष्ट्रिय हितमा प्रधानमन्त्रीको अभिव्यक्तिले शीर निहुरिएको छ । प्रधानमन्त्री भारतबाट बन्ने सन्देश गएको छ,’ बर्तौलाले भने, ‘सरकारले नै संसद बन्दक बनायो, प्रतिपक्षीसँग छलफल र संवादभन्दा पनि द्वन्द्वमा लैजान खोजियो ।’

सरकार ढलाउन वा एमालेले सरकारमा जान संसद अवरुद्ध नगरेको बताउँछन् उनी । ‘राष्ट्रियताका सवालमा एमालेले कसैसँग मोलमलाइ र लेनदेन गर्दैन । गठबन्धनबाट अरु जो प्रधानमन्त्री बने पनि भयो,’ बर्तौला भन्छन् । तर, सत्तापक्षले भने प्रधानमन्त्री प्रचण्डले आफूले बोलेको विषयमा स्पष्ट पार्न समय दिनुपर्ने बताउँदै आएको छ ।

सत्तारुढ दलहरूको संयुक्त बैठकले सदनमै ‘फेस’ गर्ने निर्णय नै गरेको छ । ‘बाटोमा राजीनामा मागेर प्रधानमन्त्रीको राजीनामा आउँदैन । यो राजीनामाको विषय होइन,’ माओवादी केन्द्रका सांसद देवेन्द्र पौडेल भन्छन्, ‘सत्तारुढ दलभित्र एक मत छ ।’ प्रतिपक्षी दलकै कारण संसद बैठक बस्न नसकेको निष्कर्ष सत्तारुढ दलको छ । ‘हाम्रो कारण होइन, एमालेका कारण संसद अवरुद्ध भएको हो,’ पौडेलले भने ।

सत्ता साझेदार दल कांग्रेस पनि प्रधानमन्त्री प्रचण्डलाई सदनमा स्पष्ट पार्न दिनुपर्ने बताउँछ । ‘प्रधानमन्त्रीले बोलेको कुरालाई सदनमा स्पष्ट पार्न दिनुपर्छ, ' कांग्रेस संसद रामहरि खतिवडा प्रश्न गर्छन्, ‘केपी ओली प्रधानमन्त्री बन्नु पहिले नै प्रदीप ज्ञवालीलाई दूत बनाएर भारत पठाएको र सामन्त गोयलसँग गोप्य भेटघाट गरेको के हो ?’

अर्को प्रतिपक्षी दल राप्रपा पनि एमालेजस्तै प्रधानमन्त्रीले राजीनामा दिनुपर्ने अडानमा छ । ‘भारतले बनाएको प्रधानमन्त्रीले राजीनामा दिनुपर्छ । देश, जनता, संसद र सांसदको शीर निहुरिएको छ,’ राप्रपाका प्रमुख सचेतक ज्ञानबहादुर शाहीले भने ।

अर्को प्रतिपक्षी दल रास्वपा प्रधानमन्त्रीलाई स्पष्ट पार्न दिनुपर्ने बताउँछ । ‘सदन अवरुद्ध होइन, प्रधानमन्त्रीले स्पष्टीकरण दिएर सदनको काम कारबाही अगाडि बढाउनुपर्छ । प्रधानमन्त्रीको अभिव्यक्ति आपत्तिजनक छ । संविधानलाई अवमूल्यन गरिएको छ । संसदीय व्यवस्था, सार्वभौमिकता, सांसद र सदनलाई चुनौती खडा गरिएको छ । प्रधानमन्त्रीले गल्ती महसुस गर्नुपर्छ,’ रास्वपाका प्रमुख सचेतक सन्तोष परियारले भने ।

यसरी सत्तापक्ष र प्रतिपक्षी दल आमुनेसामुने भएपछि बुधबारदेखि प्रतिनिधिसभा र राष्ट्रियसभाको बैठक बस्न सकेको छैन । शुक्रबार राष्ट्रियसभाको बैठक बसे पनि एमालेले अवरोध कायम राखेपछि प्रक्रिया अगाडि बढ्न सकेन । र, राष्ट्रियसभा अध्यक्ष गणेशप्रसाद तिमिल्सिनाले आइतबारसम्मका लागि बैठक स्थगित गरे ।

उता, शुक्रबार तीन बजेका लागि बोलाइएको प्रतिनिधिसभाको बैठक सत्तापक्ष र प्रतिपक्षी दल आ-आफ्नै अडान रहेपछि सभामुख देवराज घिमिरेले सूचना टाँसेर आइतबारसम्मका लागि बैठक स्थगित गरे । कार्यव्यवस्था परामर्श समितिको बैठकमा सभामुख घिमिरेले सहमतिका लागि गरेको प्रयास निरर्थक बन्यो । उनले पर्सि (आइतबार) सम्म सहमति गर्न दलहरूलाई समय दिएका छन् ।

‘सत्तापक्ष र प्रमुख विपक्षीबीच घनिभूत छलफल गरेर भोलिसम्ममा सहमति गर्नुहोला । संसद अवरुद्ध हुँदा विधेयक (खासगरी मिटरब्याज सम्बन्धी) निष्क्रिय हुनु राम्रो होइन । तपाईंहरू एउटा निष्कर्षमा पुग्नैपर्छ । त्यसका लागि सहजीकरण गर्न म तयार छु,’ सभामुख घिमिरेले भने ।