रोकिएन एसिड प्रहारका घटना, यस्तो छ सजायको व्यवस्था

A+ A A-

शुक्रबार वीरगञ्जस्थित रेशमकोठी स्थित त्रिभुवन उच्च माविमा ९ कक्षामा अध्ययनरत मुस्कान खातुनमाथि एसिड प्रहार भयो ।

बिहान ६ बजे स्कुल जाँदै गर्दा उनलाई छप्कैयामा एसिड प्रहार भएको हो । उनीमाथि एसिड प्रहार गर्ने छप्कैयाकै समसाद आलम र माबिद आलम रहेका थिए । उनलाई प्रहरीले पक्राउ गरिसकेको छ ।

मुस्कानलाई उपचारको लागि वीरगञ्ज स्थित नारायणी अस्पताल पुर्‍याएपनि त्यहाँ उपचार हुन नसकेपछि थप उपचारका लागि शुक्रबार नै काठमाडौंको कीर्तिपुर बर्न अस्पतालमा भर्ना गरिएको छ । उनको अवस्था सामान्य रहेको अस्पतालले जनाएको छ ।

पर्सा प्रहरी प्रमुख एसपी सोमिन्द्र राठौरकाअनुसार माबिद आलमले ६ महिनाअघि मुस्कानलाई जिस्काएका थिए । त्यही कुरा मुस्कानका बाबु रसुल अन्सारीले थाहा पाएपछि माबिदलाई गाली गरेका थिए ।

त्यसैको बदला लिन उनीहरुले मुस्कान माथि शुक्रबार एसिड प्रहार गरेको हो । एसिडले मुस्कानको दायाँ हात र छातीको भाग जलेको छ ।

यसरी नै १ जेठमा काभे्रका विष्णु भुजेलले सँगै बस्न नमानेको भन्दै श्रीमतीलाई एसिड प्रहार गरेर गम्भीर घाइते बनाए । उनले श्रीमती जेनी खड्कामाथि काठमाडौंको कालोपुल नजिक एसिड प्रहार गरेका थिए ।

एसिड प्रहार गरेर भक्तपुरतिर भागेका उनलाई प्रहरीले काँडाघारीबाट पक्राउ गरेको थियो । विष्णुले पटक–पटक घर आउन अनुरोध गर्दा श्रीमतीले नमानेपछि रिसको झोंकमा कालोपुल आएर कोठाबाहिर बोलाई एसिड प्रहार गरेको प्रहरीसँगको बयानमा दिएका थिए ।

यसरीनै ३ असोज २०७५ मा प्रेम प्रस्ताव अस्वीकार गरेको भन्दै रौतहट चन्द्रपुर–६ की १८ वर्षीया सम्झनाकुमारी दासमाथि ५० वर्षीय रामबाबु पासवानले एसिड प्रहार गरे । एसिडले उनको शरीरका विभिन्न ठाउँ जलेको छ ।

प्रहरी प्रधान कार्यालयको तथ्यांकअनुसार २०७० सालयता देशका विभिन्न ठाउँमा गरी १४ महिला र तीन पुरुषमाथि एसिड आक्रमण भएको छ ।

प्रहरीको तथ्यांकअनुसार २०७१–०७२ मा ३ जना, २०७२–०७३ मा २ जना, २०७३–०७४ मा १ जना, २०७४–०७५ मा २ जना र चालू आर्थिक वर्षमा ६ वटा एसिड प्रहारका घटना भएका छन् ।

त्यस्तै, यही अवधिमा तीन पुरुषमाथि समेत एसिड आक्रमण भएको प्रधान कार्यालयको तथ्यांकमा उल्लेख छ । महिलामाथि एसिड प्रहर गर्ने १४ जनालाई प्रहरीले पक्राउ गरेको छ ।

पक्राउ परेकामध्ये दुईजनालाई कर्तव्य ज्यान मुद्दा र १२ जनामाथि ज्यान मुद्दाअन्तर्गत कारबाही गरिएको प्रहरी प्रधानकार्यालले जनाएको छ । एसिड प्रकरणका अधिकांश घटना आफन्त र प्रेमसम्बन्धका कारण हुने गरेको प्रहरीको तथ्यांकले देखाएको छ ।

के छ कानुनी व्यवस्था ?

१ भदौ २०७५ बाट लागू भएको मुलुकी अपराध संहिताको दफा १९३ (२) मा कसुर गर्ने व्यक्तिलाई कसुरको प्रकृति हेरी कारबाही गरिने उल्लेख छ ।

यसमध्ये अनुहार कुरूप पारिदिएमा पाँच वर्षदेखि आठ वर्षसम्म कैद र १ लाख रुपैयाँदेखि ५ लाख रुपैयाँसम्म जरिमानाको व्यवस्था छ ।

अन्य अंगमा एसिड प्रहार गरेर क्षति पुर्याएमा तीन वर्षदेखि पाँच वर्षसम्म कैद र ५० हजार रुपैयाँदेखि ३ लाख रुपैयाँसम्म जरिमाना हुने व्यवस्था छ ।

घटनाको प्रकृति हेरेर दुवै सजाय हुने व्यवस्थासमेत छ । एसिड आक्रमणबाट मृत्यु भएमा प्रहार गर्ने्विरुद्ध कर्तव्य ज्यान मुद्दा र ज्यान मार्ने उद्योगमा मुद्दा चलाइने प्रहरीको भनाइ छ ।

प्रकाशित मिति: आइतबार, भदौ २२, २०७६ २०:२४