इजलासमा न्यायाधीशको प्रश्न– जाहेरवाला र प्रतिवादी सबै अमेरिका जान खोज्छन्, अमेरिकामा के रहेछ ?

इजलासमा न्यायाधीशको प्रश्न– जाहेरवाला र प्रतिवादी सबै अमेरिका जान खोज्छन्, अमेरिकामा के रहेछ ?

A+ A A-

नक्कली भुटानी शरणार्थी प्रकरणमा बुधबार सानु भण्डारी र टंक गुरुङको तर्फबाट अधिकांश वकिलले संयुक्त रूपमा बहस गरेका थिए । सानु भण्डारीका तर्फबाट सुरुमा बहस गरेका विनोद शर्माले टंक गुरुङको तर्फबाट अन्तिममा बहस गरेका थिए ।

सानु भण्डारीको तर्फबाट बिहीबार वरिष्ठ अधिवक्ता रमण श्रेष्ठले बहस गर्नेछन् । उनीहरूको तर्फबाट चुडामणि पोखरेल, वरिष्ठ अधिवक्ता शिवप्रसाद रिजाल, शालिकराम सापकोटा, शरद कोइराला, खडानन्द कँडेल, नृसिंहकुमार खत्रीले बहस गरे । अधिवक्ता सापकोटाले बहसलाई अन्तिममा पुर्‍याउनै लाग्दा जिल्ला न्यायाधीश प्रेमप्रसाद न्यौपानेले सोधे, ‘जाहेरवाला र प्रतिवादी सबै अमेरिका जान खोज्छन् । अमेरिकामा चाहिँ के रहेछ ?’

सापकोटाले पूर्वसांसदको उदाहरण दिए, ‘सल्यानतिरका एक जना सांसद अमेरिकामा गएर पेट्रोल पम्पमा काम गर्न थालेछन्, यता संसद ब्युँतिएपछि उनलाई बोलाइयो तर, उनले जवाफ दिएछन्, 'अमेरिकामा पेट्रोल पम्पमा काम गर्दैछु, अहिले फर्किन्नँ । अहिले यतिभन्दा भनिनँ श्रीमान् ।’

त्यसअघि उनले भण्डारीले शरणार्थी कार्यदलले बुझाएको प्रतिवेदन किर्ते नगरेको दाबी गरे । बहसका क्रममा उनले महाभारतको कथाको उदाहरण दिए । धृतराष्ट्र र सञ्जयको कथा सुनाउँदै सापकोटाले बहसमा भने, ‘यहाँ सानुलाई सञ्जय बनाउन खोजिएको छ ।’

अभियुक्त भण्डारीको काँधमा राखेर बन्दुक पड्काउने काम भएको उनको तर्क थियो । ‘केहीलाई मुद्दा चलाउने र केहीलाई नचलाउने अभियान छ, यहाँ सानुको काँधमा राखेर बन्दुक पड्काउने काम भएको छ ।’