डडेल्धुरामा तमासा : अस्पताल अध्यक्षकाे पदभार ग्रहणलगत्तै सिंहको पद चैट, ओझाको इन्ट्री

डडेल्धुरामा तमासा : अस्पताल अध्यक्षकाे पदभार ग्रहणलगत्तै सिंहको पद चैट, ओझाको इन्ट्री

लक्ष्मण सिंह र करुणाकर ओझा

A+ A A-

डडेल्धुरा अस्पताल विकास समितिको अध्यक्ष नियुक्तिको कुराले पुरै जिल्ला चकित परेको छ । एकपछि अर्को मनोनयनले सामाजिक सञ्जालमा विभिन्न टिकाटिप्पणी भइरहेको छन् । गत वैशाख १७ गते प्रधानमन्त्री एवम् स्वास्थ्य तथा जनसंख्यामन्त्री स्तरको निर्णयबाट लक्ष्मण सिंहलाई डडेल्धुरा अस्पतालको अध्यक्षमा मनोनीत गरेको भन्दै सुरुमा मन्त्रालयबाट पत्र आएको थियो ।

उक्त पत्रअनुसार सिंहलाई वैशाख २३ गतेबाट लागू हुनेगरी अध्यक्षमा मनोनीत गरिएको थियो । उनीसँगै तेज साउदलाई अस्पताल विकास समितिको सदस्यमा मनोनीत गरिएको थियो । उक्त पत्र अस्पताल पुगेपछि सिंहले हिजो जेठ ३ गते मात्रै पदभार ग्रहण गरेका थिए । उनलाई अस्पतालका कर्मचारी तथा जिल्लावासीले स्वागतसमेत गरेका थिए ।

पदभार ग्रहण कार्यक्रममा सिंहले अस्पतालमा दरबन्दी अनुसारका चिकित्सक तथा आवश्यक उपकरण ल्याउने प्रतिबद्धता जाहेर गरेका थिए । तर, आफ्नो तेस्रो कार्यकालका लागि उक्त बाचा गरेका सिंहको पद पदभार ग्रहण गरेको केही घण्टामै गएको छ ।

हिजै साँझ स्वास्थ्य मन्त्रालयबाट उनको पद बदर गरिएको भन्दै अर्को पत्र अस्पताल पुगेको छ । त्यति मात्रै हैन उनको ठाउँमा अस्पतालका निवर्तमान अध्यक्ष करुणाकर ओझालाई नियुक्त गरिएको पत्रमा उल्लेख छ । हिजो नै स्वास्थ्य तथा जनसंख्या मन्त्री स्तरको निर्णयले अध्यक्षमा उनीसहित सदस्यमा देवकी भट्ट र जनक मल्ललाई मनोनीत गरेको भनेर पत्र आएको अस्पतालका मेडिकल सुपरिटेन्डेन्ट चेतराज भट्टले जानकारी दिए ।

उनका अनुसार एक साताअगाडि मात्रै अस्पतालको अध्यक्षमा नियुक्त भएका लक्ष्मणबहादुर सिंहको मनोनयन बदर गरिएको पत्र पनि अस्पताललाई प्राप्त भइसकेको छ । तेस्रो कार्यकालका लागि मनोनीत भएका सिंह नेकपा माओवादीमा केन्द्रमा आबद्ध छन् भने दोस्रो कार्यकालका लागि मनोनीत भएका ओझा केही समयअघि नेपाली कांग्रेसमा प्रवेश गरेका थिए ।

प्रकाशित मिति: बिहीबार, जेठ ४, २०८० ०८:०१