विदेशको लाखौँ कमाइ त्यागेर नेपाल फर्किए, अनि खोले स्वीमिङ पुल (भिडियो)

A+ A A-

सन् २००७ पछि अध्ययनका लागि नेपाली विद्यार्थीको पहिलो रोजाइमा पर्ने गन्तव्यमध्येको मुलुक हो, अस्ट्रेलिया । काठमाडौंका हुनेखाने परिवारमा जन्मिएका निरेश बोहोरा सन् २००८ मा अध्ययनका लागि अस्ट्रेलिया पुगे । घरमा हुँदा निरेशलाई कुनै कुराको अपुग थिएन । एक प्रकारले भन्ने हो भने, आमाबुबाको काखमा रमिरहेका निरेशको अस्ट्रेलिया पुगेपछि जीवनको नयाँ अध्याय नै सुरु भयो ।

उनलाई अस्ट्रेलियामा मान्छेको जीवन भेडाबाख्राको भन्दा फरक लागेन । खानकै लागि मरिमेटेर काम गर्नेबाहेक त्यहाँका मानिसले दोस्रो कुनै उद्देश्य बोकेको देखेनन् । अध्ययनका लागि अस्ट्रेलिया पुगे पनि उनलाई त्यहाँ कुनै न कुनै काम नगरी खान र बस्न सम्भव थिएन । ठूलै कसरतमा तीन महिनापछि एउटा काम फेला पारे ।

निरेश ५४ डिग्री तापक्रममा गार्डेनिङको काम गर्थे त्यहाँ । उनले भारी बोक्ने, भाँडा माझ्नेदेखि शौचालय सफा गर्नेसम्मका काम गरे । तर, जस्तो काम गरे पनि अस्ट्रेलियामा कामको सम्मान र श्रमको मूल्य भने थियो । यद्यपि नेपालमा रहँदा आमाको ममता र बुबाको सहारामा हुर्केका उनी अस्ट्रेलियाको सामाजिक परिवेश र जीवनशैलीमा जिउन नसक्ने निर्णयमा पुगे । त्यसपछि उनी दुई वर्षपछि नै स्वदेश फर्किए । त्यसबेला नेपालमा उनको भाइले कपडा व्यवसाय गरिरहेका थिए ।

निरेशले अस्ट्रेलियामा कमाएको पैसा भाइको व्यवसायमा लगानी गरेर भाइसँगै मिलेर कपडा व्यवसाय गर्न थाले । त्यसको आठ महिनापछि माल्दिभ्सको एउटा कलेजबाट अध्ययको अवसर आयो । उनी फेरि अध्ययनका लागि माल्दिभ्स पुगे । माल्दिभ्समा अध्ययन गरेर सेफ बनेपछि त्यहीँ विभिन्न होटलमा करिब डेढ वर्ष काम गरे र नेपाल फर्किए ।

माल्दिभ्समा हुँदै निरेशले नेपाल आएर पृथक् व्यवसाय गर्ने सोच बनाइसकेका थिए । अस्ट्रेलियाको सिड्नीस्थित ओलम्पिक पार्कमा स्वीमिङ पुलको व्यावसायिक अभ्यासबारे राम्ररी अध्ययन गरेका उनी आफैँ पनि स्वीमिङका पारखी हुन् । उनले नेपालमा स्वीमिङ पुल व्यवसायको राम्रो सम्भावना देखे । माल्दिभ्सका हाटहरूमा पनि स्तरीय स्वीमिङ पुल देखिरहेकै थिए ।

एक दिन साथीभाइसँग चिया खाने क्रममा निरेशले नेपालमा स्वीमिङ पुल व्यवसायको सम्भावनाबारे सुनाए । सहकार्यका लागि साथीहरूलाई आह्वान गरे । क्षितिज पौडेल, सागर ढुङ्गाना र राजकुमार कोइराला उनको व्यावसायिक सोचप्रति आकर्षित मात्र भएनन्, सहकार्य नै गर्न तयार देखिए । त्यससँगै पेप्सिकोलास्थित मनोहरा खोला किनारमा उपयुक्त स्थान पनि फेला पारे । अनि सुरु भयो स्प्लास स्वीमिङ पुल ।

सुरुवाती दिनमा त स्प्लासलाई निरेशले सोचेको भन्दा धेरै साथ मिल्यो । दिनमै ७ सयभन्दा धेरै मान्छेको घुइँचोलाई व्यवस्थापन गर्न स्प्लासलाई मुस्किल पर्‍यो । तर, केही महिनापछि सुरु भएको भारतको नाकाबन्दी र त्यसको केही समयपश्चात् कोरोना महामारीको चपेटामा परेको स्प्लासलाई निरन्तरता दिन निरेशले कम चुनौतीको सामना गर्नु परेन । त्यति नै बेला सागर ढुङ्गाना र राजकुमार कोइरालाले व्यवसायबाट हात झिके ।

निरेश आफैँले हिम्मत हार्न थाले । निरेश एक प्रकारले हरेस नै खाने अवस्थामा पुगे । क्षितिज पौडेलले उनलाई हामी गर्न सक्छौँ भनेर भर दिए । त्यस्तो अवस्थामा पनि निमेश सिटौला र विशाल थापाले निरेशसँग व्यावसायिक सहकार्य गर्न तयार भए । अनि स्प्लासले पुन: निरन्तरता पायो ।

०००

‘मुख्यत: गर्मी मौसमको छ महिनामध्ये चार महिना मात्र पूर्ण सञ्चालनमा रहने स्वीमिङ पुल व्यवसायको सम्भावना नेपालमा धेरै राम्रो छ,’ निरेश बताउँछन् । यसपालि अत्यधिक गर्मी बढेकाले पनि स्प्लासमा पौडी खेल्न आउनेको संख्या उच्च छ ।

हाल स्वीमिङ ट्रेनिङका लागि मात्र स्प्लासमा डेढ सयभन्दा धेरैले सदस्यता लिएका छन् । सदस्यता नलिएका, पौडी खेल्नै मात्र आउनेको संख्या सयभन्दा बढी नै छ । शनिबार भने २ सयभन्दा बढी व्यक्ति पौडी खेल्न आउने गरेको निरेश बताउँछन् ।

स्प्लासले हाल १५ जनाभन्दा बढीलाई रोजगारी दिइरहेको निरेश बताउँछन् । उनी भन्छन्, ‘विदेशमा लाखौँ कमाउनुभन्दा आफ्नै देशमा थोरै कमाए पनि यहाँ पाएको आत्मसम्मान र सन्तुष्टिलाई पैसासँग तुलना गर्न नसकिने रहेछ ।’

भिडियाे हेर्नुहाेस्: