नेतृत्व परिवर्तन गर्न देउवामाथि दबाब बढाउँदै गगन

A+ A A-

पार्टीभित्र आफूले राखेका एजेण्डा संस्थागत नभएपछि कांग्रेस महामन्त्री गगन थापाले सभापति शेरबहादुर देउवालाई सार्वजनिक अभिव्यक्तिमार्फत दबाब दिन थालेका छन् । बिहीबार उनले सभापति देउवालाई पनि नेतृत्व छाड्न तयार हुनुहुन्छ कि हुनुहुन्न भन्ने प्रश्न आउने बताए ।

छापाखाना तथा सञ्चारसम्बद्ध संघको कार्यक्रमलाई सम्बोधन गर्दै थापाले पार्टी नेतृत्वप्रति कार्यकर्तास्तरबाटै असन्तुष्टि आएको बताए । ‘अहिले पार्टीको तल्लो तहमा गएर बुझ्दा पार्टीको नेतृत्वसँगै निराश भएको छु भन्ने कुरा आउँछ । म पनि पार्टीको नेतृत्वभित्र पर्छु । नेतृत्वले ठीक ढंगले काम गर्न सकिराख्नुभएको छैन भनेर आम साथीहरूले भन्नुहुन्छ । काम गर्न नसकिरहेको अवस्था पनि छ,’ उनले भने, ‘त्यो बेलामा सर्लक्क हामीले छाडेर पार्टीभित्र राम्रो हुन्छ भने त्यो बेलामा छाड्दिनुपर्छ । पार्टीको महामन्त्री भएर मैले यो भनिराख्दा पार्टीको सभापति यो भन्न तयार हुनुहुन्छ कि हुनुहुन्न भन्ने प्रश्न पनि आउँछ ।’

कार्यकर्ताले भनेअनुसार पार्टी नेतृत्व अघि बढ्नुपर्ने उनले बताए ।

जेठ १५ मा ललितपुरको एक कार्यक्रममा थापाले पार्टीलाई निराशाबाट बाहिर ल्याउनुपर्ने बताएका थिए । उनले पार्टी सुधारको काम गर्दा महामन्त्री पद गए जाओस् भन्ने अभिव्यक्ति दिएका थिए ।

‘पार्टीको प्रत्येक सदस्य अब जोखिम उठाउन तयार हुनुपर्छ । सबै जना मानिस अब आफ्नो सुविधाको ठाउँबाट बाहिर निस्कनुपर्छ,’ थापाले भने, ‘मेरो पद गए जाओस्, म कांग्रेस कार्यकर्ता मात्रै भएर बस्न परे बस्छु । म कांग्रेसको महामन्त्री छु, पार्टी सुधार गर्ने काममा जोखिम उठाएर काम गर्दै गर्दा महामन्त्री गए जाओस् । सदस्य मात्रै भएर बस्न परे बसुँला ।’

थापाले पार्टीलाई निराशाबाट बाहिर ल्याउन सबैको साथ चाहिएको पनि भन्न भने छाडेनन् । थापाले आवश्यक पर्दा पार्टीभित्र हस्तक्षेप गर्न आफू तयार रहेको बताउँदै आएका छन् । वैशाख २४ मा ‘अब त अति भयो’ भनेका उनले त्यसपछिका भनाइ पार्टी नेतृत्वप्रति आक्रामक छ ।

पार्टी रुपान्तरणका कुरा उनका अभिव्यक्तिमा छुट्दैनन् । पार्टीका काम सकाएर उनी तल्लो तहमा जाने तयारी गरिरहेका छन् । ‘कांग्रेसको संकोच मान्नुपर्ने अवस्था आयो । म आत्तिएको छु । तल कार्यकताको आवाज सुन्न चाहन्छु । के भैहेको बुझ्न चाहन्छु,’ उनले भने । कांग्रेस अहिले अफ्ठ्यारो अवस्थामा गुज्रिरहेको थापाले बताउने गरेका छन् ।

प्रत्येक दुई महिनामा हुनुपर्ने केन्द्रीय समिति बैठक गत वर्षको साउन २ यता बस्न नसकेको, महाधिवेशन भएको ६ महिनामा पूर्ण हुनुपर्ने विभागहरू शून्य भएको, पदाधिकारीको नाममा पार्टीका सम्पूर्ण कामहरू गरेको, पार्टीलाई ‘प्यारालाइज्ड’ बनाएको लगायतका विषयहरू उठेका छन् ।

