अर्बपति होम चालिसे: जसले पञ्चरुपा सहकारीको ५ करोड रुपैयाँ कुम्ल्याउन खोजे

A+ A A-

पछिल्लो समय सहकारी संस्थाले निक्षेपकर्ताको लगानी फिर्ता गर्न नसक्दा विभिन्न सहकारी बदनाम बनेका छन् । त्यति मात्रै होइन, बचतकर्ताको बचत फिर्ता गर्न नसक्दा चर्चित सिभिल सहकारी संस्थाका तत्कालीन अध्यक्ष इच्छाराज तामाङसहित कतिपय सहकारी सञ्चालकहरू जेलसमेत पुगे ।

बदमासीले हाल सहकारी संस्थामाथि नै आमबचतकर्ताको विश्वास र भरोसा टुटेको छ । सोही कारण केही राम्रा सहकारीसमेत ठूलो मारमा परेका छन् । अझ आश्चर्यको कुरा त के छ भने एक जना बचतकर्ताले सहकारी डुबाएको तथ्य फेला परेको छ । यसरी बचतकर्ताबाट सहकारी नै पीडित हुने पुष्कल रिसाल अध्यक्ष रहेको पञ्चरूपा सहकारी संस्था हो ।

काठमाडौंकाे सिनामंगलमा कार्यालय रहेको पञ्चरूपा सहकारीलाई अप्ठ्यारो पार्ने व्यक्ति हुन्- सिन्धुपाल्चोक इन्द्रावती- ६ का कुमार चालिसे उर्फ होमप्रसाद चालिसे । चालिसेले पञ्चरूपा सहकारीबाट बचत गरेको सबै रकम फिर्ता पाउँदासमेत सहकारीको चेक फिर्ता नदिई उल्टै सहकारीको चेकमा आफैँले रकम भरेर ‘चेक बाउन्स’ गराएर अप्ठ्यारोमा पारेका छन् ।

सहकारीमा चालिसेले बचत गरेको रकम, फिर्ता लिएको सबै अडिट रिपोर्ट र सहकारीका सचिव पुरन रावलसँग आफूले पाउनुपर्ने रकम पाए चेक फिर्ता गर्ने बताएको अडियो रेकर्डसमेत शिलापत्रले प्राप्त गरेको छ । अडिट रिपोर्टअनुसार चालिसेले १ आसोज २०७८ मा पञ्चरूपा सहकारीमा बचत खाता खोलेको देखिन्छ । संस्कार ट्रेडर्स (मदिरा व्यवसाय)का सञ्चालकसमेत रहेका चालिसेले पञ्चरूपा सहकारीमा एक वर्षको अवधिमा १ अर्ब ४५ करोड ८ लाख ८८ हजार १८७ जम्मा गरेका थिए ।

सो रकम उनले ५ सय ३८ पटक गरेर जम्मा गरेको देखिन्छ । समय-समयमा राख्दै र झिक्कै गरेका चालिसेले १ कात्तिक २०७९ मा आफ्नो खाता बन्द गरे । उनले राख्दै झिक्दै गरेको सो रकम उनले २ हजार ६५२ पटक गरेर झिकेको अडिट रिपोर्टमा देखिन्छ । यो बेलासम्म सहकारी र चालिसेबीचको सम्बन्ध सुमधुर थियो । हाल चालिसेको खातामा शून्य बचत छ ।

सहकारीलाई यसरी झुक्याए चालिसेले

आफ्नो खातामा जम्मा रहेको रकम सबै झिकेपछि भने चालिसेले आफ्नो छोरा र छोरीका नाममा सहकारीमा खाता खोलिदिएका थिए । आफ्नो खाता शून्य पारेकै दिन चालिसेले छोरी स्वस्तिको नाममा १ कात्तिक २०७९ मा खाता खोलेका थिए ।

उनले त्यही दिन ३ करोड ६७ लाख १ हजार रुपैयाँसम्म जम्मा गरिदिएका थिए । त्यसअघि १२ असार २०७९ मा उनले छोरा सौगात चालिसेको नाममा पनि खाता खोलेका थिए । छोरा र छोरीका नाममा खाता खोलेपछि भने चालिसेले आफूले करोडौँ रुपैयाँ सहकारीमा राख्दा त्यसको सुरक्षणका लागि सहकारीले पनि एउटा चेक दिनुपर्ने सर्त राखे । सहकारी चासिलेको कुरामा राजी भयो ।

सहकारीले चालिसलेलाई हस्ताक्षरसहितको खाली चेक दिए । सहकारीले चालिसेलाई ३ असोज २०७९ मा मितिसमेत नराखेको चेक चालिसेलाई दिएका थिए । यता, छोरी स्वस्ति र छोरा सौगातको कारोबार सहकारीसँग नियमित नै थियो । योबीचमा स्वस्तिको खातामा ३३ करोड ५५ लाख ४२६ रुपैयाँ र सौगातको खातामा ७५ लाख ५० हजार रुपैयाँ जम्मा भयो ।

