कांग्रेस केन्द्रीय सदस्यलाई बैठकै नबसी भूतपूर्व हुने चिन्ता

A+ A A-

सत्तारूढ दल नेपाली कांग्रेसकाे केन्द्रीय समिति बैठक नबसेकाे एक वर्ष पुग्न लागेकाे छ । तर बैठक बस्ने सुरसार छैन ।सुरुमा चुनाव देखाएर बैठक धकेलेका सभापति शेरबहादुर देउवाले त्यसपछि सरकार गठनकाे विषयलाई लिएर बाेलाएकाे बैठक पनि स्थगित गरे । अहिले बैठक बस्न नसक्ने कुनै कारण नभए पनि बैठककाे सुरसार भएकाे छैन ।

पार्टी प्रवक्ता डा प्रकाशशरण महत अर्थमन्त्री बनेपछि पार्टीको आधिकारिक धारणा बोल्ने व्यक्ति भएनन् । त्यसैले सभापति शेरबहादुर देउवाले मीन विश्वकर्मालाई प्रचार विभाग प्रमुखको जिम्मेवारी दिए । पार्टीका अरू विभाग भने गठन भएका छैनन् ।

बजेट बनाउन कांग्रेसका मन्त्री र सांसद व्यस्त भए । त्यही बाहना देखाएर नियमित काम छल्ने गरेकाे छ कांग्रेस नेतृत्वले ।

विधानअनुसार हरेक दुई महिनाकाे फरकमा बस्नुपर्ने केन्द्रीय समिति गत वर्ष साउन २ गतेयता बसेकाे छैन ।संस्थापनइतर समूह र तेस्रो पुस्ताका नेताहरूले सभापति देउवालाई दबाब दिए पनि केन्द्रीय समिति बैठक बस्न सकेको छैन ।

स्थानीय तहको चुनावी समीक्षा गरेको कांग्रेसले संघीय चुनावको समीक्षा गर्नसमेत आवश्यक ठानेको छैन । केन्द्रीय समिति बैठक बोलाउन संस्थापन पक्षका केन्द्रीय सदस्यहरूले पनि दबाब दिने तयारी गरेका छन् ।

संस्थापन समूहका एक केन्द्रीय सदस्यका अनुसार २०–२५ जना सदस्य नियमित सम्पर्कमा छन् । उनीहरूले भेटेर सभापति देउवालाई केन्द्रीय समिति बैठकका लागि दबाब दिने तयारी गरेका छन् । देउवानिकट नै मानिएका केन्द्रीय सदस्य नैनसिंह महरले केन्द्रीय समिति बैठक बाेलाउन सार्वजिनक माग गरेकाे पनि महिनाैँ बितिसकेकाे छ ।

केन्द्रीय सदस्य मधु आचार्यले सोमबार बैठकको माग गर्दै निवेदन दिएका छन् । उनले अघिल्लो वर्ष साउन २ गते पश्चात् केन्द्रीय समितिको बैठक नबोलाइएको भन्दै आपत्ति जनाएका छन् ।

आचार्यले आफू पार्टी रुपान्तरणको अभियान लिएर सात प्रदेश र डायसपोरासम्म पुगेको भन्दै जनताको म्यान्डेट पनि बैठक आवश्यक भएको बताए ।

कांग्रेस विधानले प्रत्येक दुई महिना केन्द्रीय समिति बैठक बोलाउनुपर्ने र बैठक बोलाउने अधिकार सभापतिलाई छ । विधानलाई वेवास्ता गर्ने हो भने सभापतिको तजविजीमा केन्द्रीय समिति बैठक बस्छ ।

कांग्रेस केन्द्रीय सदस्यहरू आफ्नो कार्यकालमा केन्द्रीय समित बैठक नै नबस्ने हो कि भनेर व्यङ्ग्य गर्छन् । ‘पार्टीले जनताको र कार्यकर्ताको कुरा सुन्नुपर्ने हो । केन्द्रीय सदस्यको फोरम पनि बन्द छ । केन्द्रीय समिति बैठक नबसी भूतपूर्व केन्द्रीय सदस्य हुन सक्छु,’ कांग्रेस केन्द्रीय सदस्य प्रकाश स्नेहीले भने ।

