सुदूरपश्चिम सरकारले ल्यायो २९ अर्ब २६ करोडको बजेट (पूर्ण पाठ)

A+ A A-

सुदूरपश्चिम प्रदेश सरकारले आर्थिक वर्ष २०८०-८१ का लागि २९ अर्ब २६ करोड ५९ लाख रुपैयाँको बजेट ल्याएको छ ।

शुक्रबार प्रदेशसभा बैठकमा बजेट पेस गर्दै आर्थिक मामिलामन्त्री नरेशकुमार शाहीले आगामी आर्थिक वर्ष २०८०-८१ को लागि २९ अर्ब २६ करोड ५९ लाख रुपैयाँ विनियोजन गरेको जानकारी दिएका हुन् ।

चालुतर्फ ९ अर्ब ५९ करोड रुपैयाँ र पुँजीगततर्फ १७ अर्ब २ करोड रुपैयाँ छुट्याइएको छ । यसअघि सुदूरपश्चिम प्रदेश सरकारले चालु आर्थिक वर्ष २०७९-८० का लागि ३६ अर्ब ७४ करोड ६४ लाख ६५ हजारको बजेट ल्याएको थियो । अन्तर सरकारतर्फ २ अर्ब ३४ करोड ७५ लाख ७० र वित्तीयतर्फ ३० करोड रुपैयाँ विनियोजन गरेको अर्थमन्त्री शाहीले बताए ।

आगामी आर्थिक वर्षका लागि अनुमान गरिएको खर्च व्यहोर्ने स्रोतमध्ये आन्तरिक राजस्वबाट १ अर्ब ५० करोड, संघीय सरकारबाट ९ अर्ब ४१ करोड १७ लाख, संघीय रोयल्टीबाट ६ करोड ५६ लाख, वित्तीय समानीकरण अनुदानबाट प्राप्त हुन आएको आठ अर्ब ५२ करोड ३ लाख, चालु आर्थिक वर्षको बजेटबाट बचत हुने विनियोजन ३ अर्ब ८६ करोड ६७ लाख २४ हजार, सशर्त अनुदानबाट ४ अर्ब ५१ करोड १६ लाख, संघीय समपूरक अनुदानबाट ७७ करोड, विशेष अनुदानबाट ६२ करोड रुपैयाँ अनुमान गरिएको मन्त्री शाहीले बताए ।

मन्त्री शाहले स्थानीय तहलाई समानीकरण ८० करोड ६१ लाख ३५ हजार, सशर्ततर्फ ३९ करोड ४३ लाख ५० हजार, सञ्चित कोषमा २९ करोड ७९ लाख ४६ हजार, समपूरक ६३ करोड ८९ लाख ८५ हजार र विशेषतर्फ ४० करोड ८१ लाख रुपैयाँ बजेट विनियोजन गरेको बताए ।