शरणार्थी प्रकरणः कट्टेलले इजलासमा पेस गरे पोलिएका ‘हाई प्रोफाइल’लाई पक्राउ गर्न मिल्ने नजिर

शरणार्थी प्रकरणः कट्टेलले इजलासमा पेस गरे पोलिएका ‘हाई प्रोफाइल’लाई पक्राउ गर्न मिल्ने नजिर

A+ A A-

नक्कली भुटानी शरणार्थी प्रकरणमा जारी थुनछेक बहसका क्रममा पोलिएका अन्य व्यक्तिलाई पनि अनुसन्धान गर्नुपर्ने विषय इजलासमा उठेको छ ।

जाहेरवालाको तर्फबाट बहस गरेका अधिवक्ता हरिप्रसाद कट्टेलले काठमाडौं जिल्ला अदालतबाटै थुनछेक बहसका क्रममा त्यसरी आदेशसमेत भइसकेको नजिर प्रस्तुत गरे ।

पूर्वप्रधानमन्त्री केपी शर्मा ओलीका सल्लाहकार डा. अजय क्रान्ति शाक्य, उनका स्वकीय सचिव राजेश बज्राचार्य, नेपाली कांग्रेसकी सांसद आरजु देउवा, मञ्जु खाँण, तत्कालीन गृहसचिव महेश्वर न्यौपाने, विचौलिया बेचन झासहित नाम मुछिएकालाई पक्राउ गरी छानबिन गर्न थुनछेक बहसकै क्रममा आदेश गर्न सकिने उनको जिकिर थियो ।

कट्टेलले २०७८–सी १–००२३ नम्बरको ठगी मुद्दालाई नजिरका रूपमा पेस गरे । ‘सौगात सुनुवारसमेतको किटानी जाहेरीमा दुईजना प्रतिवादीविरुद्ध ठगी मुद्दा दायर भएको थियो,’ उनले इजलासमा भने, 'त्यस मुद्दामा किटानी गरिएका दुई प्रतिवादीले इजलाससमक्ष बयान गर्दा तेस्रो प्रतिवादी नवराज ढकालको पनि नाम लिएपछि थुनछेक बहसकै क्रममा काठमाडौं जिल्ला अदालतले ढकाललाई पक्राउ गरी अनुसन्धान गर्न आदेश गरेको थियो ।’

नवराज ढकालको नाम किटानी जाहेरीमा थिएन ।

‘सोही मुद्दामा जाहेरीमा किटान गरिएका तथा पक्राउ गरिएका दुई जना प्रतिवादीले यही अदालतमा बयानका लागि ल्याउँदा ढकालको नाम पोलेका थिए,’ अधिवक्ता कट्टेलले भने,’ त्यसपछि इजलासबाट आदेश भई ढकाललाई पक्राउ गरी पेस गरिएको थियो ।’

पछि उक्त मुद्दामा थुनछेकका क्रममा २०७८ भदौ ३० गते काठमाडौं जिल्ला अदालतका न्यायाधीश कोमलप्रसाद आचार्यले ८ लाख धरौटी तारेखमा ढकाललाई रिहा गर्ने आदेश दिएका थिए ।

‘त्यो ठगी मुद्दामा धरौटी तारेखमा रिहा भएका ढकाललाई अहिले यही नक्कली शरणार्थी प्रकरणमा पनि प्रतिवादी बनाइएको छ श्रीमान्,’ कट्टेलले थपे, 'विगतमा जसरी ढकाललाई थुनछेककै क्रममा इजलासबाट पक्राउ गर्न आदेश भएको थियो त्यसैगरी यो नक्कली शरणार्थी प्रकरणमा पनि मौकामा बयान गरी पोलिएका व्यक्तिहरूलाई तत्काल पक्राउ गरी छानबिनको आदेश गर्न सकिन्छ ।’

त्यसैगरी जाहेरवालाको तर्फबाट बहस गरेका अर्का अधिवक्ता स्वागत नेपालले पनि अनुसन्धानका क्रममा छानबिनको दायरामा देखिएका हाई–प्रोफाइल व्यक्तिहरूलाई अझै नल्याएकोप्रति आपत्ति जनाएका थिए ।

‘मौकामा पक्राउ परेका प्रतिवादीहरूले प्रस्ट रूपमा तत्कालीन गृहमन्त्री रामबहादुर थापा बादल, उनकी श्रीमती नैनकला थापा, पूर्वप्रधानमन्त्री केपी शर्मा ओलीका स्वकीय सचिव राजेश बज्राचार्य, नेपाली कांग्रेसकी नेत्री आरजु देउवा, मञ्जु खाँणलाई नगद नै बुझाएको भनेर बयान गरेका छन् । त्यसको अडियो भिजुअल पनि छ । केपी शर्मा ओलीका सल्लाहकार अजय क्रान्ति शाक्य र केपी शर्मा ओली हुँदै पुष्पकमल दाहाल प्रचण्डसम्मको नाम पोलेको देखिन्छ,’ इजलासमा बहस गर्दै नेपालले भने, ‘ती हाई–प्रोफाइल व्यक्तिमध्ये कतिपयलाई नगदै बुझाएको भनिए पनि हालसम्म नतानिनुमा अनुसन्धान अधिकृतको निष्पक्षतामाथि पनि प्रश्न उठेको छ ।’

नेपालले पूर्व गृहमन्त्री बालकृष्ण खाँणलाई हतकडी नलाग्दा मोबाइल फर्म्याट गरेको बताए । ‘उहाँमाथि हत्कडी लागेन, त्यसैले चिठी च्यात्न पाउनुभयो, मोबाइल फर्म्याट गराउनुभयो,’ इजलासमा नेपालले भने ।

प्रकाशित मिति: मंगलबार, जेठ २३, २०८० २१:४०