उता कारोबार चलेकै बेला होम चालिसेले भने सहकारीले दिएको खाली चेकमा आफैँले ५ करोड रुपैयाँ राखेर १७ पुसमा चेक बाउन्स गराए । पहिलोपटक चेक बाउन्स हुँदासम्म सहकारीलाई चेक बाउन्सबारे कुनै जानकारी आएन । तर, दोस्रोपटक चेक बाउन्स हुँदा भने सहकारीले थाहा पायो ।

त्यो बेलासम्म सौगातको खाताको रकम भने सहकारीले फिर्ता गरिसकेको थियो । स्वस्तिले जम्मा गरेको ३३ करोड ५५ लाख ४२६ रुपैयाँमध्ये सहकारीले १ करोड १४ लाख ८५ हजार रुपैयाँ फिर्ता गर्नुपर्ने थियो । तर, चालिसेले भने ५ करोडको चेक बाउन्स गरेपछि सहकारीले चालिसेसँग सम्पर्क गर्‍यो । सुरुमा चालिसेले आफूले चेक बाउन्स नै नगरेको जिद्दी गरे । पछि आफैँले चेक बाउन्स गरेको चालिसेले स्वीकार त गरे तर, चेक फिर्ता गर्न फेरि अर्को सर्त राखे- स्वस्तिको खातामा जम्मा भएकोमध्ये १ करोड १४ लाख रुपैयाँ पूरै फिर्ता गर्नुपर्ने ।

सहकारीले स्वस्तिको दिनुपर्ने १ करोड १४ लाख रुपैयाँ २४ र २५ माघ २०७९ मा बैंकिङ सेवामार्फत उनको खातामै राखिदिएर फिर्ता गर्‍यो । तर, होम चालिसेले बाउन्स गरेको चेक भने फिर्ता गरेनन् । सुरुमा स्वस्तिले राखेको रकम सबै फिर्ता भएपछि चेक फिर्ता गर्ने प्रतिबद्धता जनाएका चालिसेले पटक-पटक दिन्छु भनेर चेक फिर्ता नदिएपछि सहकारी सञ्चालक आजित भए ।

सहकारीले सुरक्षणका लागि दिएको चेक बचतकर्ताको सबै रकम फिर्ता हुँदा पनि उल्टै बाउन्स भएपछि उक्त प्रकरण प्रहरीको केन्द्रीय अनुसन्धान ब्युरो (सीआईबी) सम्म पुगेको छ । सहकारीलाई चालिसेले विश्वासघात गरेको भन्दै सीआईबीमा उजुरी दिन पुगेको सहकारीका सचिव पुरन रावलले बताए ।

‘हाम्रो सहकारीले चालिसे परिवारले राखेको सबै रकम फिर्ता गरिसकेको छ । यो सबै सहकारी र बैंकिङ च्यानलमार्फत नै भएको हो । तर, चेक फिर्ता गर्छु भनेको मान्छेले चेक फिर्ता नगरी उल्टै हामीलाई दु:ख दिनुभयो,’ रावलले भने ।

चालिसेले चेक फिर्ता नगरेपछि बाध्य भएर सहकारी प्रहरीमा जान बाध्य भएको रालवको भनाइ छ । चालिसे सीआईबीले अनुसन्धान जारी राखेकै बेला प्रहरीले आफूमाथि अनुसन्धान गर्ने डरले चेक प्रकरणबारे अदालत पुगेको पनि रावलको दाबी छ ।

सो प्रकरणबारे बुझ्दा चालिसेले भने सहकारीमा राखेको रकमबारेको विवादभन्दा पनि सहकारीका अध्यक्ष पुष्कल रिसाल र सहकारीका कोषाध्यक्षलाई नगद दिएको रकमबारे विवाद रहेको बताए । ‘सहकारीमा राखेको रकमबारेको विवाद होइन । मैले अध्यक्ष र कोषाध्यक्षलाई नगद रकम सापटी दिएको हो । उनीहरूले शाखा विस्तार गर्ने भन्दै मसँग रकम मागेका थिए । मैले ५ करोड रुपैयाँ नगद दिएको हो । उनीहरूले चेक दिए, बैंकमा रकम नभएपछि बाउन्स भएको हो,’ चालिसेले शिलापत्रसँग भने ।

सीआईबीले दुवै पक्षलाई छलफलका लागि बोलाए पनि अन्तिममा पुग्नुपर्ने ठाउँ अदालत भएकाले मुद्दा दायर गरेकाे उनले बताए । चेकमा समेत रकम आफूले नभरेको उनकाे दाबी छ । त्योबाहेक सहकारी सञ्चालकहरूले बचतकर्ताको रकम सहकारीको खातामा नभई व्यक्तिगत खातामा पनि राख्ने गरेको आरोप चालिसेको छ ।

प्रकाशित मिति: शुक्रबार, वैशाख २२, २०८० १७:००