शरणार्थी प्रकरणमा प्रतिवादीका वकिलको प्रश्न- आफ्नो र आफन्तको एक करोड बुझाउने मान्छे कसरी ठग हुन्छ ?

शरणार्थी प्रकरणमा प्रतिवादीका वकिलको प्रश्न- आफ्नो र आफन्तको एक करोड बुझाउने मान्छे कसरी ठग हुन्छ ?

A+ A A-

नक्कली भुटानी शरणार्थी प्रकरणका प्रतिवादीहरूको सुनुवाइ काठमाडौं जिल्ला अदालतमा बुधबारबाट सुरु भयो ।

जिल्ला न्यायाधीश प्रेमप्रसाद न्यौपानेको इजलासमा केशव दुलालको तर्फबाट विकास भट्टराई, विकास थापा, विश्वास आचार्य, वरिष्ठ अधिवक्ता योगेन्द्र अधिकारी, नरबहादुर योगी र राजन भट्टर्राइले बहस गरे ।

प्रतिवादी दुलालका वकिलहरूले उनीमाथि लगाइएको आरोप पुष्टि हुन नसक्ने दाबी गरे । दुलाल प्रतिवादी भए पनि आँफै पीडित भएको उनीहरूको दाबी थियो ।

‘दुलाले बयानमा सन्देश शर्माले आफू र आफ्ना मान्छेसँग अमेरिका पठाउने भन्दै एक करोड लिएको अवस्था छ । उहाँ आफैँ ठगीएको अवस्था छ । उहाँले ठगेको भन्नु नै गलत छ,’ बहसका क्रममा अधिवक्ता विकास भट्टराईले भने, ‘सन्देश शर्मासँग पैसा फिर्ता माग्दा उल्टै डर, धाक, धम्की दिएको र स्वयं ठगीमा परेको बयानमै बताएका छन् ।’

मुलकी अपराधसंहिता बमोजिम ठगीमा हुनुपर्ने तत्त्व नै नभएकाले दुलाले ठगी गरेको भन्न नमिल्ने उनको तर्क थियो ।

दुलालमाथि लगाइएको आरोप मात्र भएको उनको दाबी थियो । ‘दुलालले के गरेर सार्वभौम सत्तामाथि आँच पुर्‍यायो । यो यो कारण भनेर उदाहरणसहित देखाउनुपर्थ्यो । यो आरोपको लागि आरोप मात्र भयो,’ उनले बहसको क्रममा भने । उनले सामान्य धरौटीमा रिहा गर्नुपर्ने बताए ।

अधिवक्ता विकास थापाले शरणार्थीको बायोमेट्रिक गरे पनि त्यसको पुष्टि हुने आधार अभियोग पत्रमा नभएको जिकिर गरे । चितवनमा गएर बायोमेट्रिक गरेर २ करोड उठाएको पुष्टि कसरी हुन्छ भनेर उनले प्रश्न गरे । ‘बिगो दाबी गरिएको मुद्दामा बिगो बरामद हुनुपर्‍यो । यो अभियोग त दन्त्य कथाजस्तो मात्र भयो,’ उनले भने ।

जाहेरवालालाई गैरकानुनी काम हुँदै गरेको थाहा भएको र आफ्ना तर्फबाट पनि काम सम्पन्न भैनसकेको उनको बहस थियो । ‘जाहेरवाला स्वयं उफ्रेर आउनुभएको छ मलाई नक्कली बनाइदेउ भनेर,’ उनले भने ।

जति ठूला मान्छेलाई पोल्न सकियो उति मुद्दा बलियो हुन्छ भन्ने देखाइएको उनले बताए । ‘हाई–प्रोफाइल केस भएको भन्दै अभियोजन पक्षले २२४ पानाको अभियोगपत्र ल्याए पनि त्यसमा प्रमाण र तथ्यको अभाव देखिन्छ,’ उनले भने, ‘अभियोजन पक्षले उल्टै यसलाई ग्लोरिफाई गरेर मिडियामार्फत स्वतन्त्र न्यायपालिकालाई थ्रेट गर्न खोजेको देखिन्छ ।’

अर्का अधिवक्ता विकास आचार्यले प्रतिवादी दुलाले किर्ते नगरेको बताए । ‘कुन कागज किर्ते बनाए खै ?’ उनले बहसका क्रममा भने । वरिष्ठ अधिवक्ता योगेन्द्र अधिकारीले जाहेरवालार्लाइ सुरक्षा खतरा नरहेको बताए । ‘कुन प्रतिवादीले जाहेरवालालाई काट्छु र मार्छु भने ?’ बहसमा उनले प्रश्न गरे ।

अधिवक्ता नरबहादुर केसीले उचित धरौटीको माग राखे । अर्का अधिवक्ता राजन भट्टराईले अभियोगपत्र सुन्नलाई रमाइलो रहेको बताए । ‘अभियोग पत्र सुन्नलाई रमाइलो छ । यति ठगियो भन्ने आधार के ?’ उनले बहसको क्रममा प्रश्न गरे ।

प्रकाशित मिति: बुधबार, जेठ २४, २०८० १९:४७