सार्वजनिक जग्गा व्यक्तिका नाममा, दर्ता खारेज गर्न ज्ञापनपत्र

A+ A A-

नेपाली कांग्रेस सियारी गाउँपालिका रुपन्देहीले भदौ २३ गते गाउँपालिकालाई सार्वजनिक जग्गा संरक्षण गर्नुको सट्टा व्यक्तिको नाममा नामसारी गरेको आरोप लगाउँदै ज्ञापनपत्र बुझायो । ज्ञापन पत्रमा भनिएको छ, ‘सार्वजनिक जग्गाको संरक्षण गर्नु गाउँपालिकाको दायित्व रहन्छ तर यहाँ त सार्वजनिक जग्गा संरक्षण गर्नुको सट्टा व्यक्तिको नाममा नामसारी भएकोमा सोतर्फ कुनै चासो नदेखाएको, सामुदायिक वृक्षरोपण गरिएकोमा भूमाफियाको चंगुलमा परी, भू–माफीयासँग साँठगाँठ गरी चिलियास्थित कित्ता नं. ४५ को ४–९–६ जग्गा विशाल तामाङको नाममा दर्ता गराएकाले उक्त सार्वजनिक जग्गा दर्ता खारेज गरी सार्वजनिक कायम गरी संरक्षण गर्न आग्रह गर्दछौं ।’

कांग्रेसले १४ बुँदे गैरकानूनी कार्यहरू भन्दै बुझाएको ज्ञापनपत्रमा १ नं. मा यो जग्गाको कुरा उसले उठान गरेको छ । तर, खोज्दै जाँदा यसको वास्तविकता भने त्यस्तो देखिएन । यो आरोप निराधार देखियो ।

त्यसको प्रमाणका लागि यो लालपुर्जा हेरौं ।साविक चिलिया गाविस–९ हाल सियारी गाउँपालिका– १ सोनारेट गाउँमा स्थानीय चिलिया माविले २०३५ सालदेखि भोगचलन गर्दै आएको कित्ता नं. ४५ को ४ विगाह ६ कट्ठा ९ धुर जग्गा अहिले व्यक्तिका नाममा छ । तत्कालीन केरवानी गाविस– २, रुपन्देहीका देवबहादुर तामाङका छोरा र शंखबहादुर तामाङका नाति विशाल तामाङका नाममा यो जग्गा नामसारी भएको छ ।

भैरहवास्थित मालपोत कार्यालयबाट ०७१ साल माघ १८ गते उक्त जग्गाको लालपुर्जा विशालले बनाएका छन् । मालपोतको स्रेस्तामा मिसिल नं. २८ बाट जग्गा विशालका नाममा आएको उल्लेख छ तर मालपोतमा ‘मिसिल नं. २८ नै भेटिँदैन । मालपोत कार्यालयका सूचना अधिकारी ईश्वरी अर्यालले कसरी व्यक्तिको नाममा लालपुर्जा बन्यो भन्नेमा आफैं अचम्ममा परेको बताए ।

त्यो जग्गा सार्वजनिक नै हो– गाउँपालिका अध्यक्ष थारू

सियारी गाउँपालिकाका अध्यक्ष अयोध्या थारूले सार्वजनिक जग्गा व्यक्तिको नाममा दर्ता गराएको भन्ने आरोप निराधार रहेको बताए । सियारी–१ (साविक चिल्हिया–९) को कित्ता नम्बर ४५ को ४–९–६ जग्गा दर्ताको विषयमा गाउँपालिले दर्ता गरेको भन्ने आरोपमा कुनै सत्यता नभएको बताए ।

‘उक्त जग्गा २०७१ साल माघमा दर्ता भएको देखिन्छ,’ अध्यक्ष थारूले भने, ‘गाउँपालिका गठन नहुँदै दर्ताको भएको अभिलेखबाट स्पष्ट देखिँदा देखिँदै सर्वसाधारण जनतामा भ्रमपूर्ण अफवाह, अशान्ति फैलाई निर्वाचित जनप्रतिनिधि तथा गाउँपालिकामाथि यस्ता आरोप लगाउन उपयुक्त देखिँदैन ।’ उनले थपे, ‘तत्कालीन गाविस छँदैको घटना भए पनि यसलाई गम्भीरताका साथ लिई आवश्यक कारबाही प्रक्रिया अगाडि बढाएका छौं । उक्त जग्गा सार्वजनिक हो ।’ उनले विद्यालयले ०३५ सालदेखि उपयोग गर्दै आएको जग्गा अहिले व्यक्तिको नाममा लालपुर्जा आए पनि उपभोग भने गर्न नदिने बताए । उनले जग्गा संरक्षणका लागि कामहरूसमेत गरेको बताए ।

प्रकाशित मिति: बिहीबार, भदौ २६, २०७६ ०१:१८