खेलकुदमा क्रिकेटमय बजेट, एक वर्षमै मूलपानी रंगशाला बनाइसक्ने लक्ष्य

A+ A A-

आगामी आर्थिक वर्ष २०८०/०८१ का लागि खेलकुदमा छुट्टिएको खेलकुद बजेट क्रिकेटमय भएको छ । संसदमा अर्थमन्त्री डा. प्रकाशशरण महतले क्रिकेटमय खेलकुद बजेट विनियोजन गरेका हुन् ।

टीयू क्रिकेट मैदानलाई अन्तर्राष्ट्रिय क्रिकेट मैदानको रुपमा विकास गरिने भएको छ । आगामी वर्ष फ्लड लाइट जोड्दै अन्तर्राष्ट्रियस्तरको बनाउनका लागि सरकारले बजेट विनियोजन गरेको छ ।

चालु आर्थिक बजेटमा पनि टीयू क्रिकेट मैदानमा फ्लड लाइट जोड्ने भन्दै सरकारले बजेट विनियोजन गरेको थियो । करिब दुई महिनाअघि आईसीसी विश्वकप लिग टु अन्तर्गतको सिरिजपछि प्रधानमन्त्री पुष्पकमल दाहाल प्रचण्डले टीयू मैदानमा तत्काल फ्लड लाइट जोड्न निर्देशन दिएको थियो ।

त्यस्तै, सरकारले मूलपानी अन्तर्राष्ट्रिय क्रिकेट रंगशाला आगामी वर्षभित्र बनाइसक्ने लक्ष्य राखेको छ । जुन असम्भवजस्तै छ । २०७१ सालबाट निर्माण कार्य सुरू भएको यो रंगशालाको अहिलेसम्म गुरुयोजनाअनुुसार २० प्रतिशत पनि काम भएको छैन । काम किस्ताकिस्तामा हुँदै आएको छ ।

राष्ट्रिय खेलकुद परिषद् (राखेप) का सदस्यसचिव टंकलाल घिसिङ भने किस्ताकिस्तामा छुट्टिने बजेटले तत्काल निर्माण कार्य सम्पन्न नहुने दाबी गर्दै आएका छन् । ‘सानोसानो अंशमा बजेट दिने र टुक्राटुक्रामै टेन्डर आह्वान गरेर निर्माण गर्न दिनुपर्ने बाध्यता छ । यो प्रक्रियाले लामो समय लाग्ने भयो । अबचाहिँ निर्माण गर्न लाग्ने ढेड अर्ब एकैपटक दिनुहोस्, एकीकृत रुपमा निर्माण गरौँ भनेर गत भदौ र अहिलेको वैशाख गरेर मन्त्रालयमा दुईपटक पत्र पठाइसकेको छु,’ सदस्यसचिव घिसिङले भने ।

त्यस्तै, सरकारले विराटनगरको गिरिजाप्रसाद क्रिकेट रंगशाला, बैतडीको दशरथ चन्द क्रिकेट रंगशाला, काठमाडौंको सुवर्णशमशेर रंगशाला, कैलालीको फाप्ला क्रिकेट रंगशाला निर्माण कार्य अगाडि बढाउन बजेट विनियोजन गरेको छ ।

निर्माणाधीन इटहरी, धनगढी, पोखरा, नेपालगञ्जको प्रदेश रंगशाला र कभर्डहल निर्माण गर्न बजेट विनियोजन भएको छ । त्यस्तै, खेलकुद पर्यटनलाई विकास गर्ने सरकारको लक्ष्य रहेको छ । १९औँ एसियाली खेलकुद प्रतियोगिता, दक्षिण एसियाली खेलकुद प्रतियोगिता र १०औँ राष्ट्रिय खेलकुद प्रतियोगिताको तयारीका लागि बजेट विनियोजन गरेको छ । त्यस्तै, खेलाडीलाई स्वरोजगार गर्न चाहेमा सहुलियत कर्जा दिने सरकारले योजना ल्याएको छ ।

पाँच आर्थिक वर्षमा खेलकुदका लागि यस्तो छ बजेट विनियोजन

आर्थिक वर्ष २०७५/०७६ मा युवा तथा खेलकुदका लागि ४ अर्ब १८ करोड ९५ लाख बजेट विनियोजन भएको थियो । १८औँ एसियाली खेलकुद, तेस्रो दक्षिण एसियाली खेलकुद प्रतियोगिताको पूर्वाधार निर्माण र आठौँ राष्ट्रिय खेलकुद सम्पन्न गर्न २ अर्ब ४ करोड बजेट छुट्याएको थियो । भूकम्पले तहसनहस बनेको दशरथ रंगशाला, पोखरा रंगशाला, मूलपानी अन्तर्राष्ट्रिय क्रिकेट रंगशालालगायतका पूर्वाधार निर्माणमा जोड दिइएको थियो ।

