सरकार र कांग्रेससँग किन आक्रोशित छन् एकीकृत समाजवादीका नेता ?

A+ A A-

सत्ता साझेदार दल नेकपा एकीकृत समाजवादी सरकार र अन्य सत्तारुढ दलको चर्को आलोचनामा उत्रिने गरेको छ । केही नेता सरकार र कांग्रेसको विरोधमा उत्रिँदा पार्टीभित्र नेतृत्वको आलोचना गर्नेमा सम्मानित नेता झलनाथ खनाल अग्रपंत्तिमा छन् ।

बजेटलाई लिएर एकीकृत समाजवादीका नेताहरू सरकार र कांग्रेससँग रिसाएका छन् । पार्टीका सांसद किसान श्रेष्ठले संसदकाे राेष्ट्रमबाटै सत्ता पक्षको सांसद भएर विपक्षमा भोट हाल्न नमिल्ने तर बजेट पास हुन नदिने खालको रहेको बताएका थिए ।

बजेटको विषयमा उपाध्यक्ष राजेन्द्र पाण्डे झन चर्को सुनिन्छन् । उनले पार्टी अध्यक्ष माधव नेपालको अगाडि बजेट संशाेधन बिना पास हुन नदिने बताएका थिए ।

शुक्रबार अध्यक्ष माधवकुमार नेपालले कम्युनिष्ट प्रधानमन्त्री प्रचण्डलाई हटाएर कांग्रेस सभापति शेरबहादुर देउवालाई कुर्सीको अफर गर्न लागेको भन्दै एमाले अध्यक्ष केपी ओलीका विरुद्ध आक्रामक बनेका थिए । उनले कांग्रेसलाई दलाल पुँजीवादी पार्टीसमेत भने ।

‘ठूलो पार्टीले समाजवादी शक्तिलाई एकताबद्ध बनाउन चाहेन । उसले अहिले पनि के चाहेको छ भने केपी ओलीले कांग्रेसलाई प्रभावित पारेर कांग्रेसले नै सरकार चलाओस्, हामी साथ दिन तयार छौं भनिरहेका छन् । कस्तो बिडम्बना, त्यो कम्युनिष्ट पार्टीको चरित्र कस्तो होला ? जुन कम्युनिष्ट पार्टीका नेताले कम्युनिष्ट प्रधानमन्त्री कमरेड पुष्पकमल दाहाल प्रचण्डको सरकार ढालेर दलाल पुँजीवादी कांग्रेसका सभापति शेरबहादुर देउवालाई प्रधानमन्त्री बनाउन चलखेल गरिरहेका छन् ।’

उनले समाजवादी शक्तिलाई एकताबद्ध बनाउने पहल आफूहरूले गर्दा केपी ओली बर्बराइरहेको आरोप लगाए । अध्यक्ष नेपालले नेकपा एसले नै अबको नेतृत्व गर्ने भन्दै प्रतिगमनको दिशामा गएको राजनीतिको कोर्स आफूले नै बदलेको बताए ।

बजेटलाई लिएर एकीकृत समाजवादीका शीर्ष नेता ने असन्तुष्ट छन् । अर्थमन्त्री प्रकाशशरण महतले बजेटमा सन्तुलन नगरेको एकीकृत समाजवादीका उपपहासचिव विजय पौडेलले बताउँछन् । ‘हजारपटक भन्दा लेखेर दिँदा पनि परिवर्तनकारी कार्यक्रम केही आउन दिएनन् । समाजवादी कुरा नभएर अर्थतन्त्र सुधार गर्ने सामान्य कुरा पनि आएन । साना र मझौला उद्योग धरासायी छन् । ट्याक्समा जरिवाना मिनाहासमेत गर्दैनन्,’ उनले भने, ‘यो असन्तुष्टि समाधान गरेर अघि बढ्छौं ।’

कांग्रेसको इतर समूह र एमाले नजिकिएकाले अध्यक्ष नेपालले आलोचना गरेको पार्टीभित्र चर्चा छ । एमाले सचेतक महेश बर्तौलाले गठबन्धन तोड्न चाहे १ हप्तामा तोड्न सक्ने बताएका छन् । उनको बोली संकेत बिनाको होइन भन्ने लागेर अध्यक्ष नेपाल प्रतिरक्षामा उत्रिएका छन् । ‘गठबन्धन गोजाउनुपर्छ भन्ने हिसाबमा अध्यक्ष ज्यूको भनाइ आएको हो । हामी यही गठबन्धन निरन्तरताको पक्षमा छौं,’ उपमहासचिव पौडेलले भने ।

