बागमतीमा ६ जना मन्त्री बन्दै, कसलाई कुन मन्त्रालय ?

A+ A A-

बागमती प्रदेशका मुख्यमन्त्री शालिकराम जम्कट्टेलले सरकार बनाएको ५८ दिनमा मन्त्रिपरिषद्लाई पूर्णता दिँदै छन् । हेटौँडा–१०, बसपार्कस्थित प्रदेश प्रमुखको कार्यालयमा ३ बजेका लागि नयाँ मन्त्रीहरूको शपथ ग्रहणको कार्यक्रम तय गरिएको छ । यसअघि २ बजेलाई तोकिएको शपथ ग्रहण मुख्यमन्त्रीको आग्रहमा ३ बजे धकेलिएको हो ।

प्रदेश प्रमुख यादवचन्द्र शर्मा पनि काठमाडौंबाट शपथ ग्रहणका लागि हेटौँडा हिँडिसकेका छन् । नयाँ मन्त्री बन्नेहरू पनि आइतबारै काठमाडौंबाट हेटौँडा आएका छन् । मन्त्री बन्ने नामावलीमा रहेका केही सांसदहरूलाई हेटौँडा आउन ढिलो हुने भएपछि शपथ १ घण्टा ढिला गरी हुने भएको हो ।

सरकारमा हाल ६ जना मन्त्री छन् । आइतबार एक बिनाविभागीयसहित ६ जना मन्त्री नियुक्त हुँदैछ्न । जसमध्ये ५ जनालाई मन्त्रालयको जिम्मेवारी तोकिएको छ । बागमतीमा मन्त्रालय संख्या फुटाइने भएको छ । बिनाविभागीय मन्त्री पाउनेमा नेपाली कांग्रेस संसदीय दलका उपनेता रामकृष्ण चित्रकार छन् । उनको जिम्मेवारी पछि तोकिने जनाइएको छ ।

रिक्त पाँचवटा मन्त्रालयमध्ये कांग्रेसबाट ३ जना र नेकपा (एकीकृत समाजवादी)बाट २ जना नियुक्त हुँदैछन् । कांग्रेसबाट पुकार महर्जनलाई पर्यटन, उद्योग तथा सहकारी मन्त्रालय, उत्तम जोशीलाई स्वास्थ्य मन्त्रालय र मसिना खड्कालाई वन तथा वातावरण मन्त्रालयको जिम्मेवारी दिइएको मुख्यमन्त्री तथा मन्त्रिपरिषद् कार्यालय स्रोतले जानकारी दिएको छ । एकीकृत समाजवादीबाट डा. राजेन्द्रमान श्रेष्ठलाई कृषि तथा पशुपन्छी विकास मन्त्रालय र लक्ष्मण लम्साललाई श्रम, रोजगार तथा यातायात मन्त्रालय तोकिएको छ ।

आज नियुक्त हुने ६ नयाँ मन्त्रीसहित बागमती प्रदेशको मन्त्रिपरिषद् १२ सदस्यीय हुने भएको छ । यसअघि मुख्यमन्त्री शालिकराम जम्कट्टेलले १४ सदस्यीय मन्त्रिपरिषद्लाई ११ सदस्यीय बनाएका थिए ।

गठबन्धनमा भागवण्डा नमिल्दा उनी आफ्नै निर्णयबाट पछि हट्न बाध्य भएका छन् । बागमतीमा ६–४–२ को भागवण्डा लागेको छ । कांग्रेसले ६, माओवादी केन्द्रले ४ र एकीकृत समाजवादीले २ मन्त्रालय लिएका छन् । कांग्रेसबाट यसअघि २६ चैतमा संसदीय दलका नेता बहादुर सिं लामा आर्थिक मामिला तथा योजनामन्त्री र तिर्थ बहादुर लामा खानेपानी, ऊर्जा तथा सिँचाईमन्त्री भएका थिए ।

माओवादी केन्द्रबाट गंगा नारायण श्रेष्ठ आन्तरिक मामिला तथा कानुनमन्त्री, कुमारी मुक्तान सामाजिक विकासमन्त्री र युवराज दुलाल भौतिक पूर्वाधार विकासमन्त्री भएका थिए । बागमतीको मन्त्रालय भागवण्डा विवाद ४ चैत साँझ प्रधानमन्त्री निवास बालुवाटारमा प्रधानमन्त्री तथा माओवादी केन्द्र अध्यक्ष पुष्पकमल दाहाल प्रचण्डले मिलाएका थिए ।

प्रकाशित मिति: आइतबार, जेठ ७, २०८० १४:१४