याे देशमा सियाे पनि बन्दैन भन्थे, असीमले सुरु गरे 'यात्री' माेटरसाइकल

A+ A A-

जित्नेहरूले कुनै फरक काम गर्दैनन् । उनीहरू त हरेक काम फरक ढङ्गले गर्छन् ।

भारतीय मूलका विश्वप्रसिद्ध लेखक शिव खेडाको यो भनाइलाई असीम पाण्डेले प्रमाणित गरेका छन् । जसले नुनदेखि सुनसम्म आयात गर्ने देशमा सियो पनि बन्दैन भन्ने आमधारणालाई गलत साबित गरिदिएका छन् । ‘यात्री’ नामक मोटरसाइकलको ब्रान्ड स्थापित गरेर उनले ‘नेपालमा गरे के हुँदैन ?’ भन्ने बलियो उदाहरण पेस गरेका छन् ।

तर, उनले यो सफलता रातारात हात पारेका भने होइनन् । यो सफलताको पछाडि देखेका सपना र त्यसलाई पूरा गर्न गरेको वर्षौंको मिहिनेत र निरन्तरताको महतत्वपूर्ण भूमिका छ ।

चितवनको भरतपुरमा जन्मिएका उनी एक वर्षको हुँदै उनको परिवार काठमाडौंको बूढानीलकण्ठ बसाइसराइ गरेर आएको थियो । उनको बाल्यकाल बूढानीलकण्ठमै बित्यो । बाल्यकालदेखि नै मोटरसाइकलप्रति औधी रुचि राख्ने उनले ४ कक्षामा हुँदा नै मोटरसाइकल चलाउन सिके ।

७ कक्षामा पुग्दा इन्जिनियरिङ विषयप्रति आकर्षित भएका असीम कार डिजाइनर बन्ने सपना देख्न थाले । प्लस टु पूरा गरेसँगै नेपालमा कार डिजाइन पनि सिक्ने र उच्च शिक्षा पनि पूरा गर्ने सोच बनाएका उनले नेदरल्यान्ड्सलाई आफ्नो सपना पूरा गर्ने देशका रूपमा देखे र त्यतै हानिए ।

इन्जिनियरिङ विषयको उच्च शिक्षा अध्ययनका लागि नेदरल्यान्ड पुगेका असीमले त्यहाँको शैक्षिक प्रणालीकै कारण पढाइसँगै प्रत्यक्ष रूपमा उत्पादन र त्यसको बजारीकरणसम्मको विषयलाई अनुभूत गर्ने अवसर पाए । त्यहीँबाट स्नातकोत्तरसम्मको अध्ययन पनि पूरा गरे ।

नेदरल्यान्डको साइकल संस्कारका कारण त्यहाँ सात वर्ष रहँदा असीमको समय साइकल चलाएरै बित्यो । साइकल चलाउँदा उनको एक जना साथीको ढाडमा अत्यधिक पसिना आउँथ्यो । त्यो देखेर उनले चलाउन सहज चलनचल्तीको भन्दा कम थकान हुने साइकलको परिकल्पना गर्न थाले र ‘यात्री’ नामको डोमेन सुरु गरे । नेपालमा नै फर्किने निर्णयमा पुगेका उनी नेपालमा सोही 'यात्री' नाममा हेर्दा पनि आकर्षक देखिने इलेक्ट्रिक साइकल उत्पादन गर्ने सोचले स्वदेश फर्किए ।

तर, नेपाल फर्किएसँगै यहाँको बजारलाई नजिकबाट नियालेपछि उनी साइकल होइन, मोटरसाइकल उत्पादन गर्ने निर्णयमा पुगे ।

हेर्दा पनि आकर्षक देखिने स्वरुपमा इलेक्ट्रिक मोटरसाइकलको उत्पादनको काम थालेका असीम र उनको समूहले यात्रीको पहिलो व्यावसायिक उत्पादका रूपमा यात्री पी वान तयार पारे ।

नेपालको भौगोलिक अवस्थालाई मध्यनजर गरेर तयार गरिएको यात्रीको पी वान बजारमा पस्किन उनलाई त्यति सहज भने भएन । नेपालमै यात्री नामको मोटरसाइकल उत्पादन गरेर त्यसलाई कानुनी मान्यता प्राप्त गराउन सबैभन्दा बढी चुनौती भयो ।

पहिलो चरणका उत्पादन बजारीकरण गर्न बालुवाटारमा ‘आउटलेट’ खोलेको यात्रीले कानुनी रोकावटका कारण उत्पादन रोक्न बाध्य नै भयो । कानुनी चुनौतीलाई चिर्दै हिँडिरहेको यात्रीले आफ्नो पहिलो उत्पादन यात्री पी वानका करिब ८० वटा मोटरसाइकल बिक्री गर्न सफल भयो ।

०००

अनेकन उतारचढाव पार गर्दै निरन्तर अगाडि बढिरहेको यात्रीको उत्पादनमा गुणात्मक वृद्धि गर्दै मूल्य पनि आममानिसले खरिद गर्न सक्ने इलेक्ट्रिक मोटरसाइकलका रूपमा यात्रीलाई विकास गर्ने आगामी योजना रहेको असीम बताउँछन् ।

सरकारको पेट्रोलबाट वातावरणमैत्री विद्युतीय सवारी रुपान्तरणको अभियानमा आफूलाई सशक्त रूपमा उभ्याउँदै देशलाई आत्मनिर्भरको बाटोमा डोर्‍याउन यात्रीले चालेको पाइला, मारेको फड्को देशमै सपना देख्ने हर कोहीका लागि असीम साँच्चै प्रेरक बनेका छन् ।

भिडियाे हेर्नुहाेस्:

प्रकाशित मिति: शुक्रबार, जेठ २६, २०८० ०६:२१