भारत र पाकिस्तानलाई जाेड्ने सचिन-सीमाकाे प्रेममा काठमाडौं कनेक्सन

A+ A A-

भनिन्छ- साँचो प्रेममा कुनै सीमा, जात र भाषा बाधक हुँदैन । त्यसैको एउटा उदाहरण बनेका छन्– पाकिस्तानी महिला सीमा गुलाम हैदर र भारतीय नागरिक सचिन मीणा ।

भारतकाे नोएडामा सचिनको एउटा सानो कोठा, ओछ्यानबिनाका दुईवटा खाट, अगाडि भित्ताको छेउमा सजाएर राखिएका छवटा कप र छवटा कचौरा, केही मसलाका बक्सा र केही आवश्यक सामानहरू । त्यही चार किल्ला सीमा र सचिनको संसार बन्यो ।

आश्चर्यको कुरा त के छ भने सीमा गुलामसँग बस्न सचिन पाकिस्तान पुग्नुपर्ने थियाे । तर, सीमा आफ्ना चार सन्तानसहित सचिन मीणासँग बस्न काठमाडाैं हुँदै करिब दुई महिनाअघि नोएडा पुगेकी हुन् । त्यो पनि भिसाबिनै ।

सीमालाई सचिनसँगको प्रेम भाैतिक रूपमा भेटघाट र चिनजानले पलाएको थिएन । ‘पब्जी गेम’ खेल्दै गर्दा उनीहरू प्रेममा परे । अनि, एकअर्काबिना बाँच्नै नसक्ने अवस्थामा पुगे । त्यसैले सीमा आफ्ना चार सन्तानसहित नेपाललाई ट्रान्टिज बनाउँदै भिसाबिना सीमा पार गरेर सचिन कहाँ बस्न पुगेकी हुन् ।

सन् २०१४ को फेब्रुअरीमा सीमाको विवाह पाकिस्तानको सिन्ध प्रान्तका गुलाम हैदरसँग भएको थियो । उनका तीन छोरा र एक छोरीसमेत छन् । कराचीमा टायल लगाउने काम गर्ने गुलाम हैदर कामका लागि सन् २०१९ मा साउदी अरब हनिए । श्रीमान् विदेसिएपछि सीमा एक्ली भइन्, जसका कारण उनी पब्जी गेम खेल्न पुगिन् ।

पब्जी खेल्दाखेल्दै उनको उत्तर प्रदेश ग्रेटर नोएडामा बस्ने सचिन मीणासँग सम्पर्क हुन पुगेको हो । दुवैले एकअर्काको नम्बर साटासाट गरे र घण्टौ फोनमा कुरा गर्न थाले । करिब तीन वर्षसम्म दुवैको प्रेम साटासाट फोनमार्फत नै हुन्थ्यो ।अन्ततः सीमा सचिन मीणाबाहेक पाकिस्तान बस्नै नसक्ने अवस्थामा पुगिन् ।

सीमा यसरी पुगिन् नोएडा

पाकिस्तान छोड्ने अवस्थामा पुगेकी सीमालाई सीमापार भारत पुग्न सहज थिएन । पाकिस्तानी नागरिकलाई भारत आउन भिसा आवश्यक पर्छ । अझ भारतले पाकिस्तानी नागरिकलाई त्यति सहजै भिसा दिँदैन । त्यही डरले उनले सचिन भेट्न भारत पुग्ने सहज गन्तव्य नेपाललाई बनाइन् । सीमा गुलाम हैदर नेपालको पर्यटक भिसा लिएर ९ चैत २०७९ मा यूएईकाे शारजाह हुँदै काठमाडौं हानिइन् ।

त्यतिबेला सीमा पाकिस्तानबाट एक्लै काठमाडौं पुगेकी थिइन् । सीमालाई भेट्न सचिन पनि काठमाडौं नै आए । १० चैतमा उनीहरूबीच काठमाडौंमा भेट भयो । उनीहरूले काठमाडौंमा एक हप्ता बिताएका थिए । एक हप्तापछि भने सीमा फेरि पाकिस्तान फर्किइन् ।

पाकिस्तान फर्केपछि सीमाले आफ्नो नाममा रहेको जग्गा बेचिन् । उनले १२ लाखमा उक्त जग्गा बिक्री गरिन् । असार पहिलो साता पाकिस्तान छोड्दा भने सीमा आफ्ना चार नाबालक छोराछोरीसहित फेरि पर्यटक भिसामै काठमाडौं आइन् ।

