मुद्दा किनारा नलागेपछि दक्षिण अफ्रिका जान राेकिए सन्दीप

A+ A A-

नेपाली क्रिकेट टिमका मुख्य खेलाडी सन्दीप लामिछाने टिमसँगै दक्षिण अफ्रिका जान नपाउने भएका छन् । सन्दीपविरुद्ध विचाराधीन नाबालिका बलात्कार मुद्दामा मंगलबार पनि अन्तिम फैसला नहुँदा उनी टिमसँगै दक्षिण अफ्रिका जान नपाएका हुन् ।

न्यायाधीश शंकरबहादुर राईको इजलासले पीडितको तर्फबाट अन्तरिम क्षतिपूर्तिका लागि दिएको निवेदनको सुनुवाइ गरेपछि मात्र मूल मुद्दाको फैसला हुने बताएपछि आजको पेसी रोकिएको हो ।

सन्दीपका कानुन व्यवसायी सरोजकृष्ण घिमिरेका अनुसार, अदालती प्रक्रिया लम्बिएका कारण उनलाई दक्षिण अफ्रिका जानबाट रोकेको हो । घिमिरेले भने, ‘यो मुद्दा लम्बिने भएको हुँदा अदालती प्रक्रियाको कारण सन्दीप टिमसँगै दक्षिण अफ्रिका जानबाट रोकिएका छन् ।’

नेपाली टिम दक्षिण अफ्रिका विश्वकप छनोटको अन्तिम तयारी गर्न आज राति जाँदैछ । जिम्बाब्वेमा हुने विश्वकप छनोट आउँदो असार ३ देखि २४ गतेसम्म हुँदैछ । नेपाल रहेको समूह ‘ए’ मा आयोजक जिम्बाब्वेसँगै, वेस्ट इन्डिज, अमेरिका र नेदरल्यान्ड्स रहेका छन् ।

जिम्बाब्वेमा विश्वकप छनोट खेल्नुअघि नेपाली टिमले दक्षिण अफ्रिकामा अभ्यास गर्नेछ । नेपाल क्रिकेट संघ (क्यान) ले यसअघि नै विश्वकप छनोटका लागि नेपाली टिमको घोषणा गरिसकेको छ । जसमा सन्दीप पनि टिममा परेका छन् ।

घिमिरे भन्छन्, ‘सर्वोच्च अदालतले अन्तरिम क्षतिपूर्ति दिन आदेश भएको हुँदा र कारबाहीकै अवस्थामा रहेको हुँदा त्यो आदेश कार्य सम्पन्न भएपछि पेस गर्नु भनिदियो । यसले गर्दा फैसला नै रोकियो ।’

१५ फागुन २०७९ मा सर्वोच्च अदालतले नाम परिवर्तित गौशाला २६ लाई अन्तरिम क्षतिपूर्ति उपलब्ध गराउन काठमाडौं जिल्ला अदालतलाई आदेश दिएको थियो । त्यसपछि गौशाला २६ ले आफूलाई अन्तरिम क्षतिपूर्ति दिन मागसहित काठमाडौं जिल्ला अदालतमा निवेदन दिएकी थिइन् ।

तर, काठमाडौं जिल्ला अदालतका न्यायाधीश प्रेमप्रसाद न्यौपानेको इजलासले गत १० चैतमा मुद्दाको अन्तिम सुनुवाइको बेला भएको भन्दै अन्तरिम क्षतिपूर्ति आदेश दिन अस्वीकार गरेको थियो ।

प्रकाशित मिति: मंगलबार, जेठ १६, २०८० १९:१०