जुत्ता ल्याएर व्यापार गर्न चीन गएका थिए होमनाथ, फर्केर आफैँ उत्पादन सुरु गरे (भिडियो)

जुत्ता ल्याएर व्यापार गर्न चीन गएका थिए होमनाथ, फर्केर आफैँ उत्पादन सुरु गरे (भिडियो)

A+ A A-

ब्रान्ड भनेको सामान्य स्लोगन वा नारा मात्र होइन । यो त सम्बन्धित पक्षलाई उक्त कम्पनीको वस्तु तथा सेवासँग जोडिन महसुस गराउने बृहत् लक्ष्य हो । ब्रान्डिङ निरन्तरको प्रयास र प्रतिबद्धता हो ।

२०६१ सालमा बीएफ डियर हिल्स सुजको ब्रान्ड सुरु गर्दैगर्दा होमनाथ उपाध्याय ब्रान्डप्रति खासै जानकार थिएनन् । त्यसबेला नेपाली उत्पादनभन्दा विदेशी उत्पादनप्रति नेपालीको आकर्षण थियो । त्यसैले होमनाथ नेपाली नाम राखियो भने जुत्ता बिक्दैन भनेर अंग्रेजी नाम अर्थात् बीएफ डियर हिल्स नाममा जुत्ता उत्पादनको सुर गरे । नभन्दै छोटो समयमै बीएफ डियर हिल्स युवापुस्तामा लोकप्रिय बन्यो ।

उनले बीएफ डियर हिल्स नामक जुत्ताको ब्रान्ड कसरी सुरु गरे त ? त्योभन्दा अघि उनको पृष्ठभूमि जान्नु आवश्यक छ । म्याग्दीमा जन्मेहुर्केका होमनाथ उच्च शिक्षा अध्ययनका लागि काठमाडौं छिरेका थिए । काठमाडौंमा उनका मामा भारतलगायत तेस्रो मुलुकबाट तयारी पोशाक र तयारी जुत्ताचप्पल आयात गरेर व्यापार गर्थे । पढ्दै होमनाथले व्यवसायमा मामालाई सहयोग गर्न थाले । काम पनि सिक्न थाले ।

बिस्तारै मामाले व्यवसाय पूर्ण रूपमा होमनाथलाई सुम्पे । त्यसपछि उनले आफैँ आयात गर्ने र बजार व्यवस्थापनलगायतका काम गर्न थाले । त्यसबेला भारतीय जुत्ताको नेपाली बजारमा राम्रो माग थियो । होमनाथका एक जना साथी दुर्गा श्रेष्ठ, जसले भारतीय जुत्ता आयात गरेर नेपाली बजारमा बिक्री गर्थे । तिनै दुर्गासँग मिलेर केही समय भारतीय जुत्ताको व्यापार गरे ।

पछि दुर्गाले आफ्नै फ्याक्ट्री सुरु गरेसँगै होमनाथ एक्लिए । तर, व्यवसाय भने छाडेनन् । भारतबाटै तयारी जुत्ता आयात गरेर व्यापारलाई निरन्तरता दिँदै थिए । भारतबाट भन्सार तिरी नेपाली ल्याएर बजारमा प्रतिस्पर्धा गर्न गाह्रो पर्न थाल्यो ।

त्यसपछि भारतबाट कच्चा पदार्थ झिकाएर नेपालमै उत्पादन गर्ने सोचे र उत्पादन गर्न थाले । नेपालमै जुत्ता उत्पादन त गर्न थाले तर नेपाली जुत्ता भन्दा ग्राहकले किन्दैनन् भनेर विभिन्न विदेशी जुत्ताका नाममा उनले उत्पादन गरे ।

उत्पादन गरेका जुत्ता ग्राहकले निकै रुचाए । उनले उद्योग सुरु गरेको थाहा पाएपछि कतिपय ग्राहकले सोध्न थाले, ‘तिमीले उत्पादन गरेको कुन ब्रान्डको प्रोडक्ट हो ?’ तब उनले आफ्नै ब्रान्ड स्थापित गर्नुपर्छ भन्ने महसुस गरे । विदेशी नाममा गरेका उत्पादनको व्यापार राम्रो भयो । तर, धेरै समय त्यो लोकप्रियता टिक्न सकेन । कारण, सस्तो मूल्यका चिनियाँ जुत्ताले नेपाली बजार बिस्तारै ओगट्न थाल्यो ।

त्यसपछि उपाध्यायले चीनबाट उत्पादन ल्याएर बेच्ने सोचेर चीन गए । त्यहाँ पुगेपछि उनलाई चिनियाँले चाहिँ कसरी उत्पादन गर्दा रहेछन् त भन्ने थाहा पाउन त्यहाँका उद्योगहरू चहारे । अन्ततः उनी जुत्ताका लागि आवश्यक कच्चा पदार्थ मात्र लिएर फर्किए । अनि, नेपाली ब्रान्डको बीएफ डियर हिल्स सुजको उदय भयो ।

बीएफ डियर हिल्स सुजको लोकप्रियता बिस्तारै बढ्दै गयो । सय जनाभन्दा धेरै कर्मचारी राखेर दैनिक पाँच सय जोडी जुत्ता उत्पादन गर्दा पनि होमनाथलाई बजार माग पूर्ति गर्न हम्मेहम्मे हुन थाल्यो । तर, त्यसैबेला विनाशकारी भूकम्प गयो । त्यसको केही समयपछिको नाकाबन्दीहुँदै कोरोनाकाल, एकपछि अर्को संकट बेहोर्नुपर्‍यो । यी सबै विपद् बीएफ डियर हिल्सका लागि पनि अभिशाप बन्यो । आमनेपालीमाझ लोकप्रिय बनेर बजारको माग थेग्न नसक्ने अवस्थामा पुगेको बीएफ डियर हिल्स सुजको उत्पादन त टाढाको कुरा, ताल्चा लगाउनुपर्ने अवस्थामा उद्योग पुग्यो ।

यति हुँदाहुँदै पनि होमनाथले हिम्मत हारेनन् । हाल व्यवसायमा छोराको समेत साथ पाएका उनले बीएफ डियर हिल्स सुजलाई विपद्कालभन्दा पहिलेको अवस्थामा फर्काउने मात्र नभएर आधुनिक प्रविधि थप्दै अन्तर्राष्ट्रिय ब्रान्डका जुत्तासँग सशक्त प्रतिस्पर्धामा उत्रिने योजनामा रहेको बताउँछन् ।

हेर्नुस् भिडियो :