जब बेंग्लोरको सडकमै ओर्लिए ‘अन्तरिक्षयात्री’ (भिडियोसहित)

A+ A A-

बेंग्लोरको सडकमा साँझको समयमा एक जना अन्तरिक्षयात्री विस्तारै हिँडिरहेका थिए । उनको हिँडाइ हेर्दा लाग्थ्यो– उनी पृथ्वीमा होइन, चन्द्रमामा हिँडिरहेका छन् र फरक गुरुत्वाकर्षण बलका कारण उनलाई हिँड्न असहज भइरहेको छ । ती अन्तरिक्षयात्री विस्तारै होसियारीका साथ पाइला टेक्दै अघि बढिरहेका थिए ।

तर, वास्तवमा ती व्यक्ति अन्तरिक्षयात्री थिएनन् । उनी थिए ४० वर्षे स्ट्रिट आर्टिस्ट तथा सामाजिक अभियन्ता बादल नन्जुनन्द स्वामी । उनले बेंग्लोरका सडकभरि रहेका सानाठूला सबै खाल्डाखुल्डी पुर्न महानगरलाई दबाब दिन यसो गरेका थिए । उनले अन्तरिक्षमा जसरी बेंग्लोरको सडकमा हिँडेको भिडियो अहिले ट्विटरमा भाइरल भइरहेको छ ।

बेंग्लोरका सडकमा धेरै नै खाल्डा छन् । त्यहाँको सडकमा चन्द्रमाको सतहमा भएका क्रेटरको आकारका खाल्डैखाल्डा छन् । उनले खिचेको भिडियो हेर्दा शुरूमा त चन्द्रमा नै हो कि जस्तो पनि लाग्छ । तर, उनी अन्तरिक्षयात्रीको पहिरनमा चन्द्रमाको शैलीमा हिँडिरहँदा उनको छेउबाट केही सवारीसाधन खाल्डो छल्दै गुडिरहेको देखिन्छ ।

बादलले बृहत् बेंग्लोर महानगरपलिका (बीबीएमपी) लाई झकझकाउन यस्तो रचनात्मक विरोध गरेका हुन् । बीबीएमपी पछिल्लो समय सडक मर्मत सम्भारमा निष्क्रिय रहँदै आएपछि दबाब दिन उनले यस्तो उपाय अपनाएका हुन् ।

बादलले सडकको अवस्था सुधारका लागि रचनात्मक विरोधको बाटो अपनाएको यो पहिलो घटना भने होइन । उनले धेरै पटक बीबीएमपीलाई फरकफरक तरिकाले झकझकाइसकेका छन् । उनकै विरोधले सडकका कैयौं खाल्डाहरू पुरेर पिच नै गरिएको उदाहरण पनि छ ।

एक पटक उनले खाल्डोमा फुटबलजस्तो पेन्टिङ गरेर बच्चाले किक हान्न लागेको चित्र बनाएका थिए । पेन्टिङ गरेको केही हप्तापछि नै बीबीएमपीले त्यो सडक कालोपत्रे गरेको थियो । यस्तै, सडकको बीचमा रहेको ढलको मंगल फुटेपछि उनले भित्रबाट अजिंगर निस्किएको आकृति बनाएका थिए । त्यो पनि बीबीएमपीले केही दिनमै मर्मत गरेको थियो ।

यस्तै, सडकमा भएका खाल्डाहरूमा पानी जमेपछि उनले विशाल गोही तैरिइरहेको आकृति बनाए । आवश्यक मर्मत नगरेपछि मुख्यतः वर्षायाममा बेंग्लोरका सडक एकदमै खराब हुन्छन् । हुन त यो बेंग्लोरको मात्र होइन, सबैतिरको समस्या हो । तर, खराब भएपछि बीबीएमपीले मर्मत गर्न सक्रियता नदेखाएपछि बादल रचनात्मक विरोधमा उत्रिहाल्छन् ।

पानी जमेको अर्को खाल्डोमा उनले जलपरी बनाएर आराम गरिरहेको बनाएका थिए । सो खाल्डो पनि बीबीएमपीले तुरुन्तै पुरेर सडक मर्मत गरेको थियो । तर, बीबीएमपीका एक वरिष्ठ अधिकृत भने उनको भिडियोको बारेमा अनभिज्ञ रहेछन् । भिडियो हेरेपछि उनले हाँस्दै मर्मतमा सम्बन्धित इन्जिनियर टोलीलाई खटाइने बताएका थिए । बीबीएमपीका प्रवक्ता एलबी सुरेशले मनसुन जारी रहेका कारण मर्मतमा समस्या आएको बताएका थिए ।

‘निरन्तरको वर्षाले काम रोकिएको छ । वर्षाले साना खाल्डाखुल्डी पनि ठूलो बनाउँछ । यो महिनाको अन्त्यसँगै मनसुन लगभग अन्त्य हुन्छ । त्यसपछि मर्मतका काम धमाधम शुरू हुनेछ,’ प्रवक्ता सुरेशले बताएका थिए ।

अन्तरिक्षयात्रीका रूपमा हिँडेर खिचिएको भिडियो ट्विटरमा अपलोड गरेको केही दिनमै १० लाखभन्दा बढीले हेरिसकेका छन् । उनको व्यापक समर्थन र महानगरको चर्को विरोध भएपछि बीबीएमपीले अर्को महिना पर्खिन पाएन ।

अहिले उनी अन्तरिक्षयात्री बनेर हिँडेको सडकखण्डको मर्मत कार्य शुरू भइसकेको छ । सामाजिक सञ्जालमा व्यापक आलोचना भएपछि भिडियो अपलोड गरेको २ दिनमै बीबीएमपीले काम शुरू गरेको हो । मर्मत शुरू भएको भिडियो पनि उनले सामाजिक सञ्जालमा अपलोड गरिसकेका छन् ।

संयोगको कुरा त के छ भने उनी अन्तरिक्षयात्रीका रूपमा बेंग्लोरका सडकमा हिँडेकै दिन चन्द्रयान– २ को लेन्डर ‘विक्रम’ ले रोभर ‘प्रज्ञान’ बाट छुट्टिएर चन्द्रमाको दक्षिणी ध्रुवमा सफल अवतरण गरेको थियो ।

प्रकाशित मिति: शुक्रबार, भदौ २०, २०७६ ०४:२९