नक्कली शरणार्थी प्रकरणमा पार्टीका नेता पक्राउ परेपछि कांग्रेसले सरकार ढाल्छ ?

नक्कली शरणार्थी प्रकरणमा पार्टीका नेता पक्राउ परेपछि कांग्रेसले सरकार ढाल्छ ?

A+ A A-

नक्कली भुटानी शरणार्थी प्रकरणमा कांग्रेसका प्रभावशाली नेताहरूको संलग्नता देखिएकोमा अनुसन्धान जारी छ । पूर्वमन्त्री तथा कांग्रेस नेता बालकृष्ण खाँण २७ वैशाखमा पक्राउ परे । खाँण पक्राउ परेपछि उनकी श्रीमती तथा कांग्रेस सांसद मञ्जु खाँण सम्पर्कबाहिर छन् । मोबाइल बन्द गरेकी उनी अहिलेसम्म सार्वजनिक भएकी छैनन् ।

नेताहरूमा भागाभाग हुँदा कांग्रेसले सत्ता सहकार्य कसरी अघि बढाउँछ भन्ने कुरा चासोपूर्वक हेरिएको छ । वर्तमान सरकार संसदको तेस्रो दल माओवादीको नेतृत्वमा छ । कुनै कारणले पुष्पकमल दाहाल 'प्रचण्ड' नेतृत्वको सरकार ढलेमा सरकार कांग्रेसको नेतृत्वमा बन्नेछ । संविधानको धारा ७५ को उपधारा ३ मा संसदमा सबैभन्दा बढी सदस्यहरू भएको दलको संसदीय दलको नेतालाई प्रधानमन्त्री नियुक्ति गरिने व्यवस्था छ ।

माओवादी नेतृत्वमा सरकार रहेको र नक्कली शरणार्थी प्रकरणमा कांग्रेस नेता पक्राउ पर्दैमा सरकारको काम कारबाही र पार्टीमा असर नगरेको महिला तथा बालबालिकामन्त्री सुरेन्द्रराज आचार्यले बताए । ‘जे भइरहेको छ, राम्रो भइरहेको छ,’ मन्त्री आचार्यले शिलापत्रसँग भने, ‘घटनामा मुछिएकाहरूलाई कारबाही हुनुपर्छ । दोषी उम्किनु हुँदैन भन्ने मान्यता कार्यकर्ताको छ ।’

प्रचण्डको नेतृत्वमा सरकार छ । फाइल खोल्दै जाँदा कांग्रेसका नेताहरूको फाइल भेटिएको छ । यसले मन्त्री तथा कांग्रेसलाई असर पारेको छ भन्ने प्रश्नमा मन्त्री आचार्यले भने, ‘त्यस्तो केही छैन । भ्रष्टाचारको छानबिन हुनु सकारात्मक हो । भ्रष्टाचार देशको रोग हो । यसको अन्त्य हुनुपर्छ । यसलाई दायाँबायाँ गराएर मुद्दा कमजोर पार्ने वा सरकार गिराउने भन्ने सोच कहीँ छैन । यसमा संलग्न जुनसुकै पार्टीका किन नहोऊन्, कारबाहीको दायरामा आउनुपर्छ भन्ने छ ।’

कांग्रेस सभापति शेरबहादुर देउवाले यस विषयमा सार्वजनिक टिप्पणी गरेका छैनन् । इतर समूहले खाँणलाई निलम्बन गर्न भने पनि उनले सुनेका छैनन् । भेट्न जानेहरूलाई पनि कुनै कदम नचाली मौन बस्न देउवाले भन्ने गरेका छन् ।

यसैबीचमा मञ्जु र कांग्रेस सांसद आरजु राणा देउवाको संलग्नता रहेको दाबी गरिएको अडियो पनि सार्वजनिक भएको छ । तत्कालीन प्रधानमन्त्री शेरबहादुर देउवा पत्नी राणा र गृहमन्त्री बालकृष्ण खाँणकी श्रीमती मञ्जुले क्रमश: साढे २ करोड र ६ करोड रकम लिएको अडियोमा दाबी गरिएको छ । अनावश्यक रूपमा सरुवा गरेर पैसा लिन खोजेको, दुहुनो गाई बनाएको भन्दै एक व्यक्तिले भनेका छन्, ‘आरजु राणालाई साढे २ करोड, गृहमन्त्री बालकृष्ण खाँणका लागि मञ्जु खाँणलाई हनुमानथानको घरमा ६ करोड बुझाएकै हो । प्रमाण छ नि मसँग ।’

यद्यपि, उक्त अडियोमा सत्यता नरहेको राणाले दाबी गरेकी छन् ।

आफ्नो नाम जोडिएको भन्दै खाँणले पक्राउ पर्नुअघि वैशाख २३ मा संलग्ना नरहेको भन्दै खण्डन गरेका थिए । मञ्जु सम्पर्कविहीन हुँदा आरजुले भने अडियो क्लिपको सत्यतथ्य छानबिन गरी दोषीलाई कारबाही गर्न माग गर्दै साइबर ब्युरोमा उजुरी दिएकी छिन् । सोमबार संसदमा समेत उनले अडियो नक्कली भएको बताइन् ।