युवा तथा खेलकुद मन्त्रालयका लागि आर्थिक वर्ष २०७६/०७७ मा ३ अर्ब ९९ करोड बजेट विनियोजन भयो । तर, आर्थिक वर्ष २०७५/०७६ को भन्दा झण्डै १९ करोड बजेट विनियोजन भएको थियो । अर्थमन्त्री युवराज खतिवडाले १३औँ दक्षिण एसियाली खेलकुद प्रतियोगिताका लागि पूर्वाधार निर्माण, नवौँ राष्ट्रिय खेलकुद प्रतियोगिताको संरचना, मूलपानी अन्तर्राष्ट्रिय रंगशाला निर्माण र प्रादेशिक रंगशालाहरूलाई मुख्य प्रामिकतामा राखेका थिए ।

मूलपानी क्रिकेट रंगशालाले प्रत्येक वर्ष प्राथमिकता पायो । तर काम भने भएन । २०६० सालमै शिलान्यास भएको मूलपानी अन्तर्राष्ट्रिय क्रिकेट मैदानका लागि दुई वर्षमा सम्पन्न गरिसक्ने भनेर २०७६ सालकै बजेटमा १० करोड विनियोजन भएको थियो ।

आर्थिक वर्ष २०७७/०७८ मा युवा तथा खेलकुदका लागि २ अर्ब ३६ करोड बजेट विनियोजन भयो । अर्थमन्त्री खतिवडाले त्यसबेला अघिल्लो आर्थिक वर्षको भन्दा १ अर्ब ६३ करोड कम बजेट छुट्याए । यो वर्ष पनि निर्माणाधीन मूलपानी अन्तर्राष्ट्रिय क्रिकेट रंगशाला तथा अन्य क्रिकेट रंगशाला, अन्तर्राष्ट्रियस्तरको खेलकुद परिसरको निर्माण एवं अन्य प्रादेशिक रंगशाला निर्माणलाई सरकारले मुख्य प्राथमिकतामा राखेको थियो । नवौँ राष्ट्रिय खेलकुद प्रतियोगिता सञ्चालन गर्न आवश्यक पूर्वाधार निर्माणमा बजेट विनियोजनलगायतका शीर्षकमा बजेट छुट्याएको थियो ।

आर्थिक वर्ष २०७८/०७९ मा २ अर्ब ७४ करोड बजेट विनियोजन भएको थियो । आर्थिक वर्ष २०७७/०७८ को भन्दा ३६ करोड बजेट वृद्धि भयो ।

झापाको दमकमा अन्तर्राष्ट्रियस्तरको मदन भण्डारी रंगशाला दुई वर्षभित्र सञ्चालनमा ल्याउने गरी निर्माण सुरु गर्ने योजना थियो । मोरङको वैद्यनाथपुर, काठमाडौंको मूलपानी, रुपन्देहीको भैरहवा, दाङको लमही, बाँकेको नेपालगञ्ज र कञ्चनपुरको महेन्द्रनगरमा क्रिकेट मैदान निर्माण सम्पन्न गर्न आवश्यक रकम विनियोजन, धनगढी, वीरेन्द्रनगर, नेपालगन्ज, वीरगन्ज, जनकपुरधाम र इटहरीमा प्रादेशिक रंगशाला निर्माण अघि बढाउन र सबै स्थानीय तहमा खेल पूर्वाधार निर्माण गर्दै आगामी आर्थिक वर्षमा १ सय ६८ स्थानीय तहमा खेलग्राम निर्माण गर्न रकम छुट्याएको उल्लेख छ । काम भने भएको छैन ।

आर्थिक वर्ष २०७९/०८० मा २ अर्ब ४६ करोड बजेट विनियोजन भयो । अघिल्लो आर्थिक वर्ष २०७८/०७९ को भन्दा २९ करोडले बजेट कम विनियोजन भएको थियो ।

मूलपानीमा निर्माणाधीन अन्तर्राष्ट्रिय क्रिकेट रंगशाला आगामी वर्षमा सम्पन्न गर्ने, टीयू क्रिकेट मैदानमा रात्रिकालीन खेल खेल्न सकिने गरी स्तरोन्नति गर्ने, गौतम बुद्ध क्रिकेट रंगशालाको अधुरो निर्माण कार्य पूरा गर्ने व्यवस्था मिलाउने, नवौँ राष्ट्रिय खेलकुदको आयोजनाका लागि आवश्यक बजेट विनियोजन गर्ने र दशौँ राष्ट्रिय खेलकुदका लागि पूर्वाधार तयार गर्ने लक्ष्य लिइएको थियो ।

Data of Khelkud mantralaya16843256801685364376.jpg