पार्टीभित्र गुम्दै गएको विश्वास र खुम्चिएको शक्ति र जनताकाे विकर्षणहरूको बारेमा छलफल गर्न नेतृत्व पन्छिएको छ । भ्रष्टाचार, सुशासन र जनसरोकार विषयमा पार्टी मौन छ । नक्कली भुटानी शरणार्थी प्रकरणमा आफ्नै नेता पुर्पक्षका लागि थुनामा जाँदासमेत पार्टीले बाेलेकाे छैन । केन्द्रीय सदस्य बालकृष्ण खाँणलाई निलम्बन गरेकाे छैन । अर्का केन्द्रीय सदस्य टेकबहादुर गुरुङ विशेष अदालतबाट भ्रष्टाचारी ठहर भइसक्दा पनि उनीमाथि पार्टीले कारबाही गरेकाे छैन । उनी सांसदबाट निलम्बित छन् । पार्टीकाे छवी डामाडोल हुँदा पनि सभापति देउवा मौन छन् ।

कांग्रेस सांसद तथा केन्द्रीय सदस्यले पार्टीलाई भ्रष्टाचारीको संरक्षक रुपमा जनताले चिनेको बताउन थालेका छन् । ‘लाज नमानी भन्नुपर्दा अहिले हामीलाई यथास्थितिको प्रतिनिधिको रुपमा जनताले चिनेका छन् । भ्रष्टाचारको संरक्षकको रुपमा जनताले चिनेका छन् । विकृति र मनपरीतन्त्रको संवाहकका रुपमा हामीलाई चिनेका छन्,’ शुक्रबार काठमाडौंको एक कार्यक्रममा केन्द्रीय सदस्य अर्जुननरसिंह केसीले भने, ‘त्यसले गर्दा जनतामा निराशाको स्थिति र अरु के विकल्प छ भनेर खोजिरहेका छन् । जनता विकल्प खोज्छन् । कसैलाई कुरेर बस्दैनन् ।’

बालकृष्ण खाँणलाई पार्टीको जिम्मेवारीबाट अलग नरोखेको भन्दै पार्टीमा असन्तुष्टि छ । ‘पूर्वक्षका लागि नेताहरू थुनामा जादाँसमेत पार्टीले नेताहरूलाई जिम्मेवारीबाट अलग गरेको छैन । एकाध नेतृत्वले गरेको अपजसको भारी सम्पूर्ण सदस्यले बोक्नुपर्ने अवस्था आएको छ,’ अर्का केन्द्रीय सदस्य अजयबाबु शिवाकोटीले भने ।

कांग्रेसको २०७८ मंसिरमा १४ औं महाधिवेशन भएर देउवा दोस्रो कार्यकालका लागि सभापति निर्वाचित भएका थिए । त्यसपछि पाँचपटक मात्र केन्द्रीय समिति बैठक बसेको छ । विधानअनुसार चलेको भए हालसम्म ९ पटक केन्द्रीय समिति बैठक बसेको हुनेथियो । तर, सभापति देउवा बैठक बोलाउन चाहिरहेका छैनन् ।

१४औँ महाधिवेशन नेतृत्व मात्रै चयन गरेर सकिएको थियो । नीति महाधिवेशन ६ महिनाभित्र गर्ने भने पनि आजसम्म भएको छैन भने मिति तोक्ने सुरसार पनि छैन । नेताहरू अब बस्ने केन्द्रीय समित बैठकले नीति अधिवेशनको मिति तय गर्ने बताउँछन् । तर त्याे केन्द्रीय समिति बैठक नै कहिले बस्छ भन्ने ठेगान छैन ।

प्रचार विभाग प्रमुख तथा केन्द्रीय सदस्य मीन विश्वकर्मा भने यसै महिनाको अन्त्यमा केन्द्रीय समिति बैठक बस्ने बताउँछन् । ‘बैठक बस्न विविध कारणले ढिलाइ भएकै हो । साथीहरूले निवेदन दिन थाल्नुभएको छ । यो सकारात्मक विषय पनि हो । यो महिनाभित्र बैठक बस्ने तयारी गरिरहेका छौँ । अब ढिला हुँदैन,’ उनले भने ।

प्रकाशित मिति: शनिबार, असार १६, २०८० १९:३६