साढे चार महिनापछि खेलकुद मन्त्रालयले पायो मन्त्री, लिम्बूलाई चुनौतीसँगै अवसर

साढे चार महिनापछि खेलकुद मन्त्रालयले पायो मन्त्री, लिम्बूलाई चुनौतीसँगै अवसर

A+ A A-

करिब साढे चार महिनापछि युवा तथा खेलकुद मन्त्रालयले मन्त्री पाएको छ । बिहीबार राष्ट्रपति रामचन्द्र पौडेलबाट शपथ लिएसँगै नेपाली कांग्रेसका सांसद डिगबहादुर लिम्बूले युवा तथा खेलकुद मन्त्रालयको बागडोर सम्हालेका छन् ।

राजनीतिक दल र नेताको ओझेलमा पर्दै आएकाे मन्त्रालय हो, युवा तथा खेलकुद । युवा तथा खेलकुद मन्त्रालय राेजाइकाे मन्त्रालय बन्ने गरेकाे छैन । काेही पनि याे मन्त्रालयलाई प्राथमिकतामा राख्दैनन् । भागवण्डा पूरा गर्नैका लागि युवा तथा खेलकुद मन्त्रालय थमाउने नेपालको राजनीतिक संस्कार छ । यसैले पनि नेपाली खेलकुदले फड्को मार्न नसकेको हो ।

मोरङ क्षेत्र नम्बर १ बाट चुनाव जितेर दोस्रोपटक प्रतिनिधिसभा सदस्य बनेका डिगबहादुर लिम्बू पहिलोपटक मन्त्री बनेका छन् । देशको युवा र समग्र खेलकुदको नेतृत्व गर्न आएको उनीसामु चुनौतीको चाङ छ । खेलकुद देशलाई जोड्दै अन्तर्राष्ट्रियस्तरमा चिनाउने माध्यम हो । खेलकुद मात्रै एउटा यस्तो चीज हो, जसले सारा नेपालीलाई खुसी बनाउन सक्छ ।

राजनीतिक दलको प्राथमिकतामा नपरे पनि खेलकुदको महत्त्व भने असीमित नै छ । यसैको नेतृत्व गर्न आएका मन्त्री डिगबहादुरलाई धेरै अवसरसँगै चुनौती पनि छ ।

नवनियुक्त युवा तथा खेलकुदमन्त्री लिम्बूको पहिलो प्राथमिकता नै भौतिक संरचना हुनुपर्छ । शताब्दी लामो इतिहास बोकेको नेपाली खेलकुदले अहिलेसम्म गतिलो रंगशाला पाउन सकेको छैन ।

भौतिक संरचनाकै कारण नेपाली खेलकुदले धेरै थोक गुमाएको छ । अन्तर्राष्ट्रिय प्रतियोगिता आयोजना गर्न वञ्चितदेखि मैदान अभावकै कारण खेलाडीले खेल्नै नपाइरहेको अवस्था अझै पनि नेपालमा छ । फुटबलको दशरथ रंगशाला र पोखरा अन्तर्राष्ट्रिय रंगशालालाई देखाएर सबै खेललाई मापन गर्न सकिन्न । ठूला सुविधासम्पन्न रंगशाला अहिलेसम्म नेपालमा बन्ने त कल्पनासम्म पनि भएको छैन ।

मूलपानीमा बन्दै गरेको अन्तर्राष्ट्रिय क्रिकेट रंगशाला अलपत्रजस्तै छ । बहुउद्देश्यीय योजनामा रुपान्तरित गरेको सरकारले वर्षौं बितिसक्दा पनि अहिलेसम्म पूर्णता दिन सकेको छैन । देशका धेरै ठाउँमा निर्माण गर्ने भनिएको अन्तर्राष्ट्रिय रंगशालाको हालत पनि उस्तै छ ।

ठूलो मेघा इभेन्ट आयोजना गर्नका लागि सुविधासम्पन्न रंगशालाहरू निर्माणमा अहिलेका खेलकुदमन्त्री लिम्बूको पहिलो प्राथमिकता हुनुपर्छ । त्यसो त पद बहाली गरेसँगै मन्त्री लिम्बूले भनेका छन्, ‘समग्र खेल जीवन र यसको भौतिक तथा पूर्वाधार विकास गर्ने कुरामा अहिलेसम्म अभाव छ, खेलाडी साथीहरूले, पदाधिकारीले जे अभाव महसुस गर्नुभएको छ, त्यसलाई मध्यनजर गरेर काम गर्ने प्रयास गर्नेछु ।’

यता, राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठ भने अहिलेका मन्त्रीलाई नेपाली खेलकुद उठाउन ठूलो चुनौती भएको बताउँछन् । ‘नेपाली खेलकुदमा गुटउपगुट धेरै छन् । एउटाले एक थरी कुरा गर्छन् अर्कोले अर्कै । खेलकुद बुझ्नै समय लाग्छ', अध्यक्ष श्रेष्ठ थप्छन्, ‘बजेट पुगेन भन्ने अनि दिएको बजेट सबै फ्रिज हुँदै आएको अवस्था छ । यसअघि कामै गर्न नसकेको अवस्था छ ।'

नियमित प्रतियोगिता नहुँदा देशका धेरै खेलाडी खेलजीवन नै त्याग गरेर विदेशिए । कतिले पेसै परिवर्तन गरे । खेलकुदको नेतृत्व गर्ने युवा तथा खेलकुद मन्त्रालय, राष्ट्रिय खेलकुद परिषद् र सम्बन्धित खेल संघहरूको कारण खेलाडी पनि वर्षौंदेखि पीडित छन् ।

नेपालमा क्यालेन्डरअनुसार खेलकुद गतिविधि हुँदैन । अस्थिर प्रतियोगिता हुँदा खेलेरै जीविकोपार्जन गर्ने खेलाडी भने यसबाट पिल्सिएका छन् । राखेपले गर्ने राष्ट्रिय खेलकुद प्रतियोगिता नियमित हुँदैन । यति मात्रै होइन, संघहरूले गर्ने प्रतियोगिताहरू व्यावसायिक छैन । गुणस्तरीय छैन ।

‘सकेसम्म देखिने र धेरै मानिसको चित्त बुझ्नेगरी काम गर्नेछु । केही समय अध्ययन गर्न समय लाग्छ, काममा विश्वास गर्ने मानिस हो म’, युवा तथा खेलकुदमन्त्री लिम्बू थप्छन्, ‘हरेक कुरालाई सकारात्मक ढंगबाट लिनुपर्छ, नेपालीले गर्न सक्छन् भन्ने कुरा खेलाडी साथीहरूले देखाइरहनुभएको छ । म १८ घण्टाको समय दिएर काम गर्नेछु ।’

एसियाली खेलकुद प्रतियोगिता चीनमा मे ५ देखि १७ तारिखसम्म आयोजना हुँदैछ । यो प्रतियोगिताका लागि नेपाली खेलाडीको सेवासुविधामा मन्त्री लिम्बूले कस्तो भूमिका खेल्छन् त्यसले पनि धेरै अर्थ राख्नेछ । खेलकुद क्षेत्रका यी समस्या समाधान गरी याे मन्त्रालयलाई आकर्षक बनाए लिम्बूलाई वाहीवाही पाउने अवसर पनि छ ।

प्रकाशित मिति: बिहीबार, वैशाख २१, २०८० १९:३२