टोपबहादुर रायमाझीकाे बचाउमा टेकनाथ रिजाललाई स्वस्थ नरहेकाे देखाउने वकिलहरूकाे प्रयास

टोपबहादुर रायमाझीकाे बचाउमा टेकनाथ रिजाललाई स्वस्थ नरहेकाे देखाउने वकिलहरूकाे प्रयास

A+ A A-

शुक्रबारको थुनछेक बहसका क्रममा नक्कली भुटानी शरणार्थी प्रकरणका प्रतिवादी टोपबहादुर रायमाझीका तर्फबाट १० जना अधिवक्ताले बहस गरे । रायमाझीलाई प्रतिवादी/सहप्रतिवादी टेकनाथ रिजाल, सानु भण्डारी र केशव दुलालले पोलेका थिए ।

रिजालले भण्डारीले फोन गर्दा काठमाडौं नआएको र रायमाझीले फोन गर्दा काठमाडौं आएको बयान दिएका थिए ।

शुक्रबार बहसलाई रायमाझीले ध्यान दिएर सुनेका थिए । बसहमा रिजालको ‘माइन्ड कन्ट्रोल’ ले चर्चा पायो । पूर्व महान्यायाधिवक्ता रमेश बडालले रिजालको दिमाग कसैले नियन्त्रण गरेको हुनसक्ने जिकिर गरे । उनले रिजालले लेखेका पुस्तक ‘माइन्ड कन्ट्रोल’ र ’टर्चर किलिङ सफ्टली’ को प्रसंग निकाले ।

रिजाललाई नेपालबाट पक्राउ गरी भुटानमा हिरासतमा राख्दा कसरी यातना दिएको तथा उनको माइन्ड कसरी कन्ट्रोल गरेको भन्ने अंश वाचन गर्दै इजलासमा उनले भने, ‘उहाँले जे कुरा भन्न खोज्नुहुन्छ त्यो कुरा कन्भे गर्न सक्नुहुन्न भनेर पुस्तकमा लेखिएको छ । आजको सवाल जवाफमा पनि आजपर्यन्त त्यसको प्रभाव छ भनिएको छ,’ उनले इजलासमा भने, ‘उहाँको विषयलाई लिएर प्रमाण हुन सक्दैन । माइन्ड कन्ट्रोल अर्कैले गरेको अवस्थामा प्रमाण लिन मिल्दैन ।’

रिजालले बयान गर्नुपछाडि भूराजनीतिक कारण पनि हुन सक्ने उनले आशंका गरे । ‘अहिले पनि टेकनाथजी भुटानी राजाको प्रमुख दुस्मन नै हो । उहाँलाई उनीहरूले आफ्नो देशमा फिर्ता लिन मानेका छैनन्,’ उनले थपे, 'उहाँले आफ्नो पुस्तकमा नै पनि माइन्ड कन्ट्रोल भुटानी राजाले दिएको गिफ्ट हो भनेर लेख्नुभएको छ । जीवनको उतरार्द्धमा दोषी देखाउन प्रयोग गएिन भन्न सकिँदैन ।’

अर्का वरिष्ठ अधिवक्ता सुशील पन्तले रिजालको शरीरमा ‘चिप्स नै इन्स्टल’ भएको हुनसक्ने आशंका गरे । ‘माइन्ड आफ्नो नियन्त्रणमा छैन भन्ने कुरा त उहाँले आफ्नै पुस्तकमा लेखिसक्नुभएको छ,’ उनले आशंका गर्दै भने, ‘प्लेनलाई चिप्समार्फत नियन्त्रण गरिन्छ, त्यसरी नै उहाँको शरीर र माइन्डलाई त्यही नियन्त्रण गर्न उहाँको जिउमा चिप्स पनि जडान भएको हुनसक्छ ।’

त्यसअघि उनले रिजालले बोलेको कुरा र स्मरण शक्तिमा प्रश्न उठाए । ‘बोलेका कुरा, स्मरण शक्ति माइन्डको स्थिरता र एकरुपता कति छ ?,’ उनले भने ।

अर्की अधिवक्ता आकृती रायमाझीले पनि ‘माइन्ड कन्ट्रोल’ को प्रसंग निकालिन् । ‘माइन्ड कन्ट्रोलबाट पीडित भएको मान्छेको आधारमा हामीलाई अभियोजन गरियो,’ उनले भनिन् ।

अर्का अधिवक्ता करुणाबहादुर मल्ल्किले त रिजालले मस्तिष्कले काम नगर्ने भनेको रुपमा अर्थ्याए । ‘उहाँ आफैँले ब्रेनले काम गर्दैन भन्नुभयो । यसमा हामीले धेरै बोलिरहन जरुरी छैन,’ इजलासमा उनले भने ।

बहसकर्ताहरूले रायमाझी निर्दोष रहेको दाबी गर्दै थुना बाहिर राखेर मुद्दाको पुर्पक्ष गर्न आग्रह गरे । थुना बाहिर रहे पनि मुद्दा प्रभावित पार्न नसक्ने उनीहरूको जिकिर थियो ।

प्रकाशित मिति: शुक्रबार, जेठ २६, २०८० २१:४३