'हिजो आजका कुरा' हुँदै कमेडीमा जमेका सन्तोष, अचेल ११ वर्षीया छोरी सुएशासँगै पर्दामा (भिडियोसहित)

'हिजो आजका कुरा' हुँदै कमेडीमा जमेका सन्तोष, अचेल ११ वर्षीया छोरी सुएशासँगै पर्दामा (भिडियोसहित)

A+ A A-

सन्तोष खनाललाई अभिनयप्रति बाल्यकालदेखि नै गहिरो रूचि थियाे । तर, त्याे बेला कलाकारितालाई हेर्ने सामाजिक दृष्टि खासै चित्तबुझ्दाे थिएन ।

नेपाली कला क्षेत्र आजजत्तिको व्यावसायिक पनि थिएन । त्यसैले पनि कला क्षेत्रमा लागेर जीविकोपार्जन गर्न सम्भव थिएन । यही कारण सन्ताेषका बुबा चाहन्थे, छाेरा यो क्षेत्रमा नलागोस् ।

२०५१ सालको पुस महिना थियो । सन्तोष काठमाडौंको तुलसी मेहर स्कुलमा कक्षा ६ मा पढ्थे । अभिभावक दिवसको दिन शिक्षकबाट नाटक मञ्चन गर्ने निर्णय भयो । त्यस नाटकका लागि शिक्षकले नै विद्यार्थी कलाकारकाे नाम छाने । सूचीमा सन्तोषकाे नाम पनि थियाे ।

नाटकमा उनले अभिनय गरे । उनको अभिनय देखेर सबैले प्रशंसा गरे । त्यसपछि नै हो, उनमा अभिनयप्रति झन् साचाे बढकाे । शिव श्रेष्ठ, राजेश हमाल, सरोज खनाल, निर शाह तथा मदन कृष्ण, हरिवंशलगायतको अभिनय देखेर उनी प्रेरित हुन्थे । उनीहरूजस्तै कसरी बन्ने भन्ने सोच्थे । उनीहरूले गर्ने अभिनय शैलीको अभ्यास गर्थे ।

उसो त आफ्नो छोरो शिक्षक बनोस् भन्ने उनका बुबाको चाहना थियो । तर, सन्तोषमा अभिनयको अटुट छाप बसिसकेको थियो । उनले मनमनै अभिनयमा नै लाग्ने निर्णय गरिसकेका थिए ।

०००

सन्तोषले २०६० सालमा अथक प्रयासपछि तत्कालीन चर्चित टेलिभिजन कार्यक्रम हिजोआजको कुरामा अभिनय गर्ने मौका पाए । त्यसपछि तितो सत्य, जिरे खुर्सानी, मेरी बास्यै, लगन जुर्लाजस्तो छ, जय होस् जस्ता टेलिफिल्ममा काम गरे । त्यसपछि भने उनी नेपाली कलाकारिता क्षेत्रमा त्यो पनि हास्य विधाको कलाकारका रूपमा उदाए ।

तिनै सन्तोष, जसलाई अभिनयमा नलागोस् भन्ने चाहना उनका बुबाले राखेका थिए, तथापि आफ्नो सन्तानलाई आफ्नो चाहनाअनुरूप होइन, उनीहरूले इच्छाएकै बाटोमा हिँड्न दिनुपर्छ, अनि मात्र कुनै पनि काममा शतप्रतिशत दिन सक्छन् र सफलता हात पार्न सक्छन् भन्ने मान्यता भने उनमा थियो ।

सन्तोषको अभिनयबाट प्रभावित छोरी सुएशापनि बुझ्ने भएदेखि अभिनयमा रमाउन थालिन् । उनले सानै उमेर भए पनि सन्तोषलाई घरमा अभ्यास गर्ने क्रममा साथ दिन्थिन् ।

२०७५ सालमा सुयशा ६ वर्षकी थिइन् । साइवरमार्फत हुने बालदुर्व्यवहार नियन्त्रण गर्न भोइसअफ चिल्ड्रेनको प्रस्तुतिमा एउटा टेलिभिजन कार्यक्रम बनाउनुपर्ने भयो । जसमा नाट्य शैलीमा बाबुछोरीको प्रस्तुति राख्नुपर्ने थियो ।

सुयशाको अभिनय राम्रो भएकाले पनि निर्माताको तर्फबाट छोरीलाई पनि राख्न प्रस्ताव आयो ।

सन्तोष, सुयशासहितकाे अभिनयमा जनचेतनामूलक टेलिभिजन कार्यक्रम तयार भयो । उक्त कार्यक्रमलाई मात्र होइन, सन्तोषसँगै सुयशाको अभिनयलाई धेरैले मन पराए ।

कोरोनाकालको लकडाउनमा जनचेतनामूलक तथा अन्य विभिन्न विषयमा घरबाटै तयार गरेर सुयशाका भिडियोहरू सन्तोषले सामाजिक सञ्जालमार्फत प्रसारण गरिदिए ।

उक्त भिडियोमा उनको अभिनयलाई धेरै दर्शकले मन पराए । सामाजिक सञ्जालमार्फतै उनी लोकप्रिय बन्न सफल बनिन् ।

हिजाेआज स्कुलमा साथीहरूले उनको नामबाट नभएर भाइरल गर्ल भनेर चिन्ने गरेको सुएशाबताउँछिन् ।

उट्पट्याङ भूमिका गर्न रुचाउने सुएशाअहिले उमेरले ११ वर्षकी भइन् । पढाइमा अब्बल उनी अभिनय सिक्ने प्रयास गरिरहेको र भविष्यमा अझ राम्रो गर्ने बताउँछिन् ।

सन्तोष आफैँ पनि कलाकारिता क्षेत्रलाई सानोतिनो दु:ख आएकै भरमा नछाड्ने र आगामी जीवनमा निरन्तर यस क्षेत्रमा लागिरहनेबाहेक अन्य कुनै सोच नभएको बताउँछन् । शिलापत्र स्टुडियोमा सन्तोषले हामीसित आफ्नो करिअर, संघर्ष र आगामी योजनाबारे बताएका छन् । साथै छोरी सुएशार उनको कमेडीसमेत तल उपलब्ध भिडियोमा हेर्न सकिने छ ।

भिडियाे..

प्रकाशित मिति: शनिबार, असार २, २०८० ०८:००