चर्च ब्वाइज बन्यो ए डिभिजन लिग च्याम्पियन

A+ A A-

चर्च ब्वाइज युनाइटेड फुटबल क्लब शहीद स्मारक ए डिभिजन लिगको च्याम्पियन बनेको छ । मंगलबार थ्रीस्टार क्लबसँग बराबरी खेलेसँगै चर्च ब्वाइजले आफ्नो डेब्यु लिगमै उपाधि जितेको हो ।

त्रिपुरेश्वरस्थित दशरथ रंगशालामा भएको खेलमा चर्च ब्वाइजले थ्रीस्टारसँग गोलरहित बराबरी खेलेको हो । खेलको १६औँ मिनेटमा थ्रीस्टारका लकेन लिम्बूले वान भर्सेस वानमा गोल गर्न सकेनन् । १७औँ मिनेटमा अञ्जन विष्टको क्रसमा आशिष चौधरीको हेडर गोलरक्षक अरुण ब्लोनले बचाएपछि चर्च ब्वाइजले गोल गर्ने अवसर गुमायो ।

२१औँ मिनेटमा अशोक खवासको पासमा अजयी मार्टिन्सको वान भर्सेस् वानको प्रहार पहिलो बारनजिकैबाट बाहिरिएपछि फेरि थ्रीस्टार गोल गर्नबाट चुक्यो । खेलको ३६औँ मिनेटमा अञ्जन विष्टको फ्रिकिक गोलरक्षक अरुणले पञ्च गर्दा कप्तान विक्रम लामाले क्लियर गरे । ३७औँ मिनेटमा एरिक विष्टको कर्नरमा अनन्त तामाङले गरेको हेडर अरुणले उत्कृष्ट बचाए ।

चर्च ब्वाइजले एक खेलअघि नै उपाधि जितेको हो । अब चर्च ब्वाइजले शुक्रबार आफ्नो अन्तिम खेल एफसी खुमलटारसँग खेल्नेछ । २५ खेलबाट ४५ अंक बनाउँदा चर्च ब्वाइज लिग च्याम्पियन बनेको हो । लिगको दोस्रो स्थानमा रहेको मछिन्द्र क्लबको २४ खेलबाट ३९ अंक छ । आजै भएको अर्को खेलमा एफसी खुमलटारले एपीएफ क्लबलाई पराजित गरेको छ ।

चर्च ब्वाइजको यात्रा

चर्च ब्वाइज युनाइटेड फुटबल क्लब २०६६ सालमा राष्ट्रिय खेलकुद परिषद्‌मा दर्ता भयो । त्यसपछि आधिकारिक रूपमा चर्च ब्वाइजले फुटबल यात्रा सुरू गरेको हो । सी डिभिजन छनोटदेखि ए डिभिजन प्रवेशसम्मको यात्रालाई हेर्ने हो भने चर्च ब्वाइजले छोटो समयमै राम्रो उपलब्धि पाएको छ ।

त्यसो त चर्च ब्वाइजले पाँचपटक सी डिभिजनको छनोट खेल्दा मात्रै सफलता मिलेको थियो । २०१८/१९ को संस्करणमा सी डिभिजनमा बढुवा भएको चर्च ब्वाइज २०२१ मै सी डिभिजन च्याम्पियन बन्यो । त्यसपछि २०२१/२२ को बी डिभिजन लिग च्याम्पियन भएसँगै चर्च ब्वाइज ए डिभिजन लिगमा उक्लिएको थियो । आफ्नो डेब्यु खेलमै चर्च ब्वाइजले उपाधि जित्दै ऐतिहासिक सफलता पाएको हो ।

प्रकाशित मिति: मंगलबार, जेठ २३, २०८० १७:०१