बागमती प्रदेशका नवनियुक्त मन्त्रीहरूले लिए शपथ

A+ A A-

बागमती प्रदेशका नवनियुक्त मन्त्रीहरूले पद तथा गोपनीयताको शपथ लिएका छन् ।

आइतबार प्रदेश प्रमुखको कार्यालयमा आयोजित विशेष समारोहमा प्रदेश प्रमुख यादवचन्द्र शर्माले नवनियुक्त ६ जना मन्त्रीहरूलाई पद तथा गोपनीयताको शपथ खुवाएका हुन् ।

यसअघि बागमती प्रदेशका मुख्यमन्त्री शालिकराम जम्कट्टेलले कांग्रेस र नेकपा एसका नेताहरूलाई समेटेर मन्त्रिपरिषद्लाई पूर्णता दिएका थिए । कांग्रेसबाट मसिना खड्का भण्डारी वन तथा वातावरण, पुकार महर्जन पर्यटन उद्योग तथा सहकारी र उत्तम जोशी स्वास्थ्य मन्त्री बनेका छन् । कांग्रेसकै रामकृष्ण चित्रकार भने बिनाविभागीय मन्त्री बनेका छन् । उनको जिम्मेवारी पछि तोकिने छ ।

यसैगरी, नेकपा एकीकृत समाजवादीबाट लक्ष्मण लम्साल श्रम, रोजगार तथा यातायात मन्त्री र राजेन्द्रमान श्रेष्ठ कृषि तथा पशुपक्षी विकास मन्त्री बनेका छन् । ६ नयाँ मन्त्री थपिएसँगै बागमती प्रदेशको मन्त्रिपरिषद् १२ सदस्यीय भएको छ । यसअघि मुख्यमन्त्री शालिकराम जम्कट्टेलले १४ सदस्यीय मन्त्रिपरिषद्लाई ११ सदस्यीय बनाएका थिए ।

गठबन्धनमा भागवण्डा नमिल्दा उनी आफ्नै निर्णयबाट पछि हट्न बाध्य भएका छन् । बागमतीमा ६–४–२ को भागवण्डा लागेको छ । कांग्रेसले ६, माओवादी केन्द्रले ४ र एकीकृत समाजवादीले २ मन्त्रालय लिएका छन् । कांग्रेसबाट यसअघि २६ चैतमा संसदीय दलका नेता बहादुरसिंह लामा आर्थिक मामिला तथा योजनामन्त्री र तिर्थ बहादुर लामा खानेपानी, ऊर्जा तथा सिँचाईमन्त्री भएका थिए ।

माओवादी केन्द्रबाट गंगा नारायण श्रेष्ठ आन्तरिक मामिला तथा कानुनमन्त्री, कुमारी मुक्तान सामाजिक विकासमन्त्री र युवराज दुलाल भौतिक पूर्वाधार विकासमन्त्री भएका थिए । बागमतीको मन्त्रालय भागवण्डा विवाद ४ चैत साँझ प्रधानमन्त्री निवास बालुवाटारमा प्रधानमन्त्री तथा माओवादी केन्द्र अध्यक्ष पुष्पकमल दाहाल प्रचण्डले मिलाएका थिए ।

प्रकाशित मिति: आइतबार, जेठ ७, २०८० १६:१६