सत्ता गठबन्धनभित्रै मोर्चाका नाममा उपगठबन्धन बनेपछि के सोचिरहेको छ कांग्रेस ?

सत्ता गठबन्धनभित्रै मोर्चाका नाममा उपगठबन्धन बनेपछि के सोचिरहेको छ कांग्रेस ?

A+ A A-

सत्ता गठबन्धनमा रहेका केही दलहरूले ‘बार्गेनिङ पावर’ बढाउन समाजवादी मोर्चाकाे नाममा एकीतृत हुँदैछन् । सत्ता गठबन्धनकाे सबैभन्दा ठूलाे कांग्रेसलाई बाहिर राखेर बन्न लागेकाे याे गठबन्धन मूलत: वामपन्थीहरूकाे हाे । सत्ता गठबन्धन मात्र नभएर संसदकै सबैभन्दा ठूलाे दल कांग्रेसलाई बाहिर राखेर सत्ता गठबन्धनमै उपगठबन्धन बन्न लागेपछि त्यसले सत्ता गठबन्धनकाे भविष्य कसरी अगाडि बढ्छ भन्ने चासाे बढेकाे छ ।

आज घाेषणा हुन लागेकाे मोर्चामा सत्ताकाे नेतृत्व गरिरहेकाे माओवादी केन्द्र र सत्ता सहयात्री दल नेकपा एकीकृत समाजवादी तथा जसपा छन् । र कुनैबेला माओवादीमै रहेका र पछि भूमिगत राजनीति गरेका नेत्रविक्रम चन्दकाे नेकपा पनि माेर्चामा छ । र माेर्चाकाे नेतृत्व सरकारकाे नेतृत्व गरिरहेका पुष्पकमल दाहाल प्रचण्डले गर्दैछन् । यसरी बन्न लागेकाे माेर्चा संसदमा निर्णायक तेस्राे शक्तिका रूपमा उदाउने भएपछि कांग्रेसले यसलाई कसरी लिएकाे छ त्यसले सत्ता गठबन्धनकाे भविष्य निर्धारण गर्नेछ ।

मोर्चालाई देखाएर सत्ता गठबन्धन र एमालेसँग बार्गेनिङ पावर बढाउन प्रधानमन्त्री प्रचण्डले थाती रहेका योजना अहिले ब्युँताएको बुझाइमा कांग्रेस छ । मोर्चाबन्दीबाट कांग्रेसले चिन्ता लिनुनपर्ने प्रचार विभाग प्रमुख मीन विश्वकर्मा बताउँछन्।

‘कांग्रेस समसामयिक राजनीतिक दलहरूभन्दा छुट्टै विचारधारा बोकेको ए कमात्र दल हाे । अन्य दलहरूको गठजोड वा बिर्सजनमा हामीले चिन्ता लिनुपर्ने आवश्यकता छैन,’ विश्वकर्माले भने, ‘सकरात्मक कुरा नेपालमा छरिएर रहेका वामपन्थी दलहरू निश्चित विचारधारमा एकठाउँमा बसे भने त्यसले दलीय व्यवस्थालाई मजबुत बनाउँछ ।’

प्रचण्डले सरकार रहँदा होस् या बाहिर रहँदा नयाँ काम गर्न खोज्ने भएकाले अहिलेको मोर्चाबन्दीलाई स्वाभाविक रुपमा लिनुपर्ने कांग्रेसको बुझाइ छ । एमाले लगायतका दलहरूसँग मोर्चाबन्दी भए पनि कांग्रेसलाई प्रभाव नपर्ने विश्वकर्मा बताउँछन् ।

‘आफ्नाे भविष्यका बारेमा चिन्ता गरिरहेका दलहरूलाई एकल चिन्ताबाट सामूहिक चिन्ता गर्न एकै ठाउँमा बसेर काम गर्न वातावरण बनाउन लागेका हुन्,’ उनले भने, ‘सरकारभन्दा बाहिर रहेका ठूला दलहरूसँग मोर्चाबन्दी वा कार्यगत एकता गरेको भए शंका गर्ने ठाउँ थियो । सँगै बसेका दलहरू भएकाले शंका गर्नुपर्ने, आत्तिनुपर्ने अवस्था छैन ।’

