पशुपतिको जलहरी प्रकरणमा सत्तापक्ष र प्रतिपक्षी आमनेसामने, सदन चलाउन सभामुखलाई हम्मेहम्मे

पशुपतिको जलहरी प्रकरणमा सत्तापक्ष र प्रतिपक्षी आमनेसामने, सदन चलाउन सभामुखलाई हम्मेहम्मे

A+ A A-

विषय १० जेठको हो, तर प्रमुख प्रतिपक्षी दल एमालेले आज संसद बैठक अवरोध गर्‍यो । माओवादी केन्द्रका सांसद लेखनाथ दाहालले गत बुधबार संसदमा नीति तथा कार्यक्रममाथि छलफलका क्रममा एमाले अध्यक्ष केपी ओलीको सम्बोधनप्रति कटाक्ष गरेका थिए । उनले अहिलेको सरकारले भ्रष्टाचारको छानबिन र राम्रो काम गरेको देखेर एमाले अध्यक्ष ओलीलाई चिन्ता भएको टिप्पणी गरेका थिए ।

नीति तथा कार्यक्रमको छलफलका क्रममा माओवादी केन्द्रका सांसद दाहालले भनेका थिए, ‘सरकारले भ्रष्टाचार नियन्त्रण गर्न सक्दैन भन्नुभयो । उहाँ (केपी ओली) सरकारमा बस्दा कति भ्रष्टाचारका काण्ड भए ? यती, ओम्नी, वाइड बडी, स्वास्थ्य सामग्रीमा २ अर्बको भ्रष्टाचार । त्यति मात्र होइन, पशुपतिनाथको जलहरी लगाउँदा सुन भनेर पित्तल लगाई गरेको हजारौँ भ्रष्टाचार काण्ड छन् । आफू सरकारमा हुँदा गर्न नसकेको अहिलेको सरकारले गर्छ ।’

उनको यो भनाइ एमाले अध्यक्ष केपी ओली लक्षित थियो । सांसद दाहालले १० गते संसदको रोस्ट्रमबाट बलेका थिए । तर, त्यस दिन एमालेले प्रतिवाद गरेन ।

आज नीति तथा कार्यक्रम पारित गर्ने दिन यो विषयलाई उठाउनु शंकाको दृष्टिले हेर्छन् सत्तारूढ दलका सांसदहरू । नीति तथा कार्यक्रम पास गर्न नदिने रणनीति एमालेको भएको आशंका गर्छन् कांग्रेस सांसद रामहरि खतिवडा । ‘आज नभए भोलि पास हुन्छ । नीति तथा कार्यक्रम फेल हुँदैन,’ उनले भने ।

बैठक सञ्चालनका लागि सरकारको आधिकारिक धारणासँगै सांसद दाहालले माफी माग्नुपर्ने माग एमालेको छ ।

uml samsad sansad (1)1685084574.jpg

'एमाले नेतृत्वको सरकारले पशुपतिनाथमा सुनको साटो पित्तल लगाएको भन्ने आरोप लगाइएको छ । यो आरोप कसरी आएको छ । प्रमाण तथ्यबेगर स्वीकार्य हुँदैन । यदि पशुपतिनाथको जलहरी सुन होइन, पित्तल हो भने यो सरकारले जवाफ दिनुपर्छ । जवाफ नआएसम्म सदन अगाडि बढ्न सक्ने छैन । माफी माग्नुपर्छ र रेकर्डबाट हटाउनुपर्छ,’ एमालेका प्रमुख सचेतक पदम गिरीले भने ।

मओवादी सांसद आफूले गल्ती नगरेकाले माफी नमाग्ने बताउँछन् । ‘माफी माग्न अपशब्द बोलेको छैन । माफी माग्नुपर्ने कारण छैन । संसदीय मूल्यमान्यता तोडेको छैन । माफी माग्दिनँ,’ सांसद दाहालले भने, ‘जसमाथि प्रश्न उठेको हो, उसले जवाफ दिने हो ।’

सरकारको धारणा नआएसम्म बैठक सञ्चालनमा अवरोध गर्ने एमालेको रणनीति छ । ‘सरकारको धारणा माग गरेका छौँ । स्पष्ट जवाफ चाहिन्छ,’ एमाले सचेतक महेश बर्तौलाले भने ।

उता माओवादी केन्द्रका प्रमुख सचेतक हितराज पाण्डे संसदमा आफ्नो कुरा राख्न पाइने बताउँछन् । संसदलाई व्यवस्थित रूपमा अघि बढाउने कुरा भइरहँदा प्रमुख प्रतिपक्षी दलले यस्ता विषयवस्तु उठाउनु नहुने बताए । ‘सार्वभौम संसदमा सांसदले आफ्ना विषयवस्तु राख्न पाइन्छ,’ उनले भने ।