मञ्जु र आरजुको नाम सतहमा आए पनि कांग्रेसका अन्य नेताहरूको संलग्नता रहेको हुन सक्ने आशंका गरिएको छ । कांग्रेस सभापति शेरबहादुर देउवा पार्टीभित्र दबाबमा छन् । उनलाई पक्राउ परेका खाँणलाई पार्टी जिम्मेवारीबाट अलग राख्नुपर्ने दबाब छ भने आफ्नो कित्ताको नेता भएकाले तत्काल कुनै कदम चालिहाल्न पनि मन छैन । पक्राउ परेको ६ दिनसम्म पार्टीले गर्ने निर्णय के हुने भन्ने प्रस्ट छैन ।

खाँण पक्राउ परेलगत्तै उनीनिकट पाँच जना सांसद सभापति देउवा भेट्न पुगेका थिए । सांसदहरू कान्तिका सेजुवाल, नागिना यादव, सीताकुमारी यादव, रूपा विक र सुशीला थिङ देउवा निवास पुगेका थिए । सोमबार उनीहरूसहित जावेदा खातुनले देउवा निवासमा असन्तुष्टि पोख्न र कसैलाई कारबाहीको माग गर्न गएको नभई नियमित भेटघाटका लागि गएको र त्यो स्वाभाविक रहेको बताए ।

खातुनको नाम भेट्न गएको सूचीमा रहेको विवरण आएको थियो । उनले आफू भेटमा नरहेको भन्दै खण्डन गरेकी छन् । उनीहरूले भनेका छन्, ‘नक्कली भुटानी शरणार्थी प्रकरणको सन्दर्भमा दोषीमाथि कानुनी कारबाही हुनुपर्छ । निर्दोषलाई फसाउन अनेक जालझेल गराइनु हुँदैन ।’

सांसद विकले यसबारेमा थप बोल्न आवश्यक नरहेको बताइन् । सो भेटमा सांसदहरूले खाँणलाई पार्टी भूमिकाबाट निलम्बन गर्नुपर्ने इतरको दबाबलाई प्रमाणबिना गर्न हुँदैन भनेर सभापतिलाई भनेका थिए । उनीहरूले सांसदमा पनि खाँण पक्राउको विषयमा बोल्न के गर्ने भनेर देउवालाई सोधेका थिए । देउवाले अहिले केही नबोल्न भनेका थिए । ‘हामीले संसदमा यस विषयमा बोल्न के गरौँ भन्दा सभापतिज्यूले अहिले केही नबोल्न भन्नुभयो,’ भेटमा सहभागी एक सांसदले शिलापत्रसँग भनिन् ।

कांग्रेसका नेता नक्कली शरणार्थी प्रकरणमा पक्राउ पर्दैमा सरकार तलमाथि भैहाल्ने अवस्था नरहेको बुझाइ माओवादीको छ । ‘अहिले सरकारमा त्यस्तो प्रभाव पर्दैन । दोषी छुट्नु भएन, निर्दोष फस्नु भएन । छानबिन निष्पक्ष हुनुपर्छ भन्ने छ,’ प्रधानमन्त्रीका राजनीतिक सल्लाहकार हरिबोल गजुरेलले भने ।

यो मद्दालाई लिएर प्रधानमन्त्री प्रचण्ड, कांग्रेस सभापति देउवा र एमाले अध्यक्ष केपी शर्मा ओली बारम्बार भेटमा छन् । राष्ट्रको स्वाभिमानसँग जोडिएको कुरामा शीर्ष नेताहरूबीच छलफल हुनु स्वाभाविक रहेको गजुरेलले बताए ।

सरकारमा कांग्रेस पनि रहेकाले सरकारमा सहभागी दलको अपनत्व रहने धुम्बाराही स्रोत बताउँछ । ‘सरकार कसरी बनेको छ, हामीलाई पनि थाहा छ । प्रचण्डले मात्र गरेको काम हो र यो ? नगर भन्दा प्रचण्डले अघि बढाउन सक्छन् ?,’ धुम्बाराही स्रोतले शिलापत्रसँग भन्यो ।

शरणार्थी प्रकरणले सरकारमा तत्काल प्रभाव नपर्ने बुझाइ बालुवाटारको छ । ‘यो प्रकरणले तुरुन्तै सरकारलाई असर गर्दैन । असर परे पनि तत्काल देखिँदैन,’ बालुवाटार स्रोतले शिलापत्रसँग भन्यो ।

अहिले सत्ता परिवर्तन हुने सम्भावना नरहेको कांग्रेस नेताहरू बताउँछन् । कांग्रेस महामन्त्री गगन थापा नक्कली शरणार्थीको विषयमा पार्टी पदाधिकारीभित्र छलफल भएको र केन्द्रीय समितिमा छलफल हुने बताउँछन् । सरकार परिवर्तन भए पनि कांग्रेसको हितमा नहुने केन्द्रीय सदस्य अजयबाबु शिवाकोटी बताउँछन् ।

‘सरकारको कामकारबाहीमा प्रभाव पर्ने त छँदैछ । तर, गरिरहेको कामलाई रोक्नेतिर लाग्न हुँदैन । त्यो झन् प्रत्युत्पादक हुन्छ । अहिले कम्तीमा नेता कार्यकर्तामा मोरल बुस्ट भैरहेको छ । यसलाई रोक्यौँ भने सकारात्मक सन्देश जाँदैन,’ शिवाकोटीले भने ।

प्रकाशित मिति: सोमबार, जेठ १, २०८० २०:२६