एकीकृत समाजवादीको शंकलाई बल पुग्नेगरी शनिबार कांग्रेस महामन्त्री गगन थापाले बोले । एक कार्यक्रमा उनले भने, ‘चुनाव पछाडि सरकार बन्ने, बदल्ने सामान्य कुरा हो । हामी अहिले एक गठबन्धनमा छौँ, गठबन्धन ठीक ढंगले गएन, चित्त बुझेन भने गठबन्धन बदलिन्छ । नयाँ सरकार बन्छ, कुनै अनौठो कुरा भएन । बन्छ, भत्किन्छ भइराख्छ ।’

गठबन्धन पाँच वर्ष जान्छ भनेर ढुक्क देखिएका अध्यक्ष नेपाल त्यसको सम्भावना कम हुने संकेत देखेपछि एमालेलाई गाली गर्न पुगे । नेपालले सकरकारलाई तर्साउन धम्कीको भाषा प्रयोग गरेको विश्लेषक डा राजेन्द्र चापागाई बताउँछन् । ‘माधव नेपालको समूहलाई महत्व नदिएर कांग्रेससँग नजिक भएकाले माधव नेपालले दबाब महसुस गरे । बीचमा आएको भुटानी शरणार्थी प्रकरणमा कांग्रेस, एमाले र माओवादी नजिकिए । त्यसमा समाजवादीको खोजी भएन । धम्कीको भाषा हो । सरकारबाट बाहिरिहाल्छन् भन्ने लाग्दैन,’ उनले भने ।

सानो पार्टी भए पनि एकमत भने पार्टीमा छैन । समाजवादी मोर्चामा जाने समयमा पनि पार्टीमा एकै विचार देखिएको छैन । एमालेसँग तालमेल गर्न सहज महसुस गर्ने नेताहरू मुकुन्द न्यौपानेको नेतृत्वमा एमालेमै फर्किए । पार्टी आफ्नै बुतामा बनाउनुपर्छ भन्ने नेताहरू मोर्चामा सहभागी हुनु हुदैँन भन्ने पक्षमा छन् ।

उपमहासचिव तथा प्रवक्ता जगन्नाथ खतिवडा, सचिव रामकुमारी झाँक्री लगायतका नेताहरू मोर्चामा नगए हुने र गएको बेलामा पार्टीलाई घाटा नहुने पक्षमा छन् ।

‘समाजवादी मोर्चामा जाँदा पनि छलफल नगरी गएको छ । मोर्चाबन्दीले एकीकृत समजवादीमा माओवादी हाबी हुन सक्छ । असन्तुष्टिको आवाज पनि आएको छ । माओवादी र एकीकृत समाजवादीका अध्यक्षको ट्युनिङ मिलेको छ,’ विश्लेषक चापागाईले भने ।

सम्मानित नेता खनाल नेतृत्वको आलोचना गरेर थाक्दैनन् । शुक्रबार नै उनले अध्यक्ष नेपाललाई २ जना मन्त्री बनाउँदैमा क्रान्ति नहुने बताएका थिए । त्यसअघि उनले एमालेसँग फुटको औचित्य प्रमाणित गर्न नसकेको शिलापत्रसँग बताएका थिए ।

‘सम्मानि नेताले कुनै प्रसगंमा भन्नुभयो होला । पार्टीको आधिकारिक धारणा केन्द्रीय समिति समितिले भनेको छ । हामी चैतमा महाधिवेशन गर्छौं भनेर । संविधानको रक्षा, स्वेच्छाचारीको अन्त्य, सार्वभौम संसदको रक्षाका लागि पार्टी विभाजन गरेका थियौं । तयो पुष्टि भैसक्यो । अरु आधार के के चाहिन्छ त्यो सबै पार्टीमा छ,’ प्रवक्ता खतिवडाले शिलापत्रसँग भने ।

प्रकाशित मिति: शनिबार, असार ९, २०८० २०:०८