आम्दानीमा ह्रास आउँदा हेटौँडाको बजेट २ अर्ब ६० करोडमा झर्‍यो

A+ A A-

बागमती प्रदेशको मुकाम हेटौँडा उपमहानगरपालिकाले शनिबार नीति तथा कार्यक्रम र बजेट एकैसाथ ल्याएको छ ।

आगामी आर्थिक वर्ष २०८०/८१ का लागि उपमहानगरले १३ औं नगरसभामार्फत २ अर्ब ६० करोड ६५ लाख ४० हजार रुपैयाँ बराबरको अनुमानित बजेट सार्वजनिक गरेको छ । उपमेयर राजेश बानियाँद्वारा प्रस्तुत बजेट चालु आर्थिक वर्ष २०७९/८० को भन्दा ११ करोडले कम हो । चालु आवमा उपमहानगरले ११ औं नगरसभाको दोस्रो बैठकमा २ अर्ब ७१ करोड ७९ लाख रुपैयाँ बराबरको बजेट सार्वजनिक गरेको थियो ।

उक्त बजेट १४ पुस २०७९ मा भएको १२ औं नगरसभाबाट संशोधन गरेर ३ अर्ब ५ करोड बनाइएको थियो । अघिल्लो आर्थिक वर्ष २०७८/७९ को ३७ करोड रुपैयाँभन्दा बढी जिम्मेवारी सरेर आएको योजना तथा कार्यक्रमको रकम भुक्तानी गर्नु परेको भन्दै बजेट संशोधन गरेर ३ अर्ब बढाइएको हो । चालु आर्थिक वर्षमा २१ करोड रुपैयाँ मात्रै जिम्मेवारी सरेर जाने देखिएको उपमहानगरका प्रवक्ता एवम् १ नम्बर वडा अध्यक्ष सविन न्यौपानेले जानकारी दिए ।

उपमहानगरको दुई मुख्य आम्दानीमा ह्रास आएपछि बजेट घटाउनु परेको प्रवक्ता न्यौपानेले जानकारी दिए । जग्गा वर्गीकरणका कारण हेटौँडामा घरजग्गाको कारोबार ठप्प भएपछि मालपोत कर धेरै घटेको उनको भनाइ छ । देशका ठूला शहरहरुमध्ये पछिल्ला वर्ष घरजग्गाको धेरै कारोबार हुनेमा हेटौँडा पनि पर्छ । ‘हाम्रो मुख्य स्रोत नै घरजग्गाको कारोबारबाट उठ्ने मालपोत कर हो । जग्गा वर्गीकरणले करमा ह्रास आएपछि बजेट घटाउनु पर्‍यो,’ न्यौपानेले भने ।

बजेट घट्नुमा मालपोत कर मात्र नभई नदीजन्य पदार्थ उत्खनन रोकिनु र संघीय तथा प्रदेश सरकारबाट अनुदान घरेर आउनु पनि हो । राप्तिलगायतका खोलाबाट नदीजन्य पदार्थ उत्खनन् गर्न नसकिएपछि आम्दानी खुम्चिएको न्यौपाने बताउँछन् । ‘हाम्रो दोस्रो ठूलो आम्दानी नदीजन्य पदार्थ थियो । यसवर्ष नदीजन्य पदार्थ उत्खनन गर्न नपाएपछि आम्दानी घट्न पुग्यो,’ उनले भने । प्रवक्ता न्यौपानेका अनुसार खोलाको वातावरणीय प्रभाव मुल्यांकन हुन नसक्दा नदीजन्य पदार्थ उत्दनन हुन नसकेको हो ।

उपमहानगरले आगामी आवका लागि सामाजिक विकासतर्फ ९२ करोड ९२ लाख, पूर्वाधार विकासमा ३८ करोड ४० लाख रुपैयाँ, आर्थिक विकासतर्फ ११ करोड ६७ लाख तथा वातावरण तथा विपद् व्यवस्थापनमा ७ करोड १५ लाख विनियोजन गरेको छ ।

आन्तरिक स्रोतबाट ८३ करोड ६६ लाख ६२ हजार ७० रुपैयाँ, राजस्व बाँडफाँटबाट ५९ करोड १४ लाख १० हजार ७ सय ३० रुपैयाँ, प्रदेश सरकारबाट ३ करोड ३४ लाख ६८ हजार रुपैयाँ र संघीय सरकारको अनुदानबाट १ अर्ब १४ करोड ५० लाख रुपैयाँ व्यहोरिने नगर उपप्रमुख बानियाँले नगरसभालाई जानकारी दिए ।

उपमहानगरले एकीकृत बसपार्क तथा टर्मिनल भवन निर्माण गर्न ८ करोड, हेटौँडा–४ मा बासुदेव बहुउद्देश्यीय व्यापारिक भवन निर्माण गर्न २ करोड, पदमपोखरी मुख्य सडक विस्तार कार्यका लागि ३ करोड ५० लाख रुपैयाँ विनियोजन गरेको छ ।

यसैगरी, हेटौँडाले चालु आवमा पूँजीगतमा कूल एक अर्ब ६५ करोड ३९ लाख ८७ हजार बजेट विनियोजन गरेकोमा हालसम्म ७० करोड ७९ लाख १३ हजार रुपैयाँ र वित्तीय व्यवस्थातर्फ एक करोड १५ लाख विनियोजन भएकोमा ८५ लाख ६५ हजार रुपैयाँ मात्र खर्च भएको जनाएको छ ।

प्रकाशित मिति: शनिबार, असार २, २०८० १६:०९