सचिन र सीमाबीच दोस्रोपटक पनि काठमाडौंमै भेट भयो । उनीहरू काठमाडौंबाट पोखरासमेत घुम्न पुगे । यसरी दोस्रोपटक काठमाडौं पुगेकी सीमा पाकिस्तान नफर्की भारत गइन् । सचिनसँगै सीमा नाबालक छोराछोरीसहित काठमाडौंबाट बसमार्फत भारत पुगिन् ।

अनि परिन् भारतीय प्रहरीको फन्दामा

सचिन र सीमाले सजाएको नोएडाको सुन्दर सपना कोठा भने केही दिनदेखि खाली छ । सीमा र सचिनको पवित्र प्रेमकथाभित्र भारतीय प्रहरी तगारो बनिदियो । प्रहरीले दुवैलाई पक्राउ गरेको छ । सीमा गुलाममाथि बिना भिसा भारत पुगेको अभियोग लागेको छ ।

सीमा नोएडा पुग्नु दुई दिनअघि १३ मेमा सचिनले रबुपुराको अम्बेडकर टाेलमा रहेको गिर्जेशको घरमा कोठा भाडामा लिएका थिए । उक्त कोठाको उनीहरूले २ हजार ५०० रुपैयाँ भाडा तिर्ने गरेको खुलेको छ । सचिनले सीमा उत्तर प्रदेशको शिकारपुरकी बासिन्दा रहेको र आफूले कानुनी विवाहबारे तयारी गरेको बताएका थिए । त्यसैले सीमा गुलाम हैदरको धर्म र नागरिकतामा घरबेटीले कहिल्यै शंका गरेनन् ।

त्यसको कारण उनको जीवनशैली थियो । सचिन र सीमा चार छोराछोरीसँग त्यही कोठामा बस्न थालेका थिए । सचिन नजिकैको किराना पसलमा छ हजार रुपैयाँमा कामसमेत गर्न थालेका थिए । सचिनको आफ्नै घर रबुपुरा शहरमा छ । मालीको काम गर्ने उनका बुबा भाडाको कोठामै बस्छन् । आरामले कोठामा बसेका सीमा र सचिन १ जुलाई अर्थात् (१६ असार) भने हतारहतार आफ्नो सामान प्याक गरेर कोठाबाट भागे ।

प्रहरीले आफूहरूलाई खोजिरहेको सूचना पाएपछि उनीहरू भागेका थिए । तर, हरियाणा प्रहरीले उनीहरूलाई ४ जुलाई (१९ असार) मा पक्राउ गरेको छ । सचिन मात्रै हाेइन, प्रहरीले सचिनका बुबा नेत्रपाल मीणालाई समेत पक्राउ गरेको छ ।

प्रहरीले उनीहरूमाथि विदेशी राहदानी कानुन मुद्दा दर्ता गराएको छ । उनीहरू अहिले प्रहरी थुनामा छन् । तर, उनीहरूको आशा हराएको छैन । दुवैले एकअर्कालाई असाध्यै माया गर्ने भन्दै विवाहका लागि बाटो खोलिदिन सरकारसँग माग गरेका छन् । प्रहरीले भने सीमा पाकिस्तानकी गुप्तचर हुन् कि भन्ने आशंकामा अनुसन्धान गरिरहेकाे छ ।

सीमा काठमाडाैंमा रहँदा कहाँ बसिन् र के गरिन् भन्ने विषयमा नेपाल प्रहरीलाई भने कुनै जानकारी छैन । तर, भारतीय प्रहरीले भने याे घटनापछि नेपाल-भारत बस सेवाको जाँचमा कडाइ गरेको छ । तेस्राे मुलुकका नागरिक नेपाल हुँदै सहज रूपमा भारत प्रवेश गर्न थालेपछि भारतीय प्रहरीले सीमामा कडाइ गरेकाे भारतीय सञ्चारमाध्यमहरूले जनाएका छन् ।

-यो सामग्री बीबीसीकाे सहयाेगमा तयार पारिएको हो ।

प्रकाशित मिति: बिहीबार, असार २१, २०८० १७:३१