भैँसी पालेर भवानीले गाउँमै कमाउँछिन् महिनाको २ लाख रुपैयाँ (भिडियोसहित)

A+ A A-

बारास्थित निजगढ नगरपालिका- ५, बागदेवकी भवानी सापकोटाले पशुपालन गरी महिनाको २ लाख रुपैयाँ कमाइरहेकी छिन् । पाँचवटा भैँसी किनेर २०७५ सालमा उनले सुरु गरेकाे ‘बकैया ठाकुर पशु फार्म’ अहिले ६५ वटा भैँसी, २२ वटा पाडापाडी, बाख्रा र कुखुराले भरिभराउ छ । यो फार्मको सम्पूर्ण शेयर स्वामित्व उनको मात्रै छ । नजिकै लालबकैया खोलालाई स्थानीयले साक्षात भगवान मान्छन् । सोही खोलाको नामबाट उनले आफ्नो फार्मको नाम राखेकी हुन् ।

दुई छोराछोरीमध्ये २०७३ सालमै विवाह गरेकी छोरी नुवाकोटमा छिन् । एक मात्र छोराले २०७४ सालमा आत्महत्या गरे । श्रीमान्‌सँग पनि उनको सम्बन्धविच्छेद भयो । अनि उनले आफ्नै बलबुतामा काम गर्ने निधो गरिन् । आफूमाथि बज्रेको चोट बिर्सेर भवानीले २०७५ सालमा फार्म खोलेकी थिइन् ।

४५ वर्षीया भवानीले भैँसीको दूध, पाडापाडी, बाख्रा र खुकुरा बेच्न बजार धाउनै पर्दैन । डेरी सञ्चालक र व्यापारीहरूले सिधै फार्ममै आएर आवश्यक वस्तु उठाउने गरेका छन् । फार्ममा अहिले ६० वटा खसीबाख्रा र डेढ सयभन्दा बढी लोकल कुखुरा पनि छन् । दुहुना भैँसीहरूबाट दैनिक ३ सय लिटर दूध बिक्री हुन्छ । लिटरको ९० रुपैयाँमा बिक्री हुँदा महिनामा दूध बेचेरै मात्र ७ लाख रुपैयाँभन्दा बढी रकम आउँछ । खसी र खुकुराचाहिँ एक सिजनमा मात्रै बिक्री हुन्छ ।

उनले फार्ममा पाँच जनालाई रोजगारी पनि दिएकी छन् । महिनामा ६० हजारजति श्रमिकलाई दिन्छिन् । भैँसी, बाख्रा र कुखुराका लागि चारो तथा उपचारमा महिनामा ५ लाख रुपैयाँ खर्च हुने गरेको उनी बताउँछिन् । सबै खर्च कटाएर महिनामा डेढदेखि २ लाख रुपैयाँ बचत हुने भवानीको भनाइ छ ।

'खसी, कुखुरा ६ महिना वा वर्ष दिनमा मात्रै बेच्ने हो । वर्षमा ६/७ लाखकाे बेच्छु । एकमुस्ट आएको रकमलाई महिनावारीमा हिसाब गर्दा सबै गरी महिनामा २ लाख रुपैयाँजति आम्दानी हुन्छ', उनले शिलापत्रसित भनिन् ।

अनुदान

२०७५ सालमा पहिलोपल्ट उनले मधेश प्रदेशबाट ४ लाख रुपैयाँ अनुदान पाएकी थिइन् । कडा परिश्रम गरे परिणाम सकारात्मक आउने बताउने उनी सरकारले किसानको नाम बेच्नेहरूलाई पत्याउने तर वास्तविक किसानलाई नपत्याउने गरेको गुनासाे गर्छिन् । ‘कामै नगर्नेलाई लाखौँ, करोडौँ रूपैयाँ अनुदानको नाममा सरकारले सहयोग गर्छ । तर, हामीजस्ता कृषकलाई सामान्य औषधि पनि दिँदैन’, उनकाे दु:खेसाे छ ।