नेपाली खानालाई विश्वस्तरमा पुर्‍याउने अजय तामाङको सपना (भिडियोसहित)

A+ A A-

जीवनमा उसले सफलता हात पार्छ, जसले निरन्तर आफ्ना निर्दिष्ट लक्ष्य हासिल गर्न हरप्रहर प्रयत्न गर्छ । व्यवस्थापनमा स्नातक उत्तीर्ण गरेसँगै अवसरको खोजी गर्दै आठ वर्षअघि दुबई पुगेका अजय तामाङको संघर्षमय कथाले यही भन्छ । उनको संघर्षको कथा भने दुबईबाट सुरु हुन्छ ।

जति बेला उनी दुबई पुगे, त्यसबेला आर्थिक संकटका कारण त्यहाँ धेरै मानिसले रोजगारी गुमाएका थिए । त्यही बेला अजयले एउटा होटलमा वेटरको काम पाए । दिलो ज्यान दिएर काम गरे । परिणामतः ११ महिनाभित्रै वेटरबाट उक्त होटलको शाखा म्यानेजरको भूमिकामा पदोन्नति भए ।

दुबई मात्र होइन, होटल क्षेत्रमा अजयले मलेसियामा समेत काम गरे । दुुबई र मलेसियाका होटलहरूमा काम गर्ने क्रममा फिलिपिनी खाना, इन्डियन तथा पाकिस्तानी अथवा अरेबियनहरूको आफ्नै खाना हुने गरेको थाहा पाए । नेपालबाहिर होटलमा काम गर्ने क्रममा उनलाई लाग्यो– खानासँग देशको अस्तित्व र पहिचान जोडिएको हुन्छ ।

हरेक देशले आफ्नै देशको खानालाई प्राथमिकता दिने गरेको पनि उनले थाहा पाए । त्यति मात्र होइन, त्यहाँ उनलाई तिम्रो देशको खानाचाहिँ के हो भनेर सोध्ने धेरै हुन्थे । त्यसपछि नै हो, उनलाई नेपाली खानालाई अन्तर्राष्ट्रियस्तरमा चिनाउने रहर जागेको ।

नेपाल र अन्तर्राष्ट्रियस्तरका ख्यातिप्राप्त विभिन्न होटलको अनुभव बटुलेसँगै अजयमा आफ्नै देशमा रहेर नेपाली खानालाई प्रवर्द्धन गर्दै व्यवसाय गर्ने सोच पलायो । सफलताका लागि सबैभन्दा आवश्यक मिहिनेत र पढाइ त्यसको मेरुदण्ड ठान्ने अजयले नेपालको रेडकार्पेट रेस्टुरेन्टदेखि अल्फाबिटा, च्याप्टर नायनलगायत थुप्रै होटल तथा रेस्टुरेन्टबाट कामको अनुभव बटुले । तर, उनलाई आफैँले नेपाली खानालाई प्रवर्द्धन हुने किसिमको व्यवसाय सञ्चालन गर्ने रहर जाग्दै गयो ।

आकाश भट्टराईसँग अजयको पुरानो मित्रता थियो । आकाश नेपालमै अन्य व्यवसायमा केन्द्रित थिए । उनले अजयलाई नेपालमै केही न केही गर्नैपर्छ भनिरहन्थे । अजयलाई पनि भित्री मनबाटै जागृत आफ्नै केही गर्नुपर्छ भन्ने सोच प्रवल हुँदै थियो । आकाश आफैँ पनि देशभित्रै उद्यम गर्नुपर्छ, तब मात्र आफूसँगै देशलाई पनि आत्मनिर्भरको दिशामा केन्द्रित गर्न सकिन्छ भन्ने मान्यता राख्थे ।

अन्ततः अजय र आकाशको विचार मिल्यो । नेपाली खानालाई विश्वस्तरमा चिनाउने लक्ष्यका साथ थकाली खाना केन्द्रित रेस्टुरेन्ट खोल्न अजय र आकाश एकमत भए । ज्ञानेश्वरमा उपयुक्त ठाउँ पनि फेला पर्‍यो । अन्ततः अजय र आकाशले नेपाली खानालाई प्रवर्द्धन गर्ने सोचका साथ ‘डि मोक्ष मुस्ताङ थकाली’ रेस्टुरेन्ट सुरु गरे ।

यस रेस्टुरेन्टले आफ्नो विशेष परिकारका रूपमा ससुराली सेट पस्किँदै आएको अजय बताउँछन् । ससुराली सेटमा माछा, कुखुरा र खसीको मासु र डेजर्टका रूपमा खिर समावेश छन् । त्यस्तै, कालिजको मासुको सेट, सिस्नोलगायतका खानालाई ‘डि मोक्ष मुस्ताङ थकाली’ले प्राथमिकता दिएको अजयको भनाइ छ ।

त्यसो त नेपालको सन्दर्भमा कुरा गर्ने हो भने रेस्टुरेन्ट व्यवसायहरूमध्ये दिगो रूपमा व्यावसायिक सफलतातर्फ उन्मुख उदाहरण निकै कम छन् । यो सवालमा अजय भन्छन्, ‘हाम्रो पृष्ठभूमि, हामीले पस्किने खानाको स्वाद, हामीले दिने सेवा र हाम्रो उच्च मनोबलका कारण डि मोक्ष मुस्ताङ थकालीले व्यावसायिक सफलता चुम्नेमा दुई मत छैन ।

त्यति मात्र नभएर भविष्यमा डि मोक्ष मुस्ताङ थकालीका शाखालाई विश्वका विभिन्न देशमा विस्तार गर्दै नेपाली खानाका परिकारलाई विश्वस्तरमा पुर्‍याउने लक्ष्य आफूहरूको रहेको अजय बताउँछन् ।

भिडियो: