‘कि मलाई जेलमा पठाउनू कि खेल्न’

A+ A A-

नाबालिका बलात्कारको आरोप लागेका क्रिकेटर सन्दीप लामिछानेविरुद्ध काठमाडौं जिल्ला अदालतमा फैसलाको पेसी लगातार स्थगित हुँदै आइरहेको छ । करिब डेढ महिना विदेश भ्रमणमा नेपाली टिम हुँदा सन्दीप लामिछाने भने तारेख बुझ्न आफैँ अदालत उपस्थित हुनुपर्ने अवस्था छ । यस्तो अवस्थामा सन्दीपले विश्वकप छनोट खेल्ने सम्भावना कति छ ? प्रश्न उठ्न थालेको छ ।

नेपाली टिमका मुख्य खेलाडी सन्दीपकाे मुद्दाकाे एकपछि अर्को पेसी स्थगित हुँदै जाँदा जिम्बाब्वेमा हुने विश्वकप छनोट भने नजिकिँदो छ । आउँदो ३ असारदेखि २४ गतेसम्म विश्वकप छनोट हुँदैछ । विश्वकप छनोट खेल्ने टिमदेखि खेल तालिका सबै सार्वजनिक भइसकेको छ ।

जिम्बाब्वेमा विश्वकप छनोट खेल्नुअघि नेपाली टिमले दक्षिण अफ्रिकामा अभ्यास गर्नेछ । त्यसका लागि नेपाली टिम जेठ १८ गते दक्षिण अफ्रिका प्रस्थान गर्नेछ । तर, नेपाली टिमसँगै सन्दीप दक्षिण अफ्रिका जाने नजाने टुंगो भने लागिसकेको छैन ।

सन्दीपले अदालतमा तारेख बुझ्न वारेसनामा राख्न पाउँदैनन् । तारेख बुझ्न आफैँ अदालत उपस्थिति हुनुपर्छ । यस्तो अवस्थामा विश्वकप छनोट खेल्न गएका सन्दीप कसरी प्रत्येक तारेख बुझ्न आउन सक्छन् ?

सन्दीपका कानुन व्यवसायी सरोजकृष्ण घिमिरे सन्दीपले विश्वकप छनोट खेल्न पाए पनि कठिन प्रक्रिया रहेको बताउँछन् । उनले भने, ‘डिफल्ट अफ लचाहिँ हुन्छ । उता खेल भइरहेको हुन्छ । यता तारेख बुझ्नुपर्छ । तारेख बुझेपछि तारेख लिन आउनुपर्छ । सन्दीप आउँदा १०–१२ लाख खर्च हुन्छ । कसले गर्ने खर्च ? क्यानले गर्ने कि, राज्यले ? कि ऊ आफैँले गर्ने ?’

पछिल्लो समय सन्दीप सामाजिक सञ्जालमा निकै भावुक स्टाटस लेखिरहेका छन् । उनका समर्थक र शुभचिन्तकले पनि हौसला र साथ दिइरहेका छन् । नेपालले एसीसी प्रिमियर कपको उपाधि जितेपछि उनले लेखेका थिए, ‘यो जिन्दगीले कहाँ लैजानेछ, थाहा छैन । तर, यो साथ र मायाका लागि हृदयदेखि धन्यवाद । आज क्रिकेटको यात्रामा धेरै सपनाहरूमध्ये एउटा सपना पूरा भएको महसुस गरेको छु ।’

गत वर्षको १५ फागुनदेखि नाबालिग बलात्कारको अभियोगमा मुद्दा खेपिरहेका सन्दीपलाई सर्वोच्च अदालतका न्यायाधीशद्वय सपना प्रधान मल्ल र कुमार चुडालको संयुक्त इजलासले पुर्पक्षमा राख्नु नपर्ने आदेशसहित विदेश जान अनुमति दिएको थियो । त्यसपछि सन्दीपले यूएईमा गएर आईसीसी क्रिकेट विश्वकप लिग टुको सिरिज खेलेका थिए ।

मुद्दा अदालतमा चलिरहेको छ । फैसला सन्दीपको पक्षमा आउला कि विपक्षमा सबैको ध्यान यतिबेला तानेको छ ।

छ एउटा सपना मेरो पनि,
र आशा छ कि मेरो त्यो सपना नमरोस् ।

सर्वोच्च अदालतले सन्दीपको मुद्दालाई फास्ट ट्रयाकमा टुंग्याउनू भनेर १५ फागुनमै आदेश दिइसकेको थियो । तर, लामो समयसम्म पनि मुद्दाको टुंगो लागेको छैन भने पेसी सर्दै आइरहेको छ । सन्दीपका वकिल घिमिरे भन्छन्, ‘सन्दीप आफैँले कि मलाई जेलमा पठाउनू, कि खेल्न पठाउनू भन्दै आएका छन् । चाँडै फैसला हुनुपर्छ ।’

यता, नेपाल क्रिकेट संघ (क्यान) पनि सन्दीपलाई नेपाली टिमबाट छुटाउन चाहँदैन । विपक्षी ब्याटर सजक हुने भनेकै सन्दीपको बलिङमा हो । अनुभवी खेलाडी सन्दीपको नेपाली टिममा आगमनले त्यसलाई सावित पनि गर्दै आएको छ ।

‘हामीले प्रयास गरिरहेका छौँ । सन्दीपलाई पनि मानसिक तनाव छ । पूरै खेलमा केन्द्रित भएर खेल्न पाएका छैनन्,’ क्यानका कार्यवाहक सचिव दुर्गाराज पाठक भन्छन्, ‘सन्दीपले खेल्न पाएनन् भने नेपाललाई ठूलो घाटा हुनेछ । लिग टुमा उत्कृष्ट प्रदर्शन गरेका छन् । एसीसी प्रिमियर कपमा प्लेयर अफ द टुर्नामेन्ट भएको खेलाडी । उनलाई हामी गुमाउन चाहँदैनौँ ।’

गत वर्षको ५ भदौमा सन्दीपले आफूलाई बलात्कार गरेको भन्दै २१ गते एक नाबालिकाले गौशालास्थित प्रहरी वृत्तमा उजुरी दिएकी थिइन् । त्यसपछि सन्दीपविरुद्ध प्रहरीले अनुसन्धान अघि बढाएको थियो । क्यारेबियन प्रिमियर लिग खेलिरहेका सन्दीप २० असोजमा स्वदेश फर्किएलगत्तै त्रिभुवन अन्तर्राष्ट्रिय विमानस्थलबाट पक्राउ परेका थिए ।

प्रहरीको अनुसन्धानपछि सरकारी वकिल कार्यालयले सन्दीपबिरूद्ध नाबालिका बलात्कार आरोपमा जिल्ला अदालत काठमाडौंमा १४ कात्तिक २०७९ मा मुद्दा दर्ता गरेको थियो । सरकारी वकिल कार्यालयले सन्दीपविरुद्ध १२ वर्षको कैद सजाय माग गरेको थियो ।

त्यसपछि काठमाडौं जिल्ला अदालतका न्यायाधीश माधवप्रसाद घिमिरेको इजलासले सन्दीपलाई पुर्पक्षका लागि थुनामा पठाएको थियो । तर, पाटन उच्च अदालतले सन्दीपलाई २० लाख धराैंटीसहित विभिन्न सर्त राख्दै छोड्न आदेश दिएको थियो । त्यसपछि सर्वोच्च अदालतले सन्दीपलाई पुर्पक्षमा राख्नुनपर्ने भन्दै विदेश खेल्न जानसमेत अनुमति दिँदै फास्ट ट्रयाकबाट सन्दीपको मुद्दामा फैसला गर्न आदेश दिएको थियो ।

प्रकाशित मिति: बिहीबार, जेठ ११, २०८० १८:१८