बिरालाेसँग खेल्दै खान पाइने क्याट क्याफे (भिडियाे)

A+ A A-

विश्वका धेरै देशमा क्याट क्याफे लोकप्रिय व्यावसायिक अभ्यास हो । क्याट क्याफे सोचमा सञ्चालित रेस्टुरेन्ट, रिडिङ रुम तथा आरामदायी व्यवसायहरू धेरै देशमा निकै लोकप्रिय छन् । तर, नेपालमा भने त्यस प्रकारको व्यावसायिक अभ्यास त छैन नै, अझ क्याट अर्थात् बिरालोलाई हाम्रो समाजले अलच्छिनको प्रतीकका रूपमा मान्यो। यसलाई गलत मान्दै रोहन पाण्डेले क्याट क्याफे सञ्चालन गरेका छन् ।

उनले यस्तो व्यवसाय किन सञ्चालन गरे ? यसबारे थाहा पाउनुभन्दा पहिले उनका बुबाको पृष्ठभूमि थाहा पाउनुपर्छ ।रोहनका बुबा दिल्ली करोलवाघमा जुत्ताको होलसेल व्यवसायी थिए । जतिबेला रोहन दिल्लीमा अर्थशास्त्र अध्ययन गरिरहेका थिए । त्यहाँ रहँदा रोहनलाई नेपाली मःम खान नपाएर छटपटि हुन्थ्यो । ७० सालतिरको कुरा हो । करोलवाघमा रोहनले नेपाली स्वादको मःम खान नपाएकै कारण आफैँले लाखे नाममा नेपाली रेस्टुरेन्ट सुरु गरे ।

भारतीय भूमिमा लाखे राम्रो चल्यो । यसले रोहनलाई रेस्टुरेन्टप्रतिको मोह जाग्यो । तर, अध्ययन पूरा भएसँगै उनलाई नेपाल नै फर्किन मन लाग्यो । केही गर्ने सोचमा नेपाल आए पनि । नेपाल आएसँगै के गर्ने भनेर सोच्न थाले । अन्त्यमा कृषि क्षेत्र त्यसमा पनि माछा पालनप्रति आकर्षित भए । नवलपरासीमा माछा पालन व्यवसाय सुरु गरे । नवलपरासी माछ्य पालन सुरु गरेका रोहनले काठमाडाैंको बजारलाई नियाले ।

काठमाडाैं जस्तो ठूलो बजार नेपालको अन्य कुनै ठाउँ रहेनछ भन्ने बुझे । तर काठमाडाैंमा मछ्य पालनका लागि पर्याप्त जमिनको अभाव र वातावरणीय दृष्टिले समेत उपयुक्त नरहेको विज्ञहरूले उनलाई सुझाए । उनी काठमाडाैंको थोरै ठाउँमै कसरी माछा पालन गर्न सकिन्छ भनेर अध्ययन गर्न थाले । त्यही क्रममा माछापालन र त्यसको थप व्यावसायिक अध्ययनका लागि थाइल्याण्ड पुगे ।

थाइल्याण्डमा पहिलो पल्ट रोहनले क्याट क्याफेको उत्कृष्ट व्यावसायिक अभ्यास देखे । जसबाट उनी निकै प्रभावित भए । नेपालमा कतिपयले अलच्छिनको प्रतीकका रूपमा परिभाषित गर्ने बिरालो खासमा लच्छिनकाे प्रतीक पो रहेछ भन्ने महसुस गरे ।

उसो त रोहनकी श्रीमती बिरालो प्रेमी थिइन् । उनले घरमा तीन–चार वटा बिरालो पालेकी थिइन् । थाइल्याण्डको क्याट क्याफेको अभ्यास देखेर प्रभावित भएका रोहनले श्रीमतीलाई त्यसबारे सुनाएसँगै लेखा परीक्षकको पेसा छाडेर श्रीमतीले नै क्याट क्याफे सञ्चालनबारे प्रस्ताव गरिन् । त्यपछि झम्सिखेलस्थित उनको अडिटिङको कामका लागि भाडामा लिइएको ठाउँमै क्याफे खोल्न दुई जना सहमत भए । र तीन महिनाअघि नेपालकै पहिलो क्याट क्याफे सञ्चालनमा आयो ।

नेपालकै लागि नौलो अभ्यास अर्थात् क्याट क्याफे सञ्चालनमा ल्याएका रोहन दम्पती सुरुवाती दिनमा ग्राहकको आर्कषणबाट निकै हौसिए । ग्राहकको सुझावबाट सिक्दै र क्याट क्याफेमा रहेका कमिकमजोरीलाई क्रमिक रूपमा सुधार गर्दै लगे । हाल उनीहरूले क्याट क्याफेमा छिर्नुअघि केही नियम निर्धारण गरेका छन् । 'बाहिरको फोहोरबाट बिरालोमा आउनसक्ने रोगलाई मध्यनजर गर्दै– रोग आउने माध्यमलाई नियन्त्रण गर्न जुत्ता खोल्ने र हात स्यानिटाइज गराएर मात्र प्रवेश गराउछौँ', रोहनले भने ।

हुन त क्याट क्याफेले कमाउने भनेको खानाका परिकार बिक्री गरेरै हो । तर, पछिल्लो समय खानाभन्दा बिरोलो हेर्न, बिरालाेसँग खेल्न तथा फोटो खिच्न, टिकटक बनाउन आउनेको संख्या धेरै भएपछि क्याट क्याफेले नयाँ नियम ल्यायो ।
अर्थात प्रवेश शुल्क तिरेरमात्र भित्र प्रवेश गर्न पाउने क्याट क्याफेको नियम रहेको छ । एक व्यक्ति बराबर चार सय रुपैयाँ प्रवेश शुल्क निर्धारण गरेको क्याट क्याफेले सो मूल्य बराबरको खाना निशुल्क उपलब्ध गराउने गरेको छ ।

भिडियाे हेर्नुहाेस् :