कति छ सशस्त्र प्रहरीसँग गोताखोर तालिमप्राप्त जनशक्ति ?

A+ A A-

भक्तपुरस्थित सीटीईभीटीका कर्मचारी चढेको स्कार्पियो पाँच दिनअघि शुक्रबार सुनकोसी नदीमा खस्यो । बा१झ ७४६७ नम्बरको गाडीमा सीटीईभीटीका प्रशासन महाशाखाका निर्देशक सहसचिव ५७ वर्षीय कृष्णबहादुर केसी, विद्युत् प्रशिक्षक ३२ वर्षीय भानु पौडेल र यामप्रसाद भुर्तेल सवार थिए ।

गाडी सिन्धुलीको गोलन्जोर गाउँपालिका–७, लौकुनबाट सुनकोसी नदीमा खसेको थियो । गाडीका चालक ३१ वर्षीय कृष्ण चौधरी भने पौडिएर बाँच्न सफल भए । चार दिनदेखि सिन्धुलीस्थित सुनकोसी नदीमा बेपत्ता भएको गाडी मंगलबार राति मात्रै फेला पर्‍यो ।

नदीको करिब ३० फिट गहिराइमा सशस्त्र प्रहरी बलको गोताखोरको टोलीले गाडी फेला पारेको हो । गाडीभित्रै दुई जनाको शव पनि फेला परेको छ । एक जना भने अझै बेपत्ता छन् । प्रहरीले शव पोस्टमार्टमका लागि त्रिवि शिक्षण अस्पताल महाराजगञ्ज पठाएको छ ।

गाडीको खोजीका लागि सशस्त्र प्रहरी बलको विपद् व्यवस्थापन तालिम शिक्षालय कुरिनटारबाट सशस्त्र प्रहरी निरीक्षक सुवास थापाको नेतृत्वमा सात जना गोताखोरको टोली खटिएको थियो । सोही टोलीले चार दिनको निरन्तर प्रयासपछि गाडी फेला पारेको हो ।

बेपत्ता एक जनाको खोजीका लागि गोताखोरको टोली अझै सुनकोसी नदीमै परिचालित छ । सीमा सुरक्षाको पहिलो जिम्मेवारी पाएको सशस्त्र प्रहरी बलले विपद् व्यवस्थापनमा समेत उल्लेख्य काम गर्दै आएको छ ।

कति छ सशस्त्र प्रहरीसँग गोताखोर जनशक्ति ?

सशस्त्र प्रहरी बलले गोताखोर टोलीलाई बंगलादेशमा पठाएर तालिम दिँदै आएको थियाे । सामुद्रिक जलउत्पन्न प्रकोप बढी हुने बंगलादेश गोताखोर तालिमका लागि प्रख्यात छ ।

पछिल्लो समय भने सशस्त्र प्रहरी बलले त्रिशूली नदी र पोखराको फेवातालमै तालिम दिन थालेको छ । नेपालमा सामुद्रिक प्रकोपभन्दा बेगले बग्ने पानी, चिसो पानी बग्ने, बाढी आउनेजस्ता जलउत्पन्न जोखिमलाई मध्यनजर गरेर तालिम सुरु गरिएको सशस्त्र प्रहरी बलका प्रमुख आईजीपी राजु अर्यालको भनाइ छ ।

पछिल्लो गोताखोर समूहलाई सम्बोधन गर्दै आईजीपी राजु अर्यालले भनेका थिए, ‘पानीलाई आफ्नो कर्मथलो बनाउनु सहज छैन । तपाईंहरूले सिकेको सीपले देश र जनतालाई गर्व हुनेछ । पानीभित्र पखालिने तपाईंको पसिनाले पीडित परिवारभित्र खुसी छाउनेछ ।’

1 (9)1686123534.JPG

गत बुधबार सशस्त्र प्रहरीले २० जना नयाँ गोताखोर जनशक्ति बढाएको छ । पछिल्लो समूहलाई गण्डकी प्रदेश सरकारसमेतको सहयोगमा पाँच हप्तासम्म सैद्धान्तिक एवं प्रयोगात्मक तालिम दिइएको थियो ।

हालसम्म सशस्त्र प्रहरी बलसँग ७४ जना तालिमप्राप्त गोताखोर जनशक्ति छ । तालिमप्राप्त टोलीलाई जोखिमयुक्त जिल्ला र प्रदेशमा खटाइने सशस्त्र प्रहरी बलले जनाएको छ । सशस्त्र प्रहरी बलका सहायक प्रवक्ता डीएसपी शैलेन्द्र थापाका अनुसार सातवटै प्रदेशका बाहिनीमा ८ देखि १० जना गोताखोरको टोली उद्धारका लागि तैनाथी अवस्थामा छन् ।

सशस्त्र प्रहरी बलको विपद् व्यवस्थापन तालिम केन्द्रको तथ्यांकअनुसार जलउत्पन्न प्रकोपका हालसम्म २ सय २७ घटनामा सशस्त्र प्रहरीको गोताखोरको टोली खटिएको छ । जसमध्ये ३२ जनाको जीवितै उद्धार र २ सय ४४ शव निकालिएको छ ।

प्रकाशित मिति: बुधबार, जेठ २४, २०८० १३:४०