संसदीय गतिविध सजिलाे बनाउन माेर्चा बनाउन लागिएकाे बताउँछन् नेकपा एसका प्रवक्ता जगनन्नाथ खतिवडा ।‘संसदमा गतिविधि गर्न सजिलो पार्ने कुरा मात्र छ यसमा । संसदमा समाजवादी चिन्तन बोकेका राजनीतिक दलहरूका एक ठाउँमा उभिने, देशका मागहरू सम्बोधन गर्न संयुक्त पहल गर्ने नै यसको प्रमुख उद्देश्य हो,’ खतिवडाले शिलापत्रसँग भने । समाजवादी प्रणालीकाे अर्थ व्यवस्था, राजनीतिक संस्कृति विकासका लागि आवाज उठाउने उनले बताए । पार्टी एकतासम्म नभएर दलहरूको फेडेरेसन रुपामा मोर्चाबन्दी गरिएको उनले बताए ।

हालकाे मन्त्रिपरिषद्का २५ सदस्यमध्ये प्रधानमन्त्री, मन्त्री र राज्यमन्त्री गरेर १२ जना मोर्चाबाट हुनेछन् । प्रधानमन्त्री प्रचण्डसहित डा. बेदुराम भुसाल कृषि तथा पशुपंक्षी विकास, अशोककुमार राई शिक्षा, विज्ञान तथा प्रविधि, शक्तिबहादुर बस्नेत ऊर्जा, जलस्रोत तथा सिँचाई, रेखा शर्मा सञ्चार तथा सूचना प्रविधि, सुदन किराती संस्कृति, पर्यटन तथा नागरिक उड्डयन,. अमनलाल मोदी संघीय मामिला तथा सामान्य प्रशासन, प्रकाश ज्वाला भौतिक पूर्वाधार तथा यातायात, वीरेन्द्रप्रसाद महतो वन तथा वातावरण मन्त्री छन् । त्यस्तै, राज्यमन्त्रीमा सुशिला सिर्पाली ठकुरी संस्कृति, पर्यटन तथा नागरिक उड्डयन, नन्दा चपाई भौतिक पूर्वाधार तथा यातायात, प्रमिला कुमारी शिक्षा, विज्ञान तथा प्रविधिमा समाजवादी मोर्चाको प्रतिनिधित्व रहेनछ ।

कांग्रेसका मन्त्रीहरू पनि समाजवादी मोर्चाले सरकारलाई फरक नपर्ने बताउँछन् । ‘मोर्चाले सरकार वा कांग्रेसलाई खासै असर पार्ने सम्भावना म देख्दिँन । बार्गेनिङ पावर होला आगामी चुनावमा सँगै लड्नेसम्म भए पनि कांग्रेसलाई प्रभाव पार्ने अवस्था छैन,’ महिला तथा बालबालिकामन्त्री सुरेन्द्रराज आचार्यले शिलापत्रसँग भने ।

सरकार र सदनमा बार्गेनिङ पावर प्रचण्डको मात्र नबढेर मोर्चामा आबद्ध दलहरू सबैको बढेको एकीकृत समाजवादीका प्रवक्ता खतिवडाले बताए । ‘बार्गेनिङ पावर बढ्न नहुने छ र ? प्रचण्डको मात्र होइन सबैको बढ्छ । सबै मिले र जुटे भने त देशको बार्गेनिङ पावर बढ्छ । अमेरिका, भारत, चीन जस्ता देशका लागि पनि बार्गेनिङ पावर बढाउने माध्यम पनि हुन सक्छ यो,’ उनले भने ।

कांग्रेसले संसदमा पनि यसबारे चिन्ता गर्नुनपर्ने सचेतक सुशीला थिङ बताउँछिन् । ‘अरु दलहरूको मोर्चाबन्दी हो । त्यो पनि बन्दै छ । यसले कांग्रेसलाई असर गर्देन । यसमा टिप्पणी नगरौं,’ कांग्रेस सचेतक थिङले भनिन् ।

प्रकाशित मिति: सोमबार, असार ४, २०८० १३:३९