शरणार्थी प्रकरणः बहसपछि ढुक्क देखिए केशव, बलियो अधिवक्ता खोज्दै खाँण

A+ A A-

नक्कली भुटानी शरणार्थी प्रकरणमा प्रतिवादी बहसको सुरुका अभियुक्त थिए केशव दुलाल । अघिल्ला दिनमा पातलो ज्याकेट र मास्कमा देखिने दुलाल बुधबार रातो हाफ टिसर्टमा इजलासमा हाजिर थिए । दिनैपिच्छे फरक सिटमा बसेका उनी आज न्यायाधीश आसनको पाँचौँ अन्तिम लरहमा थिए ।

११ बजे बहस सुरु हुनै लाग्दा केही तनावमा देखिन्थे दुलाल । सरकारी वकिलको बहसलाई गम्भीर रूपमा नलिएका उनी बुधबार एक-एक शब्द ध्यान दिएर सुनिरहेका थिए । बहसको पहिलो वकिल विकास भट्टराईको बहस नसकिँदै उनले लामो सास फेरे । अनुहारमा कान्ति देखिन्थ्यो । उनले अर्का वकिललाई आफूतिर बोलाएर केही कुरा ब्रिफ गराए । लामो सास ताने ।

गर्मी कोठामा बस्दा अनुहारमा देखिएको पसिना उनको अनुहारबाट कम हुँदै गयो । आफ्ना तर्फबाट ६ जना वकिलले बहस गरेपछि ढुक्क देखिए उनी । त्यसको केहीबेरपछि सानु भण्डारीको तर्फबाट विनोद शर्माले बहस थाले । त्यतिबेला निदाउन थाले दुलाल । ब्युँझिएपछि नजिककासँग कुराकानीम व्यस्त हुन्थे दुलाल ।

जिल्ला न्यायाधीश प्रेमप्रसाद न्यौपानेको इजलासमा केशव दुलालको तर्फबाट विकास भट्टराई, विकास थापा, विश्वास आचार्य, वरिष्ठ अधिवक्ता योगेन्द्र अधिकारी, नरबहादुर योगी र राजन भट्टर्राइले बहस गरे ।

त्यसपछि सानु भण्डारी र टंक गुरुङको लागि वकिलहरूले संयुक्त रूपमा बहस थाले । भण्डारीको तर्फबाट पहिलो बहस गरेका शर्मा गुरुङको तर्फबाट अन्तिममा बहस गर्न पुगे । सानु भण्डारीको तर्फबाट बिहीबार वरिष्ठ अधिवक्ता रमण श्रेष्ठले बहस गर्नेछन् । उनीहरूको तर्फबाट चुडामणि पोखरेल, वरिष्ठ अधिवक्ता शिवप्रसाद रिजाल, शालिकराम सापकोटा, शरद कोइराला, खडानन्द कँडेल, नृसिंहकुमार खत्रीले बहस गरे ।

अन्तिम लहरमा बसेका भण्डारी बहस चलिरहँदा अन्य वकिलहरूलाई आफूतिर बोलाएर छलफल गरिरहन्थे । बेला बेलामा नजिककाहरूसँग छलफल गर्नमा पनि व्यस्त रहे भण्डारी ।

चार दिनदेखि एकै बेन्चमा बसिरहेका प्रतिवादी टोपबहादुर रायमाझी बुधबार शान्त देखिन्थे । अघिल्ला तीन दिनजस्तो चटपटे शैली कम देखिन्थ्यो । उनले टिपोट पनि कमै गरेका देखिन्थो ।

अर्का प्रतिवादी बालकृष्ण खाँण रायमाझीकै लहरको अर्को बेन्चमा थिए । उनको खल्तिमा रहेको नोट प्याडमा विशेष अर्थ राख्ने कुराहरू टिपोट हुन्थ्यो । आवश्यक कुराहरू अर्का प्रतिवादी टेकनारायण पाण्डेसँग टिपाउथे ।

इजलासमा सँधै गम्भीर देखिएका पाण्डेको हातमा डायरी छुटेको थिएन । बहसलाई ध्यान दिएर सुनेका उनले महत्त्वपूर्ण कुराहरू टिपोट गरिहाल्थे ।

अघिपछि बहसलाई एकटकले सुन्ने अर्का प्रतिवादी आङटावा शेर्पा पनि बुधबार टिपोग गर्न व्यस्त थिए । मंगबार एकाध कुरा टिपोट गरेका उनले बुधबार ध्यान दिएर टिपोट गरेका थिए ।

बलियो तर्क गरेका वकिलहरूलाई आफ्नो तर्फबाट बहस गर्न खाँणको आग्रह थियो । त्यसलाई उनले प्राय खल्तिमा राख्ने सानो कागजी नोटप्याडमाा टिपोट गर्थे । टि-ब्रेकको समयमा एक वकिलले अर्का वकिललाई तयार रहन भन्दै थिए । ‘खाँणजीले उहाँको तर्फबाट तपाईंलाई पनि वकालत नामामा नाम लेखाउन भन्नुहुन्थो मैले नाम र नम्बर दिएको छु ...,’ एक अधिवक्ताले टेलिफोनमा कुरा गर्दै थिए ।

प्रकाशित मिति: बुधबार, जेठ २४, २०८० २१:१०