शक्ति सञ्चय गर्ने रणनीतिमा विप्लव

A+ A A-

केही दिनदेखि सामान्य गतिविधिमा रहेको नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिस्ट पार्टी फेरि सक्रिय हुन थालेको छ ।

बिहीबार रातिमात्रै सुनसरीको इटहरी उपमहानगरपालिकास्थित सुस्मा गोदावरी कलेज र धरान उपहानगरपलिकास्थित दिल्ली पब्लिक स्कुलमा बम विस्फोट गराउनुले विप्लव नेकपा फेरि देशभर सक्रिय हुन थालेको अनुमान सुरक्षा संयन्त्रले गरेको छ ।

त्यसो त २३ भदौंमा दुरसञ्चार प्रदायक कम्पनी एनसेलमा तालाबन्दीको घोषणा, २६ गते भ्रष्टचारीहरुको पुत्लामा कालोमोसो दल्ने योजना विप्लवको हस्ताक्षर रहेको विज्ञप्ति १४ भदौमै सार्वजनिक गरेपछि सुरक्षा निकायको अनुमानलाई यसले थप पुष्टि गरेको थियो ।

सरकारले विप्लव नेकपा विभिन्न विध्वंसात्मक गतिविधिमा संलग्न रहेको भन्दै २८ फागुनमा उसका गतिविधिमा प्रतिबन्ध लगाएको थियो ।

त्यसपछि सरकार प्रति आक्रामक रुपमा प्रस्तुत भएको विप्लव नेकपाले ठाउँ ठाउँमा बम विस्फोट र नेपाल बन्दको आव्हान गर्दै आएको छ ।

यस बीचमा विप्लव नेकपाका ८ जना कार्यकताले ज्यान समेत गुमाएका छन् । यसमध्ये तीन जनाले प्रहरीको गोली लागेर ज्यान गुमाएका हुन् भने अन्य ५ जनाको आफैंले बोकेको बम विस्फोट हुँदा मृत्यु भएको हो ।

ज्यान गुमाउनेहरुमा काठमाडौं, भोजपुर, कैलाली र सर्लाही जिल्लाका छन् । एकजना प्रहरी जवानलेपनि विप्लव समूहको गोली लागेर ज्यान गुमाउनु पर्यो ।

यसरी नै प्रहरीले विप्लव नेकपाका नेता कार्यकर्ता गरी ६ सय बढीलाई पक्राउ गरेर विभिन्न मुद्दा चलाएको छ ।

यो बीचमा सरकारले नेत्रविक्रम चन्द ‘विप्लव’ समूहका कार्यकर्ता पक्राउको सूचना सञ्चार माध्यममा नदिन सुरक्षा निकायलाई निर्देशन नै दिएको थियो । प्रहरीले हालसम्म विप्लव नेकपाका नेतृत्व तहकै १ सय ६० जना बढी पक्राउ गरिसकेको छ ।

शक्ति सञ्चयको रणनीतिमा विप्लव

सुरक्षा संयन्त्रको विश्लेषणअनुसार विप्लव नेकपा सयौ नेता, कार्यकर्ता पक्राउ र आफैंले बोकेका बम विस्फोटको कारण क्षति ब्येहोपछि कमजोर बन्दै गएको छ ।

त्यस्तै अन्य कार्यकर्तासमेत पछिल्लो समय निराश बढ्दै गएको पाइएको प्रहरी उच्च स्रोतको भनाइ छ । ‘चन्दाबाट संकलन गरेको रकम नेतृत्व तहमा मात्रै पुग्ने र कार्यकर्ता तहमा कुनै जानकारी नै नदेखिन थालेपछि कार्यकर्तामा निराशा देखिन्छ,’ एक उच्च प्रहरी अधिकारीले भने ।

मानवीय क्षतिको विवरणबारे विप्लव आफै जानकार रहेका कारण शक्ति सञ्चय गर्दै आक्रामक ढंगले उत्रिने योजना विप्लवको रहेको अनुमान छ ।

यसका लागि भित्रि रुपमा विप्लव समूह चन्दा संकलनमा सक्रिय रहेको प्रहरीको अनुमान छ । ललितपुर प्रहरीका अनुसार विप्लव नेकपाका कार्यकर्ता चन्दा माग्दै केही दिन अघिमात्र ललितपुरका सुन ब्यापारीहरुकोमा पुगेका थिए ।

त्यस्तै विप्लव नेकपासँग हतियारबारे ज्ञान भएका थोरैमात्र जनशक्ति भएका कारण भित्रीरूपमा तालिम प्रक्रिया चलाएका छन् ।

यसको लागि उनीहरुले चुरे आसपासको जंगललाई रोज्ने गरेको सूचना सुरक्षा निकायमा पुगेको छ ।

सुरक्षा निकायको विश्लेषणअनुसार विप्लव नेकपाले अहिलेकै अवस्थामा कुनै पनि हालतमा सुरक्षा निकायमाथि आक्रमण गर्न सक्ने अवस्था नरहेको जनाएको छ ।

प्रकाशित मिति: आइतबार, भदौ २२, २०७६ २१:५४