एमाले संसदीय दलका उपनेता सुवासचन्द्र नेम्वाङ आफूहरूमाथि गम्भीर आरोप लागेकाले दूधको दूध पानीको पानी छुट्याउन माग गर्छन् । ‘पित्तलको जलहरी चढाएर भ्रष्टाचार गर्ने काम भएको गम्भीर आरोप लगाइएको छ । प्रतिपक्षी नेतामाथि यो आरोप लागेको छ । उहाँहरूले भनेपछि होला भन्ने हुन्छ । यो आरोप टाउकोमा बोकेर कसरी हिडौँ ?,’ उनले प्रश्न गरे ।

सभामुख देवराज घिमिरेले पटकपटक एमाले सांसदहरूलाई सदनको कामकारबाही अगाडि बढाउन आग्रह गरे । तर, एमाले सांसदहरू रोस्ट्रमअगाडि नै गएर नाराबाजी गर्न थालेपछि ३० मिनेका लागि स्थगित गरिएको बैठक ३ बजेका लागि डाकियो । तर, ३ बजे पनि बैठक सुरु भएको छैन ।

सांसदहरू बैठकको प्रतीक्षामा छन् । सभामुख घिमिरे प्रमुख दलका नेताहरूसँग परामर्श गरिरहेका छन् । आज प्रधानमन्त्री पुष्पकमल दाहाल प्रचण्डले नीति तथा कार्यक्रममाथि उठेका प्रश्नको जवाफ दिने कार्यक्रम थियो । अब के हुन्छ भन्नेमा सांसहरू नै अन्योलमा छन् ।

यद्यपि जलहरीकाे विषय महालेखाले समेत उठाएको विषय हो । आर्थिक वर्ष २०७९ को वार्षिक प्रतिवेदनमा सुनको सम्पूर्ण परिमाण रिङ बनाउने कार्यमा प्रयोग भएको पुष्टि हुने विवरण पेस नभएको उल्लेख गरेको छ ।

‘पशुपति शिवलिङ्गको गर्भगृहलाई पूर्ण रूपमा ढाक्ने गरी राखिने सुनको जलहरी निर्माण कार्यका लागि यो वर्ष नेपाल राष्ट्र बैङ्कबाट १०३ किलो ७७३ ग्राम सुन रू.८० करोड ११ हजारमा खरिद गरेको छ । विभिन्न शुद्धताको प्रतिशत रहेको सुनमा अन्य धातु र रसायनको मिश्रण तामा २ किलो ८९० ग्राम चाँदी १ किलो २४९ ग्राम, जिङ्क १२.७५ ग्रामसमेत प्रयोग गरी १०७ किलो ९२४.७५ ग्राम सुन कायम भएको उल्लेख छ,’ प्रतिवेदनमा भनिएको छ । प्रतिवेदनमा १० किलो ९७६ ग्रामको रिङ बनाई जलहरीमा लगाएको उल्लेख छ ।

‘निर्मित जलहरी, जलधारा, नाग, नागमूर्ति सुनको किलालगायतमा प्रयोग भएको सुनको तौल ९६ किलो ८२२ ग्राम रहेको र बाँकी रहेको सुन १० किलो ९७६ ग्रामको रिङ बनाई जलहरीमा लगाइएको उल्लेख छ । रिङ बनाउन प्रयोग भएको सुनको मूल्य ७ करोड ८६ लाख ४६ हजार रहेको छ । जलहरी बनाएर बाँकी रहेको सो सुनको सम्पूर्ण परिमाण रिङ बनाउने कार्यमा प्रयोग भएको पुष्टि हुने विवरण पेस गरेको छैन,’ प्रतिवेदनमा भनिएको छ ।

कांग्रेस सांसद खतिवडा पशुपतिको जलहरीमा सुन वा पित्तल लगाएको विषय महालेखाको प्रतिवेदनमा पनि आएकाले संसदमा छलफल हुनुपर्ने बताउँछन् । उनले भने, ‘महालेखाको प्रतिवेदनमा आएको छ । यो त संसदमा छलफल हुनुपर्ने विषय हो । छलफल गर्दा विरोध गर्नु हुँदैन ।’ भुटानी शरणार्थी प्रकरणमा अख्तियार प्रमुख प्रेम राईसहित अन्यको पनि नाम आएपछि विषयलाई ‘डाइभर्ट’ गर्न एमालेले संसद अवरोध गरेको उनको टिप्पणी छ ।

तस्वीर :सुशील श्रेष्ठ

सम्बन्धित समाचार