केयू र धुलिखेल अस्पतालबीच दरार, सम्बन्ध तोड्‌न लागेको हो ?

A+ A A-

काठमाडौं विश्वविद्यालय र धुलिखेल अस्पतालबीच दरार आएको छ । सोमबार प्रधानमन्त्री निवास बालुवाटरमा बसेको सभामा सम्बन्ध तोड्ने विषयमा छलफल चलेको छ ।

‘सभामा सम्बन्धको विषय उठेको थियो । प्रधानमन्त्री र मन्त्रीले सहकार्यबाट अगाडि बढ्न भनेपछि रोकिएको हो,’ सभामा सहभागी एक सदस्यले भने ।

विवादको मुख्य कारण भने लेखापरीक्षण प्रतिवेदन हो । धुलिखेल अस्पतालका कारण दुई वर्षदेखि लेखापरीक्षण प्रतिवेदन बुझाउन नसकिएको केयूको तर्क छ । सभामा लेखापरीक्षण प्रतिवेदनको विषय उठ्दा सम्बन्धको विषय उठेको तर एजेन्डामा नलगिएको बताउँछन् रजिस्ट्रार अच्युत वाग्ले ।

‘पाँच वटा एजेन्डा थियो । धुलिखेल अस्पतालको एजेन्डा थिएन । स्कुल अफ मेडिकल साइन्सको हिसाब किताब दुरुस्त हुनुपर्‍यो भन्दा डिबेट भएको थियो,’ उनले भने । केयूको दुई वर्षदेखि पारित नभएको लेखापरीक्षण प्रतिवेदन हिजोको सिनेटले पारित गरेको छ ।

तर, धुलिखेल अस्पतालले लेखापरीक्षणको विवरण पठाउने गरेको दाबी गरेको छ । 'हामीले प्रत्येक वर्ष लेखापरीक्षण पठाउने गरेका छौँ । तर, यसपटक केयूका भीसीले नै समावेश नगरेको हो । उहाँकै कारण दरार आएको हो,' धुलिखेल अस्पतालका एक अधिकारीले भने ।

तर, सम्बन्ध तोड्न चाहेमा धुलिखेल अस्पतालले साढे ५ वर्षअघि नै सूचना दिनुपर्ने हुन्छ । अध्ययनरत विद्यार्थीलाई असर नहोस् भनेर सम्झौता गर्दा साढे ५ वर्षको समय राखिएको रजिस्ट्रार वाग्ले बताउँछन् ।

‘युनिभर्सिटीले सम्बन्ध तोड्न चाहेको होइन । थप सुदृढ बनाउने भनेका छौँ,’ वाग्लेले भने, ‘सम्बन्ध तोड्ने हो भने सूचना धुलिखेलले दिए पनि हुन्छ हामीले झिके पनि हुन्छ ।’

स्रोतका अनुसार केयूले स्कुल अफ मेडिकल साइन्सको खाता तान्ने तयारी गरेको छ । ‘स्कुल अफ मेडिकल साइन्समा उठाउने शुल्क (बैंक खाता) केयूअन्तर्गत ल्याउने तयारी छ । खाता उपकुलपति र रजिस्ट्रारको अन्तर्गत हुन्छ,’ केयू स्रोतले भन्यो ।

तर, रजिस्ट्रार वाग्ले त्यसमा सहमत छैनन् । ‘खाता सारेको छैन । स्कुल अफ मेडिकल साइन्समा उठेको शुल्क उसैले खर्च गर्ने हो,’ उनले भने ।

धुलिखेल अस्पतालका संस्थापक एवं केयूका पूर्वउपकुलपति रामकण्ठ मकाजू र उपकुलपति भोला थापाबीचको टकरावका कारण सम्बन्धमा दरार आएको केयू र अस्पतालका अधिकारीहरू बताउँछन् ।

केयू र धुलिखेल अस्पतालको सहकार्यमा सन् १९९८ देखि प्राथमिक स्वास्थ्य र नर्सिङ कोर्सबाट सुरु भएको थियो । सन् २००१ देखि एममबीबीएस सुरु भएको थियो । हाल धुलिखेलमा मेडिकलका ४ सय विद्यार्थी अध्ययनरत छन् ।

सभाले गरेको निर्णय