१ करोड २४ लाख लिएको कुरा इजलासमा आएपछि पाण्डेसँग खाँणकाे कानेखुसी

A+ A A-

नक्कली भुटानी शरणार्थी प्रकरणमा सोमबार दोस्रो दिन चार जना सरकारी वकिलले बहस गर्दा अब तीन जना वकिलले बहस गर्न बाँकी छ । आइतबार जिल्ला न्यायाधिवक्ता महेश खत्रीले बहस गरेका थिए भने जनक घिमिरेको बहस सुरु भएर सकिएको थिएन । सोमबार घिमिरेसहित सीताराम अर्याल, दिनेश भट्टराई र प्रकाश घिमिरेको बहस सकियो ।

बहसमा उनीहरूले प्रतिवादीहरूले मुद्दालाई प्रभावित पार्न सक्ने भएकाले धरौटीमा छाड्न नहुने र थुनामा पठाउनुपर्ने जिकिर गरेका थिए । सरकारी वकिलको बहसमा प्रतिवादीहरूको प्रतिक्रिया हेर्न लायक थियो ।

प्रतिवादीहरू बालकृष्ण खाँण, टोपबहादुर रायमाझी र ईन्द्रजित राई आइतबारकै बेन्चमा बसेका थिए । उनीहरू न्यायाधीशको दाहिनेतर्फबाट चौथो लहरको बेन्चमा थिए । अन्य प्रतिवादीहरूको भने आइतबारको भन्दा बसाइ फरक बेन्चमा थियो । अन्तिम बेन्चमा रमेश दुलाल र सानु भण्डारी थिए । टेकनाथ रिजाल न्यायाधीश आसनको तेस्रोपट्टि बेन्चमा कुनामा थिए ।

बस्न अप्ठेरो भएपछि रिजाललाई सानु भण्डारीको कुर्सीमा सारियो । भण्डारी आफू बसेको भन्दा बायाँतर्फको सिटमा गए । सो सिटमा भएका व्यक्ति रिजाल बसेको कुर्सीमा आए । बाहिर गएर भित्र आउँदा उनीहरूको सिट साटिने क्रम रह्यो ।

उनीहरूको प्रतिक्रिया आइतबारको भन्दा केही फरक थियो । खाँण सोमबार पनि गम्भीर देखिन्थे । तर, उनले इजलास कक्षमा सरकारी वकिलको बहस सुनेसँगै आफ्ना वकिलसँगको कुराकानी र अन्य प्रतिवादीहरूसँग कानेखुसी बढाए ।

सरकारी वकिलको तर्फबाट बहस गरिरहेका जनक घिमिरेले प्रतिवादीहरू खाँण, रायमाझी, पाण्डे, राई र रिजालको सहभागिताको विवरण एकपछि अर्को रूपमा पेस गरिरहेका थिए । उनले बहस गर्दा खाँण पूर्वमन्त्री र निर्वाचित सांसद रहेकाले उनको योगदानलाई सम्मान गर्नुपर्ने बताएका थिए ।

खाँणले खोजे प्रस्टता

घिमिरेले खाँणको संलग्नताको व्याख्या गर्दै लेनदेनको विषयमा पुर्‍याए । ‘उहाँले सचिव टेकनारायण पाण्डेबाट १ करोड २४ लाख लिनुभयो... ।' (अरुबाट लिएको व्याख्या गर्दै थिए)

शान्त रूपमा बहस सुनिरहेका खाँणमा केही नबुझेजस्तो भाव देखिन्थ्यो । असहज महसुस गरेका उनी आफू बसेको बेन्चको दाहिनेपट्टि छेउमा बसेका पूर्वसचिव पाण्डेतिर ढल्किएर कानुेखुसी गर्न थाले । ... हँ .. मैले भनेजस्तो भाव थियो । पाण्डेले केही कुरा बताए । त्यसपछि खाँणले बुझेँबुझेँ भन्ने भावमा टाउको हल्लाए ।

आइतबार सँगै भए पनि एकपटक मात्र कानेखुसी गरेका अर्का प्रतिवादी टोपबहादुर रायमाझीसँग सोमबार पटक–पटक कानेखुसी गरिरहेका थिए । आइतबार एक टकले बहस सुनेका खाँण सोमबार वकिलसँग पटकपटक सल्लाह गरिरहेका थिए । प्रतिवादीहरू भण्डारी र दुलालसँग पनि कुराकानी गरिरहेका थिए ।

रायमाझी शान्त

आइतबार चटपटे देखिएका रायमाझी सोमबार अलि शान्त देखिए । इजलासमा उठेको बहस टिप्न उनले डायरी प्रयोग गरिरहे । कुराकानी सोमबार बढी नै देखिन्थ्यो । न्यायाधीश प्रेमप्रसाद न्यौपानेले सरकारी वकिललाई ‘आरोप प्रमाणित हुने स्रोत के छ ?’ भन्दा रायमाझी ‘अँ के छ स्रोत छैन पुष्टि हुने आधार छैन, त्यतिकै भन्दिएर हुन्छ ?’ भन्दै थिए ।

प्रतिवादीहरू खाँण, भण्डारी, दुलाल र राईसँग पटक–पटक कुराकानी गरिरहेका थिए । आइतबार सँगै रहेका राईसँग खासै संवाद नगरेका उनी सोमबार राईसँग पनि कानेखुसी गरिरहेका देखिन्थे । सँगै उनको ध्यान इजलास कक्षमा को आउजाउ गर्छ, न्यायाधीशले के प्रश्न गरे, सरकारी वकिलले केके विषयमा बहस गरिरहेका छन् भन्नेमा देखिन्थ्यो । डायरीमा लेख्ने र त्यसलाई करेक्सन गर्नेमा उनको ध्यान थियो । एकपटक प्रतिवादी दुलालले भने रायमाझीको डायरी हेरेर फिर्ता गरे ।

एक टकले सुन्ने राईले सिट साटे

आइतबारको बहस एक टकले सुनिरहेका र कुनै प्रतिक्रिया नदिएका ईन्द्रजित राई आज केही सक्रिय देखिए । खाँण बाहिर गएपछि उनी खाँणको सिटमा गएर बसे । सो बेन्चमा रायमाझी र राई थिए । इजलासमा उठेको विषयलाई ध्यान दिएर सुन्ने र त्यसमा नजिककाहरूसँग प्रतिक्रिया दिने काम गरे । रायमाझीसँग उनले कानेखुसी गरेको देखिन्थ्यो ।

प्रकाशित मिति: सोमबार, जेठ २२, २०८० २०:२५