पार्टी जस्तै भद्रगोल ट्रेड युनियन कांग्रेसको चुनाव

A+ A A-

मंगलबार साँझ प्रज्ञा प्रतिष्ठानमा महाधिवेशन प्रतिनिधि भन्दै थिए, ‘जस्तो पार्टी छ त्यस्तै भद्रगोल छ के हुनु ?’ उनीहरू गफिँदै थिए, ‘तपाईं बन्दसत्रमा बस्नुभयो ?’ अर्काले जवाफ फर्काए ‘के छ र बस्नु ? बसिनँ ।’

ट्रेड युनियन कांग्रेसको ७औँ महाधिवेशन जारी भए पनि त्यति उत्साह थिएन । यो दृश्य बुधबार पनि देखियो । निर्वाचन कार्यतालिका एकातिर छ । काम अर्कोतिर । पार्टीमा जस्तो विधानसम्मत नचल्ले र सुस्त संगठनको झल्को ट्रेड युनियनले दिन्थ्यो ।

उम्मेदवारको मनोनयन दर्ता ९ बजे गर्ने र अन्तिम नामावली प्रकाशन साँढे १० बजे भनिए पनि अन्तिम नामावली २ बजे सार्वजनकि भयो ।

निर्वाचन संयोजक योगेन्द्र अधिकारी साँढे १२ बजे बुथ निर्माणमा थिए । यतिबेला उनले अन्तिम नामावली प्रकाश गर्नुपर्थ्यो । 'कम्प्युटरमा नामवामाली टाइप गर्न समय लागेकाले ढिला भएको हो,’ उनले भने ।

प्रतिष्ठानको पुस्ताकालय हलमा मतदानस्थल बनाइएको थियो । चर्को गर्मी छल्न प्रतिनिधिहरू कमलादी गणेशस्थान क्षेत्र वरपर चिया नास्ता खाने र शीतल ताप्न व्यस्त थिए ।

८६९ जना मतदाता भद्रगोल भयो भन्ने मानसिकतामा थिए । घाम ढल्किन थालेपछि ४ बजे मतदान भने पनि सवा ४ बजे बल्ल नारा सुनिन थाल्यो ।

मतदाता ४ बजेदेखि लाइनमा थिए । यतिबेला मतदान सुरु हुनुपर्ने तालिका थियो । तर, मत्रपत्र समेत तयार थिएन । ६ः२६ मा मतपत्र आयो । २ घन्टादेखि लाइनमा बसेकाहरूमा बेग्लै उत्साह देखिन्थ्यो । उनीहरू भन्दै थिए, ‘ल अब हुन्छ चुनाव हुन्छ मतपत्र आयो ।’ सवा ७ बजेबाट मतदान सुरु भयो । रातको समयमा पनि प्रतिनिधि मतदान गर्दैछन् ।

०००

अध्यक्षका लागि कांग्रेसको संस्थापन पक्ष र इतरपक्षबाट दुई प्यानल प्रतिस्पर्धामा छन् । संस्थापनबाट योगेन्द्र कुवँर र इतर समूहबाट महेन्द्र यादव प्यानलसहित मैदानमा छन् ।

कुवँर समूहबाट वरिष्ठ उपाध्यक्षमा अयोध्या यादव, उपाध्यक्ष खुलामा ध्रवचन्द्र गौतम र शंकर लामिछाने, उपाध्यक्ष महिलामा भगवती खड्का, उपाध्यक्ष सेवामा सिताराम अवस्थी, उत्पादनतर्फ ईश्वर परियार अनौपचारिक र स्वरोजगारमा उदय सावद छन् ।

महासचिवमा डीपी अर्याल, उपमहासचिव खुलामा रञ्जना थापा, राममंगल यादव, सेवामा राजेश हुमगाई, उत्पादन कुलबहादुर खड्का, अनौपचारिक र स्वरोजगार देवी लम्साल उम्मेदवार छन् ।

त्यस्तै, कोषाध्यक्षमा जनक पाण्डे, युवा समिति अध्यक्ष निराजन घिमिरे र महिला समिति अध्यक्षमा ईश्वरीदेवी लौडारी छन् ।

यादव समूहबाट वरिष्ठ उपाध्यक्षम तेजेन्द्रजंग शाही, उपाध्यक्षमा गणेशबहादुर केसी र ज्योति कोइराला, महिलामा राधिका कुइकेल खनाल, सेवा क्षेत्रमा नेत्रविक्रम थापा, उत्पादन क्षेत्रमा ललित श्रेष्ठ, अनौपचारिक क्षेत्रमा राजेश चालिसे उम्मेदवार छन् ।

त्यस्तै, महासचिवमा अजय राई, उपमहासचिव खुलामा बलदेब तामाङ र जनार्दन भट्टराई महिलामा सुशीला घिमिरे, सेवा क्षेत्रमा देवदत्त बडू, उत्पादन क्षेत्रमा लक्ष्मण कुर्मी, अनौपचारिक क्षेत्रमा रुक्मणी थापा उम्मेवार छन् । कोषाध्यक्षमा संजय दाहाल र सहकोषाध्यक्षमा रसमाया गुरुङ उम्मेदवार छन् ।

कुँवर प्यानल परिवर्तन गरेर अध्यक्षका उम्मेदवार बनेका हुन् । उनले अघिल्लो महाधिवेशनमा इतर समूहबाट महासचिव जितेका थिए ।

उनले गुटको आधारमा चुनाव नलडेको बताए । ‘पार्टीभित्र गुट भए पनि यो चुनावमा के गुट भन्ने ? गुटको आधारमा हामी मैदानमा आएका होइनौँ,’ कुववरले शिलापत्रसँग भने ।

अध्यक्षका अर्का प्रत्यासी यादवले पनि गुटको छाया नपरेको बताए । ‘के गुट भन्ने कांग्रेसभित्र दुईभन्दा बढी गुट छन् । हामी दुईजना मैदानमा छौँ । यो चुनावलाई गुटको आधारमा हेर्न हुँदैन ।’

समूह फेरेका कुवँरलाई कांग्रेस संस्थापनको मत आउने र सम्बन्धका आधारमा इतर समूहको पनि मत आउनेमा ढुक्क देखिन्थे । प्रतिस्पर्धी नै नभएको अवस्थामा समूह फेरेका कुवँरले चुनौती दिए पनि त्यो औपचारिकता मात्र हुनेमा यादव ढुक्क देखिन्थे ।

चुनावी अंकगणित बुझ्ने प्रतिनिधिको भनाइ थियो, ‘अध्यक्षमा जसले जिते पनि थोरै मतको मात्र अन्तर पर्छ । माथिको (पार्टी) समीकरणमा कसले कुसलाई च्यापेको छ त्यसमा भर पर्छ ।’