त्रिदेशीय अपराधमा चिनियाँ नागरिक फेङचेङको भूमिका शंकास्पद, विशेष ब्युरोले थाल्यो अनुसन्धान

त्रिदेशीय अपराधमा चिनियाँ नागरिक फेङचेङको भूमिका शंकास्पद, विशेष ब्युरोले थाल्यो अनुसन्धान

A+ A A-

२२ जेठमा त्रिभुवन विमानस्थलबाट एक जना चिनियाँ नागरिक शंकास्पद अवस्थामा पक्राउ परे । २० जेठमा मात्रै नेपाल आएका चिनियाँ नागरिक फेङचेङ वेन २२ जेठमा त्रिभुवन विमानस्थलहुँदै क्वालालम्पुर जान खोज्दा पक्राउ परेका हुन् ।

विमानस्थला सुरक्षामा खटिएका प्रहरीले विशेष जाँच गर्दा उनले बोकेको लगेजमा विभिन्न मुलुकका अवैध मुद्रा फेला परेपछि उनलाई नियन्त्रणमा लिएको हो । प्रहरीले उनको साथबाट विभिन्न देशका गरेर करिब ६० लाख नगद बरामद गरेको थियो ।

प्रहरीका अनुसार उनको साथबाट नेपाली रुपैयाँ ९ लाख ८ हजार, भियतनामी मुद्रा ४० लाख ५० हजार, कम्बोडियन रियल ५ हजार, भारतीय रुपैयाँ ८ हजार ४ सय ६०, लावसियन मुद्रा २ लाख ५० हजार, सिङ्गापुर डलर २ सय ४२, मलेसियन रिङ्गेट ३ सय ५१, चिनियाँँ २१ युआन, अमेरिकी डलर २ हजार र थाई भाट १ लाख १३ हजार बरामद गरेको थियो ।

प्रहरीले फेङचेङ वेनलाई थप अनुसन्धानका लागि राजस्व अनुसन्धान विभाग हरिहरभवन पठाएको छ । उनीसँग ठूलो मात्रामा विभिन्न मुलुकका अवैध मुद्रा कसरी पुग्यो भन्नेबारेमा प्रहरीको विशेष ब्युरोले समेत अनुसन्धान थालेको छ ।

ब्युरोका एक अधिकारीले भने, ‘उनको भूमिका शंकास्पद छ । विभिन्न मुलुकका मुद्रा उनीसँग भेटिएको छ । उनी अन्तरदेशीय अपराधमा संलग्न हुन सक्ने आशंकामा हामीले अनुसन्धान थालेका हौँ ।’

राजस्व अनुसन्धान विभागले भने विदेशी मुद्रा अपचलन मुद्दामा अनुसन्धान थालेको छ । विभागको अनुसन्धानबाट फेङचेङले सिटिजन्स बैंक इन्टरनेसनलमा १ करोड २ लाख रुपैयाँ डिपोजिट गरेको समेत देखिएको छ ।

अनुसन्धानमा खटिएका विभागका एक अधिकारीले भने,‘ उनीसँग नगदबाहेक बैंकमा समेत १ करोड २ लाख रुपैयाँ डिपोजिट गरेको देखिएको छ । हामीले बैंकसँग पनि त्यसको डिटेल मागेका छौँ ।’ ती अधिकारीका अनुसार चिनियाँ नागरिकले प्रहरी र विभागका कर्मचारीसँग बयानमा कुनै कुरा बताएका छैनन् । विभागले दोभाषेको प्रयोग गर्दासमेत उनले बोल्न अस्वीकार गरेका छन् । उनी तीनपटक नेपाल आएको खुलेको छ ।

प्रहरीले उनको मोबाइलबाट केही खुल्न सक्ने आशंका गर्दै अनुसन्धान थालेको छ । पछिल्लो समय चिनियाँ नागरिकले नेपाललाई आपराधिक थलोको रूपमा प्रयोग गरेर आपराधिक गतिविधि बढाएको प्रहरीको तथ्यांकले देखाएको छ ।

२३ जेठमा मात्रै प्रहरीको केन्द्रीय अनुसन्धान ब्युरो (सीआईबी) अन्तर्राष्ट्रिय कल तथा एसएमएस बाइपास गरेर अवैध धन्धा चलाउने एक चिनियाँ र नेपाली नागरिक पक्राउ परेका थिए । प्रहरीले चिनियाँ नागरिक झाओ जियाङपेङ र नेपाली नागरिक गणेश श्रेष्ठलाई ललितपुरबाट पक्राउ गरेको हो । चीनको शान्छी स्थायी बसोबास भएका झाओ ६३५९३७८ नम्बरको पासपोर्टसहित ललितपुरको महालक्ष्मी नगरपालिका ५, टीकाथलीको खरिबोटस्थित कान्छु बुढाथोकीको घर भाडामा लिएर अवैध धन्धा चलाउँदै आएको प्रहरीको अनुसन्धानबाट खुलेको छ ।

प्रहरीले चिनियाँ नागरिकले भाडामा लिएको घरबाट २ सय ५६ वटा पोर्ट, चारवटा राउटर, दुईवटा ल्यापटप, १ सय २८ वटा एन्टेना, चारवटा मोबाइल साथै नेपाली, चिनियाँ, इन्डोनेसियन, ब्राजिलियन, म्यानमार, अमेरिकी र हङकङका गरी ठूलो मात्रामा नगदसमेत बरामद गरेको थियो ।

साथै, पक्राउ परेका दुवै जनामाथि दूरसंचार ऐन, २०५३ अन्तर्गत मुद्दामा ललितपुर जिल्ला अदालतबाट म्याद थपको अनुमति लिएर थप अनुसन्धान भइरहेको प्रहरीले जनाएको छ ।

प्रकाशित मिति: आइतबार, जेठ २८, २०८० १३:५१