नक्कली भुटानी शरणार्थी प्रकरणमा प्रक्राउ परेका नेता बालकृष्ण खाँणमाथि कुनै एक्शन नलिएको, मन्त्री छनोट गर्दा एकलौटी गरेको, सभापतिले स्वेच्छाचारी ढंगले पार्टी चलाएको र त्यसमा महामन्त्रीले केही गर्न नसकेको आरोप महामन्त्रीमाथि छ । महामन्त्री हुनु र नहुनुको फरक नपाएको कार्यकर्ताको दबाबपछि थापा नेतृत्वमाथि दबाब बढाउने मूडमा छन् ।

कांग्रेस नेताहरू पार्टीमा कार्यकर्ताको भावना सम्बोधन हुन नसके पार्टी छाड्ने र त्यसलाई रोक्न पार्टीभित्र मुभ हुनुपर्ने बताउँछन् । कार्यकर्ताको भावना नेतृत्वले सम्बोधन गर्नुपर्ने कांग्रेस सांसद प्रतिमा गौतम बताउँछिन् । महामन्त्रीको भनाइ पार्टीभित्र विद्रोहको संकेतको रूपमा बुझ्न सकिने उनले बताइन् ।

‘महामन्त्रीको भनाइ पार्टीभित्रको लोकतन्त्र बलियो हुनुपर्छ भन्ने दबाब हो । पार्टी रुपान्तरणको अभियान पनि चलिरहेको छ । सबैतिरको मुभ हेर्दा विद्रोहको हुन सक्ने बुझिन्छ । त्यो कसरी हुन्छ वा नेतृत्वले कार्यकर्ताको भावना सम्बोधन गर्छ कि गर्दैन ? त्यसमा भर पर्ने कुरा हो,’ उनले भनिन् ।

कांग्रेस सुधार्न र कार्यकर्ताको असन्तुष्टि सम्बोधन गर्न थापाको अभिव्यक्ति आएको कांग्रेस केन्द्रीय सदस्य अजयबाब शिवाकोटी बताउँछन् । ‘पार्टीको कार्यकर्ताको असन्तुष्टि आएपछि त्यसलाई नेतृत्वले सम्बोधन गर्नुपर्छ । सुधार्न खोज्दा अवरोध हुन खोजेपछि त्यसमा अनुशासनको दण्डा लगाउने कुरा गरियो भने नतिजा दिँदैन,’ उनले भने ।

थापाले पार्टी महाधिवेशनमा आफूले ल्याएका एजेण्डा महामन्त्री भएको डेढ वर्षसम्म लागू गर्न सकिरहेका छैनन् । एजेण्डा लागू गराउन नसकेका अर्का महामन्त्री विश्वप्रकाश शर्मा पनि पर्छन् ।

‘गगन–विश्व महामन्त्री हुँदा पनि रुपान्तरण र सुधार भएन भने अब कांग्रेसमा सुधार र रुपान्तरणको सम्भावना कति छ र भन्ने आशंकापूर्ण प्रश्नहरू उठेका छन् । महामन्त्रीका रूपमा गगन–विश्वको भूमिका र नेतृत्व क्षमताका दृष्टिले जनता र कार्यकर्ता दुवैले प्रश्न उठाएका छन्,’ राजनीतिक विश्लेषक गेजा शर्मा वाग्लेले शिलापत्रसँग भने ।

पार्टीलाई सुधार, रुपान्तरण र शुद्धीकरण गर्न अब निर्णायक भूमिका निर्वाह गर्नुपर्ने आवश्यकता छ भन्ने महसुस गरेर थापाको अभिव्यत्ति आएको उनले बताए । ‘पार्टी सुधार र रुपान्तरणको लागि पार्टी नेतृत्वलाई दबाब दिने रणनीति हो, अब पनि रुपान्तरण नभए पार्टीको भविष्य छैन । अरु कमजोर हुँदै जान्छ । कमजोर हुनुको प्रमुख कारण नेतृत्व हो नेतृत्व परिवर्तन गर्नुपर्ने प्रमुख एजेण्डा बनाएर जनताकहाँ जाने रणनीति अख्तियार गर्न खोजेको देखिन्छ,’ विश्लेषक शर्माले भने ।

प्रकाशित मिति: शुक्रबार, जेठ १९, २०८० ०६:१८