न्यायाधीशलाई अभियुक्तको गुनासो- सुत्ने बेलासमेत सासै फेर्न दिइँदैन, दमको बिरामी छु

न्यायाधीशलाई अभियुक्तको गुनासो- सुत्ने बेलासमेत सासै फेर्न दिइँदैन, दमको बिरामी छु

A+ A A-

नक्कली भुटानी शरणार्थी प्रकरणको जारी थुनछेक बहसमा आइतबार अधिवक्ताहरू न्यायाधीशले खोज्दा भेटिएनन् । ४ बजेर २० मिनेट जाँदा प्रतिवादीहरू सन्दीप रायमाझी र टेकनारायण पाण्डेका तर्फबाट ७ जना अधिवक्ताहरूले बहस गरे ।

पाण्डेका तर्फबाट वरिष्ठ अधिवक्ता रमण श्रेष्ठले बहस गर्न बाँकी रहेको पनि इजलासमा जानकारी गराइयो । न्यायाधीश प्रेमप्रसाद न्यौपानले अरु प्रतिवादीहरूको अधिवक्ता खोजे पाएनन् ।

इजलास खाली भयो । न्यायाधीश न्यौपानेको असन्तुष्टि हुन स्वभाविक भैहाल्यो । यत्तिकैमा प्रतिवादी शमशेर मिया अधिवक्ता उभिएर बहस गर्ने पोडियममा पुगे । उनी पोडियममा भने उक्लिएनन् । गएर गुनासो राखे ।

‘हामीलाई दरबारमार्गबाट हिजो टेकु लगियो त्यहाँ राम्रो वातावरण भएन ...’ मियाका सुरक्षामा खटिएका प्रहरी पनि नजिकै पुगेका थिए । न्यायाधीश न्यौपानेले भने, ‘गुनासो सुनुवाइ गर्नू .. ।’ प्रहरीले 'हवस्' भन्ने जवाफ दिए ।

इजलासमा बहस नभएकाले हो हल्ला थियो । मियाले थप गुनासो राखिरहे । त्यो प्रष्ट सुनिने थिएन ।

त्यतिबेला अर्का प्रतिवादी टेकनाथ रिजाल पुगे । उनले अभिनय गरेरै (ढल्किएर इशारा गर्दै ..) ‘सास फेर्न समेत दिइँदैन । सुत्ने ठाउँमा सासै फेर्न पाइँदैन दमको बिरामी छु ...’ भन्दै गुनासो राखे ।

उनले पनि लामै गुनासो सुनाए । न्यायाधीश न्यौपाने समय खेर गएको र तोकिएको समयमा बहस सक्नुपर्ने दबाबमा थिए । इजलास कक्षमा गल्याङमल्याङ हल्ला भैरह्यो ।

गुनासो प्रष्ट नबुझिएपछि मियासँग केही कुरा गर्न सञ्चारकर्मीलगायतको समूह पुग्यो । यतिबेला उनी दर्शकदीर्घामा आइसकेका थिए ।

‘हामीलाई हिजो दरबारमार्गबाट टेकु सारियो । त्यहाँ प्रहरीका कनिष्ठदेखि वरिष्ठ अधिकारीहरूले सम्मान गर्थे । एउटा अभियुक्त र प्रहरीबीचको हार्दिकता थियो । तर, टेकुमा भिड धेरै, केही पनि म्यानेज छैन । प्रहरीले गर्ने व्यवहार नै मानवीय छैन । बोल्ने शैली समेत छैन,’ उनले भने, ‘साह्रै गाह्रो छ । बस्न सकिँदैन ।’

मियाले आफू धार्मिक मान्छे भएको र नमाज पढ्न पनि नपाएको गुनासो गरे । 'म धार्मिक मान्छे हुँ । दैनिक पाँच पटक नमाज पढ्ने गरेको छु । टेकुमा निकै समस्या परेको छ,' मियाले भने, 'प्रहरी पनि खराब छन् । कसैले कुरा सुन्दैनन् । किनेको पानीले मुख धुनुपर्छ ।'

प्रकाशित मिति: आइतबार, जेठ २८, २०८० १७:२३