सत्तापक्षका सांसदलाई पनि सन्तुष्टि नमिलेको बागमतीको नीति तथा कार्यक्रम बहुमतले पारित

सत्तापक्षका सांसदलाई पनि सन्तुष्टि नमिलेको बागमतीको नीति तथा कार्यक्रम बहुमतले पारित

A+ A A-

बागमती प्रदेश सरकारको आगामी आर्थिक वर्ष २०८०–८१ को नीति तथा कार्यक्रम बहुमतले पारित भएको छ । शुक्रबार बसेको प्रदेशसभा बैठकबाट नीति तथा कार्यक्रम बहुमतले पारित भएको हो ।

प्रदेशसभाका सदस्यहरू मधुसुदन प्रसाद पौडल, एकालाल श्रेष्ठ, प्रकाश श्रेष्ठ, सुरेन्द्रराज गोरसाई र सृजना सैजूले विभिन्न माग राख्दै नीति तथा कार्यक्रममाथि संशोधनको प्रस्ताव पेस गरेका थिए । संशोधन प्रस्ताव बहुमतले अस्वीकृत भएपछि सभामुख भुवनकुमार पाठकले सरकारको आगामी आवको नीति तथा कार्यक्रम निर्णाथ प्रस्तुत गरेका थिए । जुन बहुमतले पारित भएको जानकारी उनले गराएका हुन् ।

प्रदेश सरकारको तर्फबाट प्रदेश प्रमुख यादव चन्द्र शर्माले नीति तथा कार्यक्रम प्रदेशसभाको गत १४ जेठमा प्रस्तुत गरेका थिए । त्यसयता नीति तथा कार्यक्रममाथि छलफल भएको थियो । छलफलमा नीति तथा कार्यक्रमलाई लिएर सत्तापक्षकै सांसदहरूले असन्तुष्टि जनाएका थिए । प्रमुख प्रतिपक्षी दल नेकपा एमालेले नीति तथा कार्यक्रमका लागि दिएको सुझाव सरकारले नसमेटेको गुनासो राखेको थियो ।

नीति तथा कार्यक्रमको विषयमा सत्तापक्षकै सांसहरूले प्रदेशबारे चुनौती र प्रश्न उठेको भन्दै प्रदेशको औचित्य पुष्टि गर्नेगरी प्रदेश सरकारको नीति तथा कार्यक्रम आउनुपर्ने धारणा राखेका थिए । सत्तापक्षका सांसदहरूले जनपक्षीय नीति तथा कार्यक्रम र बजेट आउनुपर्नेमा जोड दिए ।

नेकपा एकीकृत समाजवादीका सांसद तथा पूर्वमन्त्री कृष्णप्रसाद शर्मा खनालले अघिल्लो वर्ष राजेन्द्र पाण्डे नेतृत्वको सरकारले ल्याएको ‘वडा समाजवादी’ कार्यक्रमलाई निरन्तरता नदिएको भन्दै असन्तुष्टि जनाएका थिए । नीति तथा कार्यक्रममा वृद्धवृद्धाहरूको कार्यक्रम नआएको र शिक्षाको सन्दर्भमा स्थानीय तहसँग समन्वय गरेर प्राविधिक विषयलाई प्राथमिकता राख्दै रोजगारी सिर्जना गर्ने खालका शिक्षामा प्राथमिकता नभएको बताएका थिए ।

नेपाली कांग्रेसका सांसद इन्द्रबहादुर बानियाँले पनि नीति तथा कार्यक्रममाथि प्रश्न उठाएका थिए । नीति तथा कार्यक्रमको आधारमा बजेट व्यवस्था चुनौती हुने भन्दै स्रोत जुटाउने खालका कार्यक्रम ल्याउन आग्रह गरेका थिए । ‘स्रोत घट्दै गएको छ । चाहे त्यो घरजग्गा होस् या अन्य विषयमा । त्यस कारण करको दायरा र करलाई प्रभावकारी बनाएर स्रोत जुटाउने कार्यक्रम समावेश गर्नुपर्दछ,’ सांसद बानियाँले भने । बजेट हावादारी नहोस् भन्दै बानियाँले सरकारको ध्यानाकर्षण गराए ।

माओवादी केन्द्रका सांसद प्रेमबहादुर पुलामीले प्रदेश सरकारले उत्पादन बढाउने कार्यक्रम ल्याउनुपर्ने सुझवा दिएका थिए । उनले किसानहरूको घरमा मल र बिउ नपुगेको भन्दै समयमा मल र बिउ पुर्‍याउने कार्यक्रम ल्याउन सुझाव दिए । छलफलमा सत्तापक्षकै सांसदहरू हरिप्रभा खड्की, समिता खड्की, क्षेत्रबहादुर बम्जन, सरल सहयात्री पौडेललगायत सांसदहरूले सरकारले ल्याएको नीति तथा कार्यक्रममाथि घुमाउरो तरिकाले असन्तुष्ट व्यक्त गरेका थिए ।

नीति तथा कार्यक्रममाथि सत्ता पक्ष र प्रतिपक्ष गरी ८१ जना प्रदेशसभाका सदस्यहरूले सरकारलाई मार्ग निर्देशनसहित सुझावहरू दिएका थिए । बागमती प्रदेशसभाको बैठक अर्को सूचना जारी नभएसम्मका लागि स्थगित भएको छ ।

प्रकाशित मिति: शुक्रबार, जेठ १९, २०८० २०:०५