बार र कर्मचारीको लफडाले अदालतका सेवाग्राही मर्कामा, देशभर वकिलले गरे बेन्च बहिष्कार

बार र कर्मचारीको लफडाले अदालतका सेवाग्राही मर्कामा, देशभर वकिलले गरे बेन्च बहिष्कार

A+ A A-

जिल्ला अदालत ललितपुरकी नायब सुब्बा प्रेमिका तमाङ र कानुन व्यवसायी अमिर लामिछानेबीच असार १३ गते भएको लफडाले सिङ्गो न्याय क्षेत्र प्रभावित बनेको छ । सोमबार नेपाल बार एसोसिएसनले देशभर बेन्च बहिष्कार गर्‍यो । काठमाडौं उपत्यकालगायत विभिन्न जिल्लामा कानुन व्यवसायीहरूले प्रदर्शन गरेका छन् ।

त्यसअघि देशभर अदालतका कर्मचारीहरू आन्दोलित भएका थिए । आइतबार न्याय सेवाका कर्मचारीले दिउँसो साढे १ बजेसम्म पेनडाउन गर्दा त्यतिबेलासम्म जिल्लादेखि सर्वोच्च अदालतसम्म नै इजलास बस्न सकेको थिएन ।

अधिवक्ता लामिछाने बिहीबार पक्राउ परेका थिए । उनलाई थुनामा राखिएको विषयलाई लिएर बारले आइतबार पनि काठमाडौं उपत्यकाका तीनवटै जिल्ला अदालत र उच्च अदालतका इजलास बहिष्कार गरेको थियो । त्यसपछि साधारण तारेखमा लामिछाने थुनामुक्त भए ।

सेवा लिन गएका कानुन व्यवसायीमाथि कर्मचारीबाट हातपात भएको तर उल्टै उनीमाथि झुटा मुद्दा लगाइएको भन्दै अदालतअघि बारको प्रदर्शन सोमबार पनि भयो ।

हेटौँडामा इजलास बहिष्कार गर्दै कानुन व्यवसायी आन्दोलित

असल र इमानदार न्यायाधीश र कर्मचारीहरूसमेत पलपल बेचिएको आरोप लागेको र अब खुलमखुल्ला आक्रमण र धम्की आउन थालेको सर्वोच्च अदालत आधिकारिक ट्रेड युनियनका सचिव हरि भट्टराईले बताए । ‘कर्मचारी होस् वा वकिल, यसको खास्टो ओढ्दैमा आपराधिक कार्यबाट उन्मुक्ति पाउन कसैले पनि सक्दैन । कर्मचारीले गल्ती गरेको भए कानुनी उपचारमा जान पाउँछन्, जानुपर्छ,’ उनले भने, ‘हामी अदालत परिसरभित्र कर्मचारी, वकिल, सेवाग्राही जोसुकै भए पनि सबैको सुरक्षाको ग्यारेन्टी चाहन्छौँ । दुइटा दाँत भाँचिएको घटनालाई ठीक हो भन्दै रोइलो नगर्दा हुन्छ । के कर्मचारीले कानुनी उपचारसमेत माग गर्न नपाउने हो ?’

karmachari sarlahi 11688391118.jpg

अदालतको फाँटमा रहेको फाइल हेर्न नमिल्ने भन्दै प्रतिवाद गर्न खोज्दा आफूमाथि लामिछानेले हातपात गरेको तामाङले बताइन् । तर, बारले भने कर्मचारी तामाङले घुस मागेको दाबी गरेको छ । अधिवक्ता लामिछानेले घुस दिन अस्वीकार गरेपछि कर्मचारीले पहिला हात हालेको बारको आराेप छ ।

karmachari sarlahi1688391118.jpg

‘बारले विकृति र भ्रष्टाचारविरोधी अभियान चलाएको थियो, ठ्याक्कै त्यस्तै देखियो । महिला कर्मचारीले घुस मागेको, नपाएपछि झापड हानेकी रहिछन् । आक्रमणबाट लडेपछि उठेर प्रतिकार गर्न खोज्दा अधिवक्ता लामिछानेले पनि हात फर्काएका रहेछन् । यो संकेत मात्र हो । अदालतका फाँट–फाँटमा भएको भ्रष्टाचारविरुद्धमा आज संकेतका रूपमा विरोध गर्‍यौँ,’ नेपाल बार एसोसिएसनका अध्यक्ष गोपालकृष्ण घिमिरेले शिलापत्रसँग भने । उनले न्यायालय सुधारका लागि तत्कालीन न्यायाधीश (हाल प्रधानन्याधीश) हरिकृष्ण कार्कीको नेतृत्वमा तयार भएको न्याय क्षेत्र सुधारको प्रतिवेदन लागू हुनुपर्ने बताए ।

jilla adalat ktm1688391118.jpg

न्यायपालिकामा हुन सक्ने विकृति, विसङ्गति, अनियमितता, भ्रष्टाचार तथा बिचौलियाको गतिविधिबारे अध्ययन गर्न बनेको समितिको प्रतिवेद २०७८ सालमा पेस भएको थियो ।

‘घुस दिइनस् भनेर कुनै कर्मचारीले हात हाल्छन र ?,’ अदालतका स्रेस्तेदार विष्णुप्रसाद पाण्डेयले शिलापत्रसँग भने, ‘पहिला हात हालेको भन्ने विषय थियो । अहिले विषयान्तर भएर घुस मागेको भन्नेमा पुगेको छ ।’

बारको आन्दोलनले अदालतको काम कारबाहीमा प्रभाव पारे पनि जिल्ला अदालत ललितपुरका कर्मचारी भने नियमित काममा रहेका छन् । ‘आज बारको कार्यक्रमले गम्भीर प्रभाव पारेको छ । हामी नियमित काममै छौँ । यसबारे भोलि छलफल हुन्छ,’ स्रेस्तेदार पाण्डेयले भने ।

सर्वोच्च अदालतले यो घटनालाई गम्भीरतापूर्वक लिइएको बताएको छ । ‘यो घटनालाई श्रीमान्‌ (न्यायाधीशहरू)हरूले गम्भीरतापूर्वक लिनुभएको छ । कर्मचारी साथीहरूसँग पनि छलफलमै छौँ, अब कसरी अघि बढ्न सकिन्छ भनेर । जति बल्झायो उति सेवाग्राहीलाई प्रभावित पार्ने विषय भयो यो । अदालत क्षेत्र यो विषयमा गम्भीर छ,’ सर्वोच्च अदालतका प्रवक्ता विमल पौडेलले शिलापत्रसँग भने ।

प्रकाशित मिति: सोमबार, असार १८, २०८० २०:१२