युनुस अन्सारीमाथि जेलभित्रै गोली हान्ने कुख्यात अपराधी भाटिया १२ वर्ष जेल बसेर छुटेलगत्तै फेरि पक्राउ

युनुस अन्सारीमाथि जेलभित्रै गोली हान्ने कुख्यात अपराधी भाटिया १२ वर्ष जेल बसेर छुटेलगत्तै फेरि पक्राउ

A+ A A-

कुख्यात भारतीय अपराधी जसजित सिंह भनिने मनमित सिंह भाटिया जेलमुक्त हुनासाथ फेरि पक्राउ परेका छन् ।

डिल्लीबजार कारागारबाट १२ वर्ष कैद सजाय भुक्तान गरेर छुटेलगत्तै उनलाई बाँके प्रहरीले पुन: पक्राउ गरेको हो ।भारतीय गुप्तचर निकाय ‘रअ’ ले सुपारी दिएर हत्याका लागि प्रयोग गरेका उत्तर प्रदेश लखनउका भाटियाले डिल्लीबजार कारागारमा १२ वर्ष जेल सजाय भुक्तान गरेका थिए ।

कारागार स्राेतका अनुसार उनी केही दिनअघि छुटेका थिए । भाटियालाई काठमाडौं जिल्ला अदालतले ज्यान मार्ने उद्योग र हातहतियार खरखजाना मुद्दामा २०६७ सालमा १२ वर्ष जेल सजाय सुनाएको थियो । सो सजाय भुक्तान गरेर भाटिया जेलमुक्त हुनासाथ फेरि बाँके प्रहरीले पक्राउ गरेको बाँकेका एसपी सन्तोषसिंह राठौरले जानकारी दिए ।

भाटिया जेल पर्दा १२ वर्षसम्म उनका कुनै पनि आफन्त भेट्न कारागार पुगेका थिएनन् । भाटिया जेलभित्र पनि कसैसँग नजिकिएका थिएनन् । भाटियाले २६ फागुन २०६७ मा सुन्धारा कारागारभित्र कैद जीवन भुक्तान गरिरहेका बाराका युनुस अन्सारीमाथि ६ राउण्ड गोली प्रहार गरेका थिए ।

निधार ताकेर हानेको ५ राउण्ड गोली नलागे पनि एक गोली भने अन्सारीको हातको कुहिनोमा लागेको थियो । त्यो घटनामा अन्सारी भाग्यबश बाँचेका थिए । अन्सारीमाथि गोली प्रहार गर्दा फ्रान्सेली नागरिक विकिनी किलरको नामबाट चर्चित चार्ल्स शोभराजलाई भेट्ने बहाना बनाएर भाटिया कारागार पुगेका थिए ।

हाल शोभराज पनि छुटेर फ्रान्स फर्किसकेका छन् । सोही घटनामा भाटियालाई जिल्ला अदालत काठमाडौंले १२ वर्ष कैद सजायको फैसला गरेको थियो । अन्सारीलाई गोली नलागेपछि भाटियाले जर्मन रिभल्वर सडकमै फालेर प्रहरीलाई गिरफ्तारी दिएका थिए ।

अब्दुलमजिद मनिहारको पनि गरेका थिए हत्या

भाटियाले २६ फागुन २०६७ मा सुन्धारा कारागारभित्र कैद सजाय भुक्तान गरिरहेका युनुस अन्सारीमाथि गोली प्रहार गर्नुअघि नै नेपालगञ्जका अब्दुलमजिद मनिहारको पनि हत्या गरेका थिए ।

मनिहारको १९ असोज २०६६ मा हत्या भएको थियो । मनिहारलाई भारतीय नक्कली नोटको कारोबारी रहेको भन्दै उनले हत्या गरेको प्रहरी अनुसन्धानबाट खुलेको थियो । सोही अभियोगमा बाँके प्रहरीले पक्राउ गरेर अनुसन्धान अघि बढाएको हो ।

जिल्ला अदालत बाँकेले भाटियालाई पुर्पक्षका लागि जेल पठाएको एसपी राठौरले बताए । मनिहारजस्तै अन्सारी पनि भारतीय नक्कली नोटको कारोबारी रहेको भन्दै उनले हत्या प्रयास गरेका थिए । भाटियाको गोली प्रहारबाट भाग्यवश बाचेका अन्सारी भने हाल सुन्धारा कारागारभित्रै छन् । अन्सारी १८ पुस २०६६ मा २५ लाख ४४ हजार भारतीय रुपैयाँसहित पहिलोपटक पक्राउ परेका थिए ।

सोही अभियोगमा पुर्पक्षका लागि थुनामा रहेका अन्सारीलाई भाटियाले कारागारभित्रै गोली हानेका थिए । २०६६ सालमा पक्राउ परेर १८ भदौ २०७० मा छुटेका अन्सारी त्यसको ५ महिनापछि पुनः १० माघ २०७० मा ३५ लाख भारतीय रुपैयाँसहित पक्राउ परेका थिए । उक्त अभियोगमा जेल भुक्तान गरेका अन्सारी २ फागुन २०७४ मा छुटेका थिए । त्यसको २ वर्षपछि १० जेठ २०७६ मा फेरि ७ करोड भारतीय रुपैयाँसहित त्रिभुवन अन्तर्राष्ट्रिय विमानस्थलबाट पक्राउ परेका थिए ।

उसो त उनी बाँच्नकै लागि जेल जान खोज्ने गरेको पनि प्रहरीको दाबी छ । जेलबाहिर बसे भारतले कुनै पनि बेला सिध्याउन सक्ने भय उनमा छ । अन्सारीलाई पाकिस्तानले प्रयोग गर्ने गरेको दाबी ‘रअ’ को छ । अन्सारी बाराका तत्कालीन एमाले नेता तथा पूर्वमन्त्री सलिम मियाँ अन्सारीका छोरा हुन् ।

यसरी भारतीय जाली नोटको कारोबार गर्नेलाई एकपछि अर्को गोली प्रहार गर्ने भाटिया भारतीय गुप्तचर निकाय ‘रअ’ को निर्देशनमा भारतविरोधी गतिविधिमा लागेकाहरूलाई गोली हान्ने ‘सुटर’ रहेको अनुसन्धानमा संलग्न प्रहरी अधिकारीको भनाइ छ ।

अन्सारीलाई गोली हान्न भाटियाले १५ लाख भारतीय रुपैयाँको सुपारी लिएको दाबी प्रहरीको छ । अन्सारीलाई पहिले भारतीय प्रहरीको मोस्ट वान्टेडको सूचीमा रहेका अन्तर्राष्ट्रिय अपराधी दाउद इब्राहिमनिकट व्यक्ति रहेको आरोप पनि भारतीय सञ्चारमाध्यमहरूले लगाउने गरेका थिए ।

प्रकाशित मिति: मंगलबार, असार १२, २०